କଟକ ଅଫିସ,୨୯ା୭: ରୌପ୍ୟ ନଗରୀ କଟକ ସହରରେ ଯାଜପୁର ଜିଲାର ନଗଡ଼ା ପରି ଦୃଶ୍ୟ ଦେଖିବାକୁ ମିଳିଛି। ୩ଶିଶୁ ଭୋକ ଓପାସରେ ଆଉଟୁପାଉଟୁ ହେଉଥିବାବେଳେ ଆଖିରୁ ଲୁହ ଶୁଖୁନି। ଖାଦ୍ୟ ଅଭାବରୁ ଅପପୁଷ୍ଟିର ଶିକାର ହୋଇଥିବା ଏହି ୩ ଶିଶୁଙ୍କୁ ଚାଇଲ୍ଡ ଲାଇନ ଉଦ୍ଧାର କରି ଗୁରୁବାର ସିଡବ୍ଲ୍ୟୁସିରେ ହାଜର କରିଛି। ଏମାନେ ଭଉଣୀ ଭାଇ ଓ ଘର କେନ୍ଦୁଝର ଜିଲାରେ ବୋଲି ଜଣାପଡ଼ିଛି।
ଶିଶୁମାନଙ୍କୁ କୁପୋଷଣରୁ ରକ୍ଷା କରିବା ପାଇଁ ସମନ୍ବିତ ଶିଶୁ ବିକାଶ ଯୋଜନା (ଆଇସିଡିଏସ୍)ରେ ପୁଷ୍ଟିକର ଖାଦ୍ୟ ତଥା ଚୁଡ଼ା, ଛତୁଆ, ଅଣ୍ଡା ଆଦି ପ୍ରଦାନ କରାଯାଉଥିବା କୁହାଯାଉଛି। ମାତ୍ର କଟକ ସହରରେ ଏହାର ଭିନ୍ନ ଚିତ୍ର ସାମ୍ନାକୁ ଆସିଛି। ଖାଦ୍ୟ ବିନା କୁପୋଷଣର ଶିକାର ହୋଇ ରାସ୍ତାରେ କାନ୍ଦି କାନ୍ଦି ବୁଲୁଥିବା ୩ ଶିଶୁଙ୍କୁ ଚାଇଲ୍ଡ ଲାଇନ ଉଦ୍ଧାର କରିଛି। ଏମାନଙ୍କୁ ଗୁରୁବାର ସିଡବ୍ଲ୍ୟୁସିରେ ହାଜର କରାଯିବା ପରେ ବସୁନ୍ଧରାକୁ ପଠାଇ ଦିଆଯାଇଛି। ମିଳିଥିବା ସୂଚନା ଅନୁଯାୟୀ, ଏହି ଶିଶୁ ୩ ଜଣ ହେଉଛନ୍ତି କେନ୍ଦୁଝର ଜିଲା ଆନନ୍ଦପୁରର ରାଜେଶ ବେହୁଆଙ୍କ କନ୍ୟା ଓ ପୁତ୍ର। ରାଜେଶଙ୍କ ନିଜ ସ୍ତ୍ରୀ ଲକ୍ଷ୍ମୀ, ୩ ପିଲା ଏବଂ ବୃଦ୍ଧ ବାପାଙ୍କୁ ନେଇ କଟକ ନୂଆବଜାର ନେହେରୁପଲ୍ଲୀ ଅଞ୍ଚଳରେ ରହୁଥିଲେ। ତେବେ ଯକ୍ଷ୍ମାରୋଗରେ ଆକ୍ରାନ୍ତ ହୋଇ ଲକ୍ଷ୍ମୀ ୧୩ ଦିନ ତଳେ ମୃତ୍ୟୁବରଣ କରିସାରିଛନ୍ତି। ରାଜେଶ ଦିନ ମଜୁରିଆ ଭାବେ କାମ କରନ୍ତି। କାମ ନ ମିଳିଲେ ପରିବାର ଉପବାସରେ ରହନ୍ତି। ପୁଷ୍ଟିକର ଖାଦ୍ୟ ତ ଦୂରର କଥା ଉକ୍ତ ୩ ଶିଶୁଙ୍କୁ ସାଧାରଣ ଖାଦ୍ୟ ମୁଠେ ମିଳୁ ନ ଥିବାରୁ ସେମାନେ ଶୁଖି କଣ୍ଟା ପ୍ରାୟ ହୋଇଗଲେଣି। ରାଜେଶଙ୍କ ସାନ ଝିଅର ପେଟ ପିଠି ଏକାକାର ହୋଇଯାଇଛି। ତେବେ ଚାଇଲ୍ଡ ଲାଇନ ଅପପୁଷ୍ଟିର ଶିକାର ହୋଇଥିବା ଏହି ପିଲାମାନଙ୍କୁ ଠାବ କରିଛି। ସିଡବ୍ଲ୍ୟୁସି ଉକ୍ତ ୩ ଶିଶୁଙ୍କୁ ବସୁନ୍ଧରା ପଠାଇବା ପରେ ସେମାନଙ୍କୁ ସ୍ବତନ୍ତ୍ର ବ୍ୟବସ୍ଥା କରାଯାଇ ରଖାଯାଇଛି। ତେବେ ଏ ନେଇ ଜିଲା ଶିଶୁ ସୁରକ୍ଷା ଅଧିକାରୀ (ଡିସିପିଓ) ପ୍ରଗତି ମହାନ୍ତି କହିଛନ୍ତି, ଏହି ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।