ଛତ୍ରପୁର, ୧୪।୭(ଡି.ଏନ୍.ଏ.): ଗଞ୍ଜାମ ଜିଲାର ବ୍ରହ୍ମପୁର, ଛତ୍ରପୁର ସମେତ ୧୮ ସହରର ପ୍ରବେଶ ପଥକୁ ସମ୍ପୂର୍ଣ୍ଣ ସିଲ୍ କରାଯାଇଛି। କୌଣସି ବାହାର ଲୋକଙ୍କୁ ଜିଲା ଭିତରକୁ ଏବଂ ଭିତରୁ ବାହାରକୁ କାହାକୁ ଛଡାଯାଉ ନାହିଁ। ଉଭୟ ଗଞ୍ଜାମ ଓ ବ୍ରହ୍ମପୁର ପୋଲିସ ଜିଲା ଅଧୀନ ଥାନା ପୋଲିସ ଅଧିକାରୀ ସବୁ ସହର ପ୍ରବେଶ ପଥରେ ମନିଟରିଂ କରୁଥିବାବେଳେ ବ୍ୟାପକ ପୋଲିସ ଫୋର୍ସ ମୂତୟନ କରାଯାଇଛି। କେବଳ ଖାଦ୍ୟ ଓ ଅତ୍ୟାବଶ୍ୟକୀୟ ସାମଗ୍ରୀ ପରିବହନ ଗାଡି, ପରିଚୟପତ୍ର ଥିବା ସରକାରୀ ଅଧିକାରୀ ଓ କର୍ମଚାରୀ ଏବଂ ମେଡିକାଲ ପାଇଁ ବାହାରକୁ ଓ ଭିତରକୁ ଯିବାକୁ ଅନୁମତି ଦିଆଯାଉଛି। ଏପରିକି ସବୁ ସହରର ଅଧିକାଂଶ ସାହିକୁ ମଧ୍ୟ ସିଲ୍ କରାଯାଇଛି।
ବିଶେଷକରି ସହର ମାନଙ୍କରେ ଦିନକୁ ଦିନ କରୋନା ପଜିଟିଭ ସଂଖ୍ୟା ବୃଦ୍ଧି ପାଉଛି। ଏହାକୁ ନିୟନ୍ତ୍ରଣ ସହ କରୋନା ଚେନ୍ ଭାଙ୍ଗିବାକୁ ଏପରି ପଦକ୍ଷେପ ନିଆଯାଇଛି। କୌଣସି ଗ୍ରାମାଞ୍ଚଳ ଲୋକ ସହରକୁ ଯାଇପାରିବେନି। ୫ ଦିନ ଧରି ଗଞ୍ଜାମର ୧୮ ସହରରେ ଚାଲିଥିବା ଶଟଡାଉନ ମଙ୍ଗଳବାର ଉଠିଛି। ଅପରପକ୍ଷରେ ଗୁରୁବାର ପର୍ଯ୍ୟନ୍ତ ୩ ଦିନ ପାଇଁ ଶଟଡାଉନ କୋହଳ କରାଯାଇଛି। ଏହି ତିନି ଦିନ ପାଇଁ ସକାଳ ୬ରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ପରିବା, ଆମୀଷ ଦୋକାନ ଏବଂ ସକାଳ ୬ ରୁ ୪ ଟା ପର୍ଯ୍ୟନ୍ତ ଗ୍ରୋସରୀ ଦୋକାନ ଖୋଲିବ। ସାମାଜିକ ଦୂରତା ଓ ଗାଇଡ୍ଲାଇନ ଲୋକେ ପାଳନ କରୁଛନ୍ତି କି ନାହିଁ ତାର ଅନୁଧ୍ୟାନ କରାଯିବ। ଏହାପରେ ଶଟଡାଉନ ଉପରେ ନିଷ୍ପତ୍ତି ନିଆଯିବ ବୋଲି ଜ଼ିଲାପାଳ ବିଜୟ ଅମୃତା କୁଲାଙ୍ଗେ ମଙ୍ଗଳବାର କହିଛନ୍ତି।
