ପାରଳାଖେମୁଣ୍ଡି/ଆର.ଉଦୟଗିରି,୨୨।୪(ଡି.ଏନ.ଏ.): ଗଜପତି ଜିଲା ଆର.ଉଦୟଗିରି ଥାନା ଅନ୍ତର୍ଗତ ନୂଆଗଡ଼ ଅଞ୍ଚଳର କାଣ୍ଡାମା ଘାଟିରୁ ଶୁକ୍ରବାର ଏକ ଅଟୋ ଓଲଟି ଜଣେ ମହିଳା, ଜଣେ ଶିଶୁଙ୍କ ସମେତ ୩ ଜଣଙ୍କ ମୃତ୍ୟୁ ହୋଇଥିବା ବେଳେ ୧୦ଜଣ ଆହତ ହୋଇଛନ୍ତି। ଆହତମାନଙ୍କୁ ବ୍ରହ୍ମପୁର ଓ ପାରଳାଖେମୁଣ୍ଡି ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି।
ପ୍ରକାଶ ଯେ, ଶୁକ୍ରବାର କେରେଡାଙ୍ଗ ଗ୍ରାମରେ ସାପ୍ତାହିକ ହାଟ ଥିଲା। ନୂଆଗଡ଼ ଅଞ୍ଚଳର ଲୋକେ ହାଟ ସାରି ଏକ ଅଟୋରେ ଗ୍ରାମକୁ ଫେରୁଥିଲେ। କାଣ୍ଡାମା ଘାଟି ରାସ୍ତାରେ ଅଟୋଟି ଭାରସାମ୍ୟ ହରାଇ ୨୦ ଫୁଟ୍ ତଳେ ଥିବା ଝରଣାକୁ ଖସିପଡିଥିଲା। ସେଥିରେ ବସିଥିବା ସିୟନଗଡର ଲୁକ ମଣ୍ଡଳ (୬୦) ଘଟଣାସ୍ଥଳରେ ପ୍ରାଣ ହରାଇଥିଲେ। ନୂଆଗଡ ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଖଜୁରିପଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଚିକିତ୍ସା ସମୟରେ ଅଟୋ ଚାଳକଙ୍କ ସ୍ତ୍ରୀ ବଡପଦା ଗ୍ରାମର ଡଲି କର (୩୦) ଏବଂ ଜଳଙ୍ଗ ଗ୍ରାମର ପ୍ରତ୍ୟୁଷ କାର୍ଯୀ (୯)ଙ୍କ ମୃତ୍ୟୁ ହୋଇଥିଲା। ଅନ୍ୟ ଆହତମାନେ ହେଲେ ନୂଆଗଡ ଗ୍ରାମର ଜଗନ୍ନାଥ ସାହୁ, ବଡପଦାର ସାଧୁ କର, ବାରଡାଙ୍ଗର ସୁରେଶ ରଇତ, ଲିଜାମଣି ରଇତ, ଆବାଡାର ଗାୟ ଶବର, ଅଶୋକ ଶବର, ଜଲାଙ୍ଗ ଗ୍ରାମର ତ୍ରିବେଣୀ ରଇତ, କେରେଡାଙ୍ଗ ଗ୍ରାମର ଇସୁଦାନ କରାଡ, ତରଜସିଂ ଗ୍ରାମର ଗାୟତ୍ରୀ ମଣ୍ଡଳ। ଅନ୍ୟଜଣଙ୍କ ପରିଚୟ ମିଳିପାରିନାହିଁ। ପ୍ରାଥମିକ ଚିକିତ୍ସା ପରେ ସେମାନଙ୍କ ମଧ୍ୟରୁ ଜଗନ୍ନାଥ ସାହୁ ଏବଂ ଅଟୋ ଚାଳକ ସାଧୁ କରଙ୍କୁ ବ୍ରହ୍ମପୁର ସ୍ଥାନାନ୍ତର କରାଯାଇଥିବା ବେଳେ ଅନ୍ୟ ୮ ଆହତଙ୍କୁ ପାରଳାଖେମୁଣ୍ଡି ମେଡିକାଲ୍କୁ ପଠାଯାଇଛି। ଆର.ଉଦୟଗିରି ପୋଲିସ ଅଟୋ ଜବତ କରିବା ସହ ମୃତଦେହ ବ୍ୟବଚ୍ଛେଦ ନିମନ୍ତେ ପାରଳାଖେମୁଣ୍ଡି ମେଡିକାଲ୍ ପଠାଇଛି।