ବ୍ରହ୍ମପୁର,୩୧ା୧୨ (ସୁବାସ ଚନ୍ଦ୍ର ପାଢ଼ୀ)ସରକାରୀ ରେଳବାଇ ପୋଲିସ (ଜିଆରପି) ପୃଥକ ପୃଥକ ରେଳଧାରଣାରୁ ୩ ମୃତଦେହ ଜବତ କରିଛି। ଦୁଇଜଣଙ୍କର ପରିଚୟ ସ୍ପଷ୍ଟ ହୋଇଛି। ଅନ୍ୟ ଜଣଙ୍କର ପରିଚୟ ମିଳିନାହିଁ। ଶୁକ୍ରବାର ଛତ୍ରପୁର ରେଳଷ୍ଟେସନ ନିକଟରୁ ଜଣେ ଯୁବକଙ୍କ ମୃତଦେହ ପୋଲିସ ଜବତ କରିଥିଲା। ମୃତକଙ୍କ ପକେଟରୁ ମିଳିଥିବା ମୋବାଇଲ ଫୋନରେ ପୋଲିସ ତାଙ୍କ ଘର ଲୋକଙ୍କୁ ଜଣାଇଥିଲା। ଯୁବକ ଜଣଙ୍କ ଭଦ୍ରକ ଜିଲା ବାସୁଦେବପୁର ଥାନା ବରୁଆଁର ତନ୍ମୟ ମଲିକ (୩୫)। ମୃତକଙ୍କ ଭାଇ ଶଶାଙ୍କ ଶେଖର ମଲିକ ଏମକେସିଜି ମେଡିକାଲରେ ପହଞ୍ଚି ମୃତଦେହ ଚିହ୍ନଟ କରିଥିଲେ। କିଛିମାସ ତଳେ ତନ୍ମୟ କାମ କରିବା ପାଇଁ ଆନ୍ଧ୍ରର ଅଙ୍ଗୁଲ ଯାଇଥିଲେ। ସେ ଅନ୍ତ୍ୟୋଦୟ ଏକ୍ସପ୍ରେସ ଟ୍ରେନରେ ଭଦ୍ରକ ଫେରୁଥିଲେ। ତାଙ୍କ ସହ ଗୌରାଙ୍ଗ ତରାଇ ନାମକ ଜଣେ ଯୁବକ ଉକ୍ତ ଟ୍ରେନରେ ଯାତ୍ରା କରୁଥଲେ। ତନ୍ମୟ ଟ୍ରେନର ଦ୍ୱାର ଦେଶରେ ଠିଆ ହୋଇଥିବା ବେଳେ ଅସାବଧାନତା ଯୋଗୁଁ ଖସିପଡିଥିଲେ। ଫଳରେ ତାଙ୍କର ମୃତ୍ୟୁ ଘଟିଥିଲା। ପୋଲିସ ମୃତଦେହ ଜବତ କରି ନଂ.୯୦/୨୩ ରେ ଅପମୃତ୍ୟୁ ମାମଲା ରୁଜୁ କରିଛି। ସେହିପରି ବ୍ରହ୍ମପୁର ନିକଟ ଖୋଡାସିଂ ରେଳଧାରଣାରୁ ଜଣେ ଲୋକଙ୍କ ମୃତଦେହ ପୋଲିସ ଜବତ କରିଛି। ମୃତ ବ୍ୟକ୍ତି ଜଣଙ୍କ ଗୋପାଳପୁର ଥାନା ଡୁରା ଗ୍ରାମର କେ. ଗୌରୀ ଶଙ୍କର ରେଡ୍ଡୀ(୫୮)। ସେ ମାଲକାନଗିରି ଜିଲାପାଳ କାର୍ଯ୍ୟାଳୟରେ କିରାଣୀ କାମ କରୁଥିଲେ। କୌଣସି କାମରେ ସେ ଭୁବନେଶ୍ୱର ଆସିଥିବା ବେଳେ ଗତ ୨୮ ତାରିଖ ସକାଳେ ତାଙ୍କ ଘର ଲୋକଙ୍କ ସହ କଥାବାର୍ତ୍ତା ହୋଇଥିଲେ। ତାଙ୍କ ନିକଟରୁ ବିଶାଖା ଏକ୍ସପ୍ରେସ ଭୁବନେଶ୍ୱରରୁ ବ୍ରହ୍ମପୁର ଟ୍ରେନ ଟିକେଟ ମିଳିଛି। କେ. ମୋହନ ରେଡ୍ଡୀ ତାଙ୍କ ଭାଇଙ୍କ ମୃତଦେହ ଚିହ୍ନଟ କରିଛନ୍ତି। ଟ୍ରେନରୁ ଖସିପଡି ମୃତ୍ୟୁ ହୋଇଥିବା ପୋଲିସ ଅନୁମାନ କରୁଛି। ପୋଲିସ ନଂ.୯୧/୨୩ ରେ ଏକ ଅପମୃତ୍ୟୁ ମାମଲା ରୁଜୁ କରିଛି। ସେହିପରି ଛତ୍ରପୁର -ଗଞ୍ଜାମ ମଧ୍ୟ ରେଳଧାରଣରୁ ଜଣେ ଯୁବକଙ୍କ ମୃତଦେହ ପୋଲିସ ଜବତ କରିଛି। ମୃତକଙ୍କ ବୟସ ଆନୁମାନିକ ୪୦ରୁ ୪୨ ବର୍ଷ ହେବ ବୋଲି ପୋଲିସ କହିଛି। ଏ ସଂକ୍ରାନ୍ତରେ ଥାନାରେ ନଂ.୯୨/୨୩ ରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି। ପରିଚୟ ମିଳିନ
ଥିବାରୁ ମୃତଦେହ ସଂରକ୍ଷିତ ରଖାଯାଇଛି ବୋଲି ପୋଲିସ କହିଛି।