ଆସିକା,୬ା୮(ଡି.ଏନ୍.ଏ.)- ଆସିକା ବ୍ଲକ୍, ତହସିଲ୍, ଥାନା, ଡାକ୍ତରଖାନାରୁ ପୂର୍ବରୁ କରୋନା ପଜିଟିଭ ଚିହ୍ନଟ ହୋଇଥିବାବେଳେ ଏବେ ସବ୍ଜେଲରେ ପହଞ୍ଚତ୍ଛି ସଂକ୍ରମଣ। ଆସିକା ସବ୍ଜେଲରେ ମଙ୍ଗଳବାର କର୍ମଚାରୀଙ୍କ ସ୍ବାବ୍ ସଂଗ୍ରହ କରାଯାଇଥିଲା। ଗୁରୁବାର ୨ଜଣଙ୍କ ରିପୋର୍ଟ ପଜିଟିଭ ଆସିଛି। ଗୁରୁବାର ପୁଣି ୧୬ ଜେଲ୍ କର୍ମଚାରୀଙ୍କ ଆଣ୍ଟିଜେନ୍ ଟେଷ୍ଟ ପରେ ଜଣେ ପଜିଟିଭ ଚିହ୍ନଟ ହୋଇଛନ୍ତି। ସମ୍ପୃକ୍ତ କର୍ମଚାରୀଙ୍କ ସସ୍ପର୍ଶରେ ଆସି ପରିବାରର ୨ ସଦସ୍ୟ ମଧ୍ୟ ସଂକ୍ରମିତ ହୋଇଥିବା ପରୀକ୍ଷାରୁ ଜଣାପଡିଛି। ଗତ ୨୮ ତାରିଖରେ କରୋନା ଲକ୍ଷଣ ଦେଖାଯିବା ପରେ ଡାକ୍ତରଖାନାକୁ ଚିକିତ୍ସା ଲାଗି ଯାଇଥିବା ଜଣେ କର୍ମଚାରୀ ମଧ୍ୟ ପଜିଟିଭ୍ ଚିହ୍ନଟ ହୋଇଥିଲେ। ଅଦ୍ୟାବଧି ଜେଲର ୪ କର୍ମଚାରୀ ଓ ୨ ପରିବାର ସଦସ୍ୟ ସଂକ୍ରମିତ ହୋଇଥିବା ଜେଲ୍ ଅଧୀକ୍ଷକ ଦିଲ୍ଲୀପ କୁମାର ଜେନା ସୂଚନା ଦେଇଛନ୍ତି। ତେବେ ଆସିକା ସବ୍ଜେଲରେ ଗୁରୁବାର ୧୪୮ ବିଚାରାଧିନ ବନ୍ଦୀ ରହିଥିବାବେଳେ ସେମାନଙ୍କ ଠାରେ କୌଣସି ଲକ୍ଷଣ ଦେଖାଯାଉନାହିଁ। ତେବେ ଜେଲ ଅନ୍ତେବାସୀଙ୍କ କୋଭିଡ୍ ଟେଷ୍ଟ ଲାଗି ପୂର୍ବରୁ ବିଭାଗୀୟ ଉଚ୍ଚ ଅଧିକାରୀ ଓ ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ଗୁରୁବାର କର୍ମଚାରୀଙ୍କ ମଧ୍ୟରେ ସଂକ୍ରମିତ ଚିହ୍ନଟ ପରେ ଅନ୍ତେବାସୀଙ୍କ ପରୀକ୍ଷା ଲାଗି ପୁଣି ସ୍ଥାନୀୟ ପ୍ରଶାସନିକ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିବା ଅଧିକ୍ଷକ କହିଛନ୍ତି।