ମାଲକାନଗିରି,୯ା୮(ଡି.ଏନ୍.ଏ.): ବାଲିମେଳା ମୁଖ୍ୟ ରାସ୍ତାର ଏମ୍ଭି-୩୭ଠାରେ ରବିବାର ପୋଲ ଉପରେ ପ୍ରାୟ ୩ ଫୁଟ ଉପରେ ପାଣି ଚାଲୁଥିବାର ଦେଖିବାକୁ ମିଳିଛି। ତେବେ ଉପର ମୁଣ୍ଡରୁ ପାଣି ଅତ୍ୟଧିକ ମାତ୍ରାରେ ଆସୁଥିବା ହେତୁ ବନ୍ୟାଜଳ ପୋଲ ଉପରେ ଚାଲୁଛି। ଫଳରେ ବାଲିମେଳା ଏବଂ ମାଲକାନଗିରିକୁ ଯାତାୟାତ ସମ୍ପୂର୍ଣ୍ଣ ବନ୍ଦ ରହିଛି। ତେବେ ଗତ ୩ ବର୍ଷରୁ ଊଦ୍ଧର୍ବ ସମୟ ଧରି ପୋଲ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲେ ସୁଦ୍ଧା ଶେଷ ହେଉନି। ତେଣୁ ପ୍ରତିବର୍ଷ ବର୍ଷାଦିନେ ଏପରି ସମସ୍ୟା ହେଉଥିବା ଦେଖିବାକୁ ମିଳୁଛି। ବନ୍ୟାଜଳ ପୋଲ ଉପରେ ପ୍ରବାହିତ ହେବା ଫଳରେ ପୋଲର ଦୁଇ ପାର୍ଶରେ ମାଲବାହୀ ଗାଡ଼ି ଏବଂ ଦୁଇ ଚକିଆ ଯାନ ବହୁ ସଂଖ୍ୟାରେ ଠିଆ ହୋଇ ରହିଥିବା ଦେଖିବାକୁ ମିଳିଛି। ତେବେ ୧୨ ତାରିଖ ଯାଏ ଜିଲାରେ ପ୍ରବଳ ବର୍ଷା ସମ୍ଭାବନା ଥିବା ପାଣିପାଗ ବିଭାଗ ପକ୍ଷରୁ ସୂଚନା ମିଳିଛି। ତେଣୁ ଆଗକୁ ଅଧିକ ବର୍ଷା ହେଲେ ତଳିଆ ଅଞ୍ଚଳରେ ଥିବା ଘର ଏବଂ ଚାଷ ଜମି ଧୋଇ ହୋଇଯିବା ନେଇ ଆଶଙ୍କା କରାଯାଉଛି। ତେଣୁ ଏଭଳି ସମସ୍ୟା ଉପୁଜୁଥିବା ହେତୁ ପୋଲ ନିର୍ମାଣ କାର୍ଯ୍ୟ ଶୀଘ୍ର ଶେଷ କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି।
