ନୟାଗଡ଼ ଅଫିସ,୨୨।୫: ନୟାଗଡ଼ ସହରର ବିଜୁ ମାର୍କେଟର ମଣ୍ଡଳ ଏଜେନ୍ସିର ଗୁଟ୍ଖା ଗୋଦାମ ସମେତ ୩ ଦୋକାନ ଉପରେ ଜିଏସ୍ଟି ଚଢ଼ାଉ କରିଛି। ଭୁବନେଶ୍ୱର ଓ ଜଟଣୀ ଜିଏସ୍ଟିର ଏନ୍ଫୋର୍ସମେଣ୍ଟର ୧୦ ଜଣିଆ ଟିମ୍ ଏହି ଚଢ଼ାଉ କରି ଟିକସ ଫାଙ୍କିର ଯାଞ୍ଚ କରିଥିଲେ। ତେବେ ଜିଏସ୍ଟି ଯାଞ୍ଚକୁ ଗୋଦାମର କେତେଜଣ କର୍ମଚାରୀ ବିରୋଧ କରି ପାଟିତୁଣ୍ଡ କରିଥିଲେ। ଏହାକୁ ନେଇ ସେଠାରେ କିଛି ସମୟ ଚାପା ଉତ୍ତେଜନା ଦେଖା ଦେଇଥିଲା। ଟିକସ ଫାଙ୍କୁଥିବାର ପ୍ରମାଣ ମିଳିବା ପରେ ଜିଏସ୍ଟିର ଏନ୍ଫୋର୍ସମେଣ୍ଟ ଟିମ୍ ୩ ଗୋଦାମ ସହ ଗୁଟ୍ଖା ଦୋକାନକୁ ସିଲ୍ କରି ତଦନ୍ତ ଜାରି ରଖିଛି।