ରାଜନଗର,୧ା୧(ଡି.ଏନ.ଏ.): ନୂଆବର୍ଷରେ ଭିତରକନିକା ଜାତୀୟ ଉଦ୍ୟାନରୁ ବାର୍ହା ଶିକାର କରାଯାଇ ମାଂସ ଚାଲାଣ କରାଯାଉଥିଲା। ଖବରପାଇ ଶନିବାର ସକାଳ ପ୍ରାୟ ସାଢ଼େ ୭ଟାରେ କନିକା ରେଞ୍ଜ ଅଫିସର ମାନସ କୁମାର ଦାସଙ୍କ ନେତୃତ୍ୱରେ ଫରେଷ୍ଟର କପିଳେନ୍ଦ୍ର ପ୍ରଧାନ, ଫରେଷ୍ଟ ଗାର୍ଡ ସୁନିଲ ରଞ୍ଜନ ରାଉତରାୟ, ଶ୍ରୀରାମ ମୁର୍ମୁଙ୍କ ସହିତ ବନ କର୍ମଚାରୀ ଖୋଳା ଚେକ୍ ଗେଟ୍ରେ ଜଗି ରହିଥିଲେ। ଡାଙ୍ଗମାଳ ପଟୁ ଆସୁଥିବା ବୋଲେରୋ(ନଂ. ଓଡି ୦୫ ଏପି ୩୭୯୬)କୁ କର୍ମଚାରୀମାନେ ଅଟକାଇ ତନଖି କରିବା ପରେ ଜରିରେ ଗୁଡା ହୋଇ ରଖାଯାଇଥିବା ୧୧ କେଜି ବାର୍ହା ମାଂସ ଜବତ କରିଥିଲେ। ଏହି ଘଟଣାରେ ବୋଲେରୋ ଡ୍ରାଇଭର ବାଙ୍କୁଆଳ ଗାଁର ଦୁର୍ଗା ଚରଣ ପାଢୀଙ୍କ ସହିତ ବରାଡିଆ ଗାଁର ଗୌରାଙ୍ଗ ସେଠୀ ଓ ପଟ୍ଟାମୁଣ୍ଡାଇ ଥାନା ବଡଝରିଆ ଗାଁର ସୁଶାନ୍ତ ଦାସଙ୍କୁ ବନବିଭାଗ ଗିରଫ କରି କୋର୍ଟ ଚାଲାଣ କରିଛି।
ଗୌରାଙ୍ଗ ଜଣେ ନିୟମିତ ଶିକାରୀ। ନୂଆ ବର୍ଷରେ ମାଂସର ଚାହିଦା ଥିବାରୁ ଭିତରକନିକା ଜାତୀୟ ଉଦ୍ୟାନରେ ପଶି ସେ ଶୁକ୍ରବାର ରାତିରେ ବାର୍ହା ଶିକାର କରିଥିଲେ। ଶିକାର ପରେ ମାଂସକୁ ବୋଲେରୋରେ ପଟ୍ଟାମୁଣ୍ଡାଇ ଓ ଆଳି ନିଆଯାଉଥିଲା। କେଜି ପ୍ରତି ୫ଶହ ଟଙ୍କାରେ ମାଂସ ବିକ୍ରି ହୋଇଥାଆନ୍ତା ବୋଲି ଗୌରାଙ୍ଗ କହିଛନ୍ତି ।
