ଭୁବନେଶ୍ୱର,୩।୧୧(ବ୍ୟୁରୋ): ରାଜ୍ୟକୁ କ୍ରୀଡ଼ା ହବ୍ରେ ପରିଣତ କରିବାକୁ ସରକାର ଉଦ୍ୟମ ଜାରି ରଖିଛନ୍ତି। ଏହିକ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସୋମବାର ଭିଡିଓ କନଫରେନ୍ସ ଜରିଆରେ ୩ଟି କ୍ରୀଡ଼ା ଭିତ୍ତିଭୂମିକୁ ଉଦ୍ଘାଟନ କରିଛନ୍ତି। ଗଞ୍ଜାମ ଜିଲାର ହିଞ୍ଜିଳିକାଟୁରେ ଇନ୍ଡୋର ଷ୍ଟାଡିୟମ୍, ଛତ୍ରପୁରରେ ୩ଟି ବ୍ୟାଡମିଣ୍ଟନ କୋର୍ଟ ସହିତ ୩ଟି ଇନ୍ଡୋର ଷ୍ଟାଡିୟମ୍ ଏବଂ ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ୧୦ ମିଟର ଏବଂ ୫୦ ମିଟର ଶୁଟିଂ ରେଞ୍ଜକୁ ଲୋକାର୍ପିତ କରିଛନ୍ତି। ସେହିପରି ହକି କ୍ରୀଡ଼ାକୁ ପ୍ରୋତ୍ସାହନ ଦେବା ଲାଗି ଛତ୍ରପୁରଠାରେ ଏକ ସିନ୍ଥେଟିକ ଟର୍ଫ ହକି ତାଲିମ କେନ୍ଦ୍ର ସ୍ଥାପନ କରାଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି। ଶୁଟିଂ ରେଞ୍ଜ ଆଦିତ୍ୟ ବିର୍ଲା ଗ୍ରୁପ ଦ୍ୱାରା ବିକଶିତ କରାଯାଇଛି।
ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ, ୫ଟି ଅଭିନବ ପ୍ରୟାସ ଭଳି ଆଗାମୀ ଦିନରେ କ୍ରୀଡ଼ାର ବିକାଶ ପାଇଁ ଏକ ବୈପ୍ଳବିକ ପରିବର୍ତ୍ତନ କରାଯିବ। ଉନ୍ନତମାନର ପ୍ରଶିକ୍ଷଣ ଏବଂ ଭିତ୍ତିଭୂମି ଆମ ରାଜ୍ୟର କ୍ରୀଡ଼ାବିତ୍ମାନଙ୍କୁ ରାଜ୍ୟ ତଥା ଦେଶର ଗୌରବ ବଢ଼ାଇବାରେ ସହାୟତା କରିବ। ଆସନ୍ତା ଦଶନ୍ଧିଗୁଡ଼ିକରେ ରାଜ୍ୟରୁ ନୂଆ ପିଢ଼ିର ବିଶ୍ୱସ୍ତରୀୟ କ୍ରୀଡ଼ାବିତ୍ ସୃଷ୍ଟି ହେବେ। ହିଞ୍ଜିଳିକାଟୁ ରାଜ୍ୟର ଏକ ଉତ୍ତମ ଇନ୍ଡୋର ଷ୍ଟାଡିୟମ ଭାବେ ପରିଚିତ ହୋଇଛି। ସେହି ଅଞ୍ଚଳରେ ବ୍ୟାଡମିଟନ କୋର୍ଟ ସହିତ ଟେବୁଲ ଟେନିସ, ଯୋଗ, ଜିମ୍, ଫିଜିଓଥେରାପି ଭିତ୍ତିଭୂମି କ୍ରୀଡ଼ାବିତ୍ମାନଙ୍କୁ ସହାୟତା କରିବ। ଏହି ଷ୍ଟାଡିୟମ ୧୧ କୋଟି ଟଙ୍କା ବ୍ୟୟରେ ନିର୍ମାଣ କରାଯାଇଛି। ଛତ୍ରପୁର ଇନ୍ଡୋର ଷ୍ଟାଡିୟମରେ ୩ଟି ବ୍ୟାଡମିଣ୍ଟନ କୋର୍ଟ ରହିଛି। ଛତ୍ରପୁର ଏକ ବୃହତ କ୍ରୀଡ଼ା ସେଣ୍ଟରରେ ପରିଣତ ହୋଇଛି।
ସେହିପରି କଳିଙ୍ଗ ଷ୍ଟାଡିୟମ ପରିସରରେ ଉନ୍ନତମାନର ‘ଓଡ଼ିଶା ଆଦିତ୍ୟ ବିର୍ଲା- ଗଗନ ନାରଙ୍ଗ ଶୁଟିଂ ହାଇ ପରଫରମାନ୍ସ ସେଣ୍ଟର’ ରହିଛି। ଏଥିରେ ୨୨ ଲେନ୍ ୧୦ ମିଟର ରେଞ୍ଜରେ ୧୦ ଇଲେକ୍ଟ୍ରିକାଲ ଲେନ୍ ଓ ୧୨ ମାନୁଆଲ ଲେନ୍ ଲକ୍ଷ୍ୟ ଭେଦ ରହିଛି। ଏକାସଙ୍ଗରେ ୬୦ କ୍ରୀଡ଼ାବିତଙ୍କୁ ଦୈନିକ ପ୍ରଶିକ୍ଷଣ ଦିଆଯାଇପାରିବ। ପୂର୍ବ ଭାରତର ଏକ ଉତ୍ତମ ଷ୍ଟାଡିୟମ ମଧ୍ୟରୁ ଏହା ଅନ୍ୟତମ। ରାଜ୍ୟ ବାହାରୁ ମଧ୍ୟ କ୍ରୀଡ଼ାବିତମାନେ ପ୍ରଶିକ୍ଷଣ ନେବାକୁ ଆସିବେ। ଏହି ଉଦ୍ଘାଟନୀ କାର୍ଯ୍ୟକ୍ରମରେ କ୍ରୀଡ଼ା ମନ୍ତ୍ରୀ ତୁଷାରକାନ୍ତି ବେହେରା, ମୁଖ୍ୟ ଶାସନ ସଚିବ ଅସିତ କୁମାର ତ୍ରିପାଠୀ, ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ତଥା ୫-ଟି ସଚିବ ଭି. କେ. ପାଣ୍ଡିଆନ, ନ୍ୟାଶନାଲ ରାଇଫଲ ଫେଡେରେଶନ ଅଫ ଇଣ୍ଡିଆର ବରିଷ୍ଠ ଉପ ସଭାପତି କଳିକେଶ ନାରାୟଣ ସିଂଦେଓ, ଉନ୍ନୟନ କମିଶନର ସୁରେଶ ଚନ୍ଦ୍ର ମହାପାତ୍ର, କ୍ରୀଡ଼ା ସଚିବ ବିଶାଳ ଦେବ ପ୍ରମୁଖ ଯୋଗ ଦେଇଥିଲେ। ଗଞ୍ଜାମରୁ ବ୍ରହ୍ମପୁର ଏମ୍ପି ଚନ୍ଦ୍ରଶେଖର ସାହୁ ଏବଂ ଆସ୍କା ଏମ୍ପି ପ୍ରମିଳା ବିଶୋଇ ଯୋଗ ଦେଇଥିଲେ।