ନୂଆଦିଲ୍ଲୀ, ୨୪।୭: କ୍ରିକେଟ୍ ଖେଳରେ ଟେଷ୍ଟ ମ୍ୟାଚ୍ ସବୁଠାରୁ ଚ୍ୟାଲେଞ୍ଜପୂର୍ଣ୍ଣ ଫର୍ମାଟ୍। ସାଧାରଣତଃ ଗୋଟିଏ ଟେଷ୍ଟ ମ୍ୟାଚ୍ ୫ ଦିବସୀୟ ହୋଇଥିବାବେଳେ ପ୍ରତ୍ୟେକ ଦିନ ୯୦ ଓଭର ଖେଳ ହୋଇଥାଏ। ତେଣୁ ଟେଷ୍ଟ କ୍ରିକେଟର୍ଙ୍କ ସହନଶୀଳତା ଅବିଶ୍ୱସନୀୟ ରହିଥାଏ। ଯେପରିକି ଦ୍ରୁତ ବୋଲରମାନେ ଲମ୍ବା ଦୂରତାରୁ ଦୌଡ଼ି ଲମ୍ବା ସ୍ପେଲ୍ ଧରି ବୋଲିଂ କରିଥାନ୍ତି। ସେହିଭଳି ବ୍ୟାଟ୍ସମ୍ୟାନମାନେ ଧୌର୍ଯ୍ୟର ସହ ନିରନ୍ତର ଭାବେ ଏକାଗ୍ରତା ରଖି ବ୍ୟାଟିଂ କରିବା ସହ ବୋଲରଙ୍କୁ ନିରାଶ କରିଥାନ୍ତି। ତେବେ ଫିଟ୍ନେସ ସମସ୍ୟା ଲାଗି ଅଧିକାଂଶ କ୍ରିକେଟର୍ ସବୁ ଟେଷ୍ଟରେ ଖେଳିପାରି ନ ଥାନ୍ତି। ଆଘାତଜନିତ ସମସ୍ୟା ଯୋଗୁ ଅଧିକାଂଶ ସମୟ ସେମାନଙ୍କୁ ଦଳରୁ ବାହାରେ ବସିବାକୁ ପଡ଼ିଥାଏ। ତେବେ ଏମିତି କିଛି କ୍ରିକେଟର୍ ରହିଛନ୍ତି ଯେଉଁମାନେ ବିନା ବିଶ୍ରାମରେ କ୍ରମାଗତ ଭାବେ ଟେଷ୍ଟ ମ୍ୟାଚ୍ ଖେଳିବାର ରେକର୍ଡ କରିଛନ୍ତି।
ବିନା ବିଶ୍ରାମରେ ଭାରତ ପକ୍ଷରୁ ସର୍ବାଧିକ ମ୍ୟାଚ୍ ଖେଳିଥିବା ୩ ଜଣ ଖେଳାଳିଙ୍କ ସମ୍ପର୍କରେ ସଂକ୍ଷେପରେ ଆଲୋଚନା କରିବା।
ଏହି ତାଲିକାର ସର୍ବାଗ୍ରେ ରହିବେ କିମ୍ବଦନ୍ତୀ ଭାରତୀୟ ବ୍ୟାଟ୍ସମ୍ୟାନ ସୁନୀଲ ଗାଭାସ୍କର। ଲିଟିଲ୍ ମାଷ୍ଟର ଭାବେ ବିଶ୍ୱରେ ପରିଚିତ ଗାଭାସ୍କର ବିନା ବିଶ୍ରାମରେ ୧୦୬ ଟେଷ୍ଟ ମ୍ୟାଚ୍ ଖେଳିଛନ୍ତି। ସେ ୨୩ ଜାନୁୟାରୀ ୧୯୭୫ରୁ ୩ ଫେବ୍ରୁୟାରୀ ୧୯୮୭ ପର୍ଯ୍ୟନ୍ତ କ୍ରମାଗତ ଭାବେ ୧୦୬ଟି ଟେଷ୍ଟ ମ୍ୟାଚ୍ ଖେଳିଛନ୍ତି। ଜଣେ ଭାରତୀୟ ଖେଳାଳି ଭାବେ ଏହା ରେକର୍ଡ। ଏହି ସମୟ ମଧ୍ୟରେ ସେ ୮,୫୪୫ ରନ ସଂଗ୍ରହ କରିଥିଲେ। ଯେଉଁଥିରେ ୨୯ ଶତକ ଓ ୩୫ ଅର୍ଦ୍ଧଶତକ ସାମିଲ ରହିଛି। ଅବସର ପୂର୍ବରୁ ଗାଭାସ୍କର ବିଶ୍ୱର ପ୍ରଥମ କ୍ରିକେଟର୍ ଭାବେ ଟେଷ୍ଟ ଫର୍ମାଟ୍ରେ ୧୦ ହଜାର ରନ ସଂଗ୍ରହ କରିଥିଲେ। କ୍ରମାଗତ ଟେଷ୍ଟ ମ୍ୟାଚ୍ ଖେଳିଥିବା ଭାରତୀୟଙ୍କ ମଧ୍ୟରେ ଦ୍ୱିତୀୟ ସ୍ଥାନରେ ରାହୁଲ ଡ୍ରାଭିଡ୍ ରହିଛନ୍ତି। ଡ୍ରାଭିଡ୍ ୨୦ ଜୁନ୍ ୧୯୯୬ରେ ଲଡର୍ସରେ ଟେଷ୍ଟ ପଦାର୍ପଣ କରିଥିଲେ। ଏହାପରଠାରୁ ସେ ବିଶ୍ରାମ ନ ନେଇ ୧୦ ଡିସେମ୍ବର ୨୦୦୫ ପର୍ଯ୍ୟନ୍ତ ୯୩ ଟେଷ୍ଟ ମ୍ୟାଚ୍ ଖେଳିଥିଲେ। ଏହି ସମୟ ମଧ୍ୟରେ ସେ ୫୭.୧୬ ଆଭରେଜରେ ୮,୦୦୩ ରନ ସଂଗ୍ରହ କରିଥିଲେ। ଯାହା ମଧ୍ୟରେ ୨୦ ଶତକ ଓ ୩୯ ଅର୍ଦ୍ଧଶତକ ସାମିଲ ରହିଥିଲା। ଏହି ସମୟ ମଧ୍ୟରେ ସେ ନିଜ ଟେଷ୍ଟ କ୍ୟାରିୟରର ସର୍ବାଧିକ ସ୍କୋର (୨୭୦ ବନାମ ପାକିସ୍ତାନ) ମଧ୍ୟ ହାସଲ କରିଥିଲେ। ଏହି ତାଲିକାର ଅନ୍ତିମ ତଥା ୩ୟ ସ୍ଥାନରେ ରହିଛନ୍ତି ଗୁଣ୍ଡାପ୍ପା ବିଶ୍ୱନାଥ। ମହୀସୂର ଜନ୍ମିତ ବିଶ୍ୱନାଥ କ୍ୟାରିୟରରେ ମୋଟ୍ ୯୧ ଟେଷ୍ଟ ମ୍ୟାଚ୍ ଖେଳିଛନ୍ତି। କିନ୍ତୁ ସେଥିମଧ୍ୟରୁ ସେ ୮୭ଟି ଟେଷ୍ଟ ମ୍ୟାଚ୍ ବିନା ବିଶ୍ରାମରେ ୧୯ ମାର୍ଚ୍ଚ ୧୯୭୧ରୁ ୩୦ ଜାନୁୟାରୀ ୧୯୮୩ ପର୍ଯ୍ୟନ୍ତ କ୍ରମାଗତ ଭାବେ ଖେଳିଥିଲେ। ଏହି ପିରିୟଡ଼ରେ ସେ ୧୩ ଶତକ ଓ ୩୩ ଅର୍ଦ୍ଧଶତକ ସହାୟତାରେ ୫,୭୪୬ ରନ କରିଥିଲେ।