ସୁନ୍ଦରଗଡ଼/ରାଜଗାଙ୍ଗପୁର,୧୭/୮(ଜୟନାରାୟଣ ମେଣ୍ଡୁଳି/ଅଶୋକ ପାଣି): ସୁନ୍ଦରଗଡ଼ ଜିଲା ରାଜଗାଙ୍ଗପୁର ବସ୍ଷ୍ଟାଣ୍ଡ ଡେଲି ମାର୍କେଟଠାରେ ଥିବା ଆଇସିଆଇସିଆଇ ବ୍ୟାଙ୍କ ସମ୍ମୁଖରେ ଗୁରୁବାର କ୍ୟାଶ ଭ୍ୟାନ୍ରେ ଟଙ୍କା ଲୋଡ୍ କରୁଥିବା ବେଳେ ଘଟିଛି ଅଘଟଣ। ସୁରକ୍ଷାକର୍ମୀଙ୍କ ଅସାବଧାନତା ଯୋଗୁ ବନ୍ଧୁକରୁ ଗୁଳି ଫୁଟି ୩ଜଣ ଆହତ ହୋଇଛନ୍ତି। ଆହତମାନଙ୍କୁ ଉଦ୍ଧାର କରାଯାଇ ପ୍ରଥମେ ରାଜଗାଙ୍ଗପୁର ଗୋଷ୍ଠୀ ଚିକିତ୍ସା କେନ୍ଦ୍ରକୁ ନିଆଯାଇଥିଲା। ମାତ୍ର ସେମାନଙ୍କ ଅତ୍ୟଧିକ ରକ୍ତସ୍ରାବ ହେଉଥିବାରୁ ରାଉରକେଲା ଆର୍ଜିଏଚ୍କୁ ପଠାଯାଇଛି। ଖବର ପାଇ ରାଜଗାଙ୍ଗପୁର ଥାନା ପୋଲିସ ଓ ସୁନ୍ଦରଗଡ଼ରୁ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଆହତମାନେ ହେଉଛନ୍ତି ରାଜଗାଙ୍ଗପୁର ଶାନ୍ତି ନଗରର ଅନୁରାଗ ତନ୍ତୀ, ଜାମପାଲିର ସୀତା ଲାକ୍ରା ଓ ଜଣେ ଠେଲା ବାଲା ଏମ୍ଡି ଇଲିଆସ। ଆଜି ପୂର୍ବାହ୍ନରେ ଏହି ବ୍ୟାଙ୍କରୁ କ୍ୟାଶ ଭ୍ୟାନରେ ଟଙ୍କା ଲୋଡ ହୋଇ ରାଉରକେଲା ଯିବାକୁ ଥିବା ବେଳେ ବ୍ୟାଙ୍କର ଜଣେ ସୁରକ୍ଷାକର୍ମୀ ରଣଜିତ ସିଂଙ୍କ ଡବଲ ବ୍ୟାରେଲ ବନ୍ଧୁକର ଟ୍ରିଗର ଅସାବଧାନତା ବଶତଃ ଟିପି ହୋଇଯିବାରୁ ଗୁଳି ଫୁଟିଥିବା ନେଇ ସହଯୋଗୀ ସୁରକ୍ଷାକର୍ମୀ ପ୍ରକାଶ କରିଛନ୍ତି।