ନୂଆଦିଲ୍ଲୀ,୨୪।୯(ପି.ଟି.): ପାର୍ଲାମେଣ୍ଟରେ ବୁଧବାର ୩ଗୋଟି ଶ୍ରମ ସଂସ୍କାର ବିଲ୍କୁ ଅନୁମୋଦନ ମିଳିଛି। ଏହି ବିଲ୍ କମ୍ପାନୀଗୁଡ଼ିକର ପ୍ରତିବନ୍ଧକକୁ ଦୂର କରିବ। ଏଥିସହ ଯେଉଁ କମ୍ପାନୀରେ ୩୦୦ ପର୍ଯ୍ୟନ୍ତ ସଂଗଠିତ ଶ୍ରମିକ କାର୍ଯ୍ୟ କରୁଥିବେ ଛଟେଇ ସମୟରେ ସରକାରଙ୍କ ଅନୁମତି ନେବାକୁ ପଡ଼ିବ ନାହିଁ। ଯାହାଦ୍ୱାରା କମ୍ପାନୀଗୁଡ଼ିକ ଅଧିକ ପୁଞ୍ଜି ନିବେଶ ପ୍ରତି ଆଗ୍ରହ ପ୍ରକାଶ କରିବା ସହ କର୍ମନିଯୁକ୍ତି ସୃଷ୍ଟି ହୋଇପାରିବ। ମଙ୍ଗଳବାର ଲୋକ ସଭାରେ ଅକୁପେଶନାଲ ସେଫ୍ଟି, ହେଲ୍ଥ ଆଣ୍ଡ ଓ୍ବାର୍କିଂ କଣ୍ଡିଶନସ୍ କୋଡ୍-୨୦୨୦, ଇଣ୍ଡଷ୍ଟ୍ରିୟାଲ ରିଲେଶନ କୋଡ ବିଲ୍-୨୦୨୦ ଏବଂ ସାମାଜିକ ସୁରକ୍ଷା ବିଲ୍-୨୦୨୦ଗୃହୀତ ହୋଇଥିଲା। ବୁଧବାର ରାଜ୍ୟ ସଭାରେ କଂଗ୍ରେସ ସମେତ ଟିଏମ୍ସି ଏବଂ ବାମଦଳ ଗୁଡ଼ିକ ଗୃହତ୍ୟାଗ କରିଥିବା ସତ୍ତ୍ୱେ ଧ୍ୱନି ମତରେ ଉକ୍ତ ୩ ବିଲ୍କୁ ପାରିତ କରାଯାଇଛି। ଉଭୟ ଗୃହରେ ବିଲ୍ ପାରିତ ହୋଇଥିବାରୁ ଏହାକୁ ସଂସଦର ଅନୁମୋଦନ ମିଳିଛି। ୨୯ କେନ୍ଦ୍ରୀୟ ଶ୍ରମ ଆଇନ ମିଶ୍ରଣରେ ୪ଟି ଶ୍ରମ କୋର୍ଡ ଗଠନ ହୋଇଛି। ସରକାର ଆଣିଥିବା ନୂଆ ଶ୍ରମ ସଂସ୍କାର ବିଲ୍ରେ ଇଜ୍ ଅଫ୍ ଡୁଇଙ୍ଗ ବିଜ୍ନେସ ଏବଂ ଶ୍ରମିକଙ୍କୁ ସାମାଜିକ ସୁରକ୍ଷା ପ୍ରଦାନ ଉପରେ ଗୁରୁତ୍ୱ ଦିଆଯାଇଛି। ରାଜ୍ୟ ସଭାରେ ଏହି ବିଲ୍ ଉପରେ ହୋଇଥିବା ଆଲୋଚନାରେ ଭାଗ ନେଇ ଶ୍ରମ ମନ୍ତ୍ରୀ ସନ୍ତୋଷ ଗଙ୍ଗଓ୍ବାର କହିଥିଲେ ଯେ, ବ୍ୟବସାୟିକ ବ୍ୟବସ୍ଥାରେ ସ୍ବଚ୍ଛତା ପାଇଁ ଶ୍ରମ ଆଇନରେ ସଂସ୍କାର ଅଣାଯାଇଛି। ଦେଶର ପ୍ରାୟ ୧୬ଟି ରଜ୍ୟରେ ୩୦୦ କର୍ମଚାରୀ ଥିବା କମ୍ପାନୀଗୁଡ଼ିକ ସରକାରଙ୍କ ବିନା ଅନୁମତିରେ ଶ୍ରମିକ ଛଟେଇ ବ୍ୟବସ୍ଥା ଲାଗୁ କରିଛନ୍ତି। ସରକାରଙ୍କ ବିନା ଅନୁମତିରେ କମ୍ପାନୀଗୁଡ଼ିକରେ ଶ୍ରମିକମାନଙ୍କ ଛଟେଇ ସୀମା ୩୦୦କୁ ବୃଦ୍ଧି କରିବାକୁ ପାର୍ଲାମେଣ୍ଟର ଶ୍ରମ ସଂକ୍ରାନ୍ତ ଷ୍ଟାଣ୍ଡିଂ କମିଟି ସୁପାରିଶ କରିଥିଲା। ପୂର୍ବରୁ କମ୍ପାନୀଗୁଡ଼ିକ ସରକାରଙ୍କ ବିନା ଅନୁମତିରେ ୧୦୦ରୁ ଅଧିକ ଶ୍ରମିକ ନିଯୁକ୍ତି କରିପାରୁ ନ ଥିଲେ। ଫଳରେ ଅଣସଂଗଠିତ ନିଯୁକ୍ତି ବଢ଼ି ଚାଲିଥିଲା। ୨୦୧୯ ଅର୍ଥନୈତିକ ସର୍ଭେ ରିପୋର୍ଟ ଅନୁସାରେ ରାଜସ୍ଥାନରେ ନିଯୁକ୍ତି ସୃଷ୍ଟିରେ ଉନ୍ନତି ଆସିଥିବାବେଳେ କର୍ମଚାରୀ ଛଟେଇ ହ୍ରାସ ପାଇଥିଲା। ନୂତନ ଶ୍ରମ ସଂସ୍କାର ଆଇନ ହେବା ଦ୍ୱାରା ନିବେଶକଙ୍କୁ ବଡ଼ ଫ୍ୟାକ୍ଟ୍ରି ସ୍ଥାପନ କରିବାଲାଗି ଉତ୍ସାହିତ କରିବା ସହ ବୃହତ୍ ପରିମାଣରେ ନିଯୁକ୍ତି ସୃଷ୍ଟିର ସୁବିଧା ହୋଇପାରିବ ବୋଲି ଗଙ୍ଗଓ୍ବାର କହିଥିଲେ। ଏହି ବିଲ୍ ଶ୍ରମିକମାନଙ୍କ ସ୍ବାର୍ଥ ରକ୍ଷା କରିବା ସହ ସାର୍ବଜନିନ ସାମାଜିକ ସୁରକ୍ଷା ପ୍ରଦାନ କରିବାରେ ସହାୟକ ହେବ। ବିଶେଷକରି କର୍ମଚାରୀ ଭବିଷ୍ୟନିଧି ଏବଂ ରାଜ୍ୟ କର୍ମଚାରୀ ନିଗମର ସୁବିଧା କରିବ। ଏହା ଦ୍ୱାରା ଅଣସଂଗଠିତ କ୍ଷେତ୍ରରେ କାର୍ଯ୍ୟ କରୁଥିବା ପ୍ରାୟ ୪୦କୋଟି ଶ୍ରମିକମାନଙ୍କୁ ସାମାଜିକ ସୁରକ୍ଷା ପରିସରଭୂକ୍ତ କରାଯାଇପାରିବ। ଏହି ଆଲୋଚନାରେ ଭାଗ ନେଇ ବିଜେଡି ଏମ୍ପି ସୁବାସ ସିଂ କହିଥିଲେ ଯେ, ଏହି ନୂଆ ବିଲ୍ ଶ୍ରମିକ ଆନ୍ଦୋଳନ ନୀତିକୁ ପ୍ରଭାବ ଶୂନ୍ୟ କରିବା ସହ ନିଯୁକ୍ତିିଦାତାଙ୍କୁ ସୁହାଇବା ଭଳି କାର୍ଯ୍ୟ କରିବ। ତଥାପି ଏହି ବିଲ୍ରେ ଏକାଧିକ ଶ୍ରମିକ କଲ୍ୟାଣ ବ୍ୟବସ୍ଥା ରଖାଯାଇଛି ବୋଲି ସିଂ କହିଛନ୍ତି। ବିଲ୍କୁ ସମର୍ଥନ କରି ଜେଡିୟୁ ଏମ୍ପି ଆର୍.ସି.ପି ସିଂ କହିଥିଲେ ଯେ ଏହା ଉଭୟ ଶମିକ ଏବଂ ଶ୍ରମଦାତାଙ୍କ ଲାଗି ଫଳପ୍ରଦ ହେବ।