ବ୍ରହ୍ମପୁର ଅଫିସ,୨୨ା୫: ରେଳ ବିଭାଗରେ ଚାକିରି କରାଇଦେବାର ପ୍ରତିଶ୍ରୁତି ଦେଇ ବହୁ ଯୁବକ ଯୁବତୀଙ୍କଠାରୁ ଲକ୍ଷାଧିକ ଟଙ୍କା ଠକିବା ଅଭିଯୋଗରେ ଗୋଷାଣି ନୂଆଗାଁ ପୋଲିସ ଦ୍ୱାରା ଗିରଫ ହୋଇ କାରାଗାରରେ ଥିବା ହିଲପାଟଣାର ଗଣେଷ ହୋତା ନାଁରେ ପୁଣି ଏକ ମାଲା ରୁଜୁ ହୋଇଛି। ଅଭିଯୁକ୍ତ ଗଣେଷ ଜଣେ ଶିକ୍ଷୟିତ୍ରୀଙ୍କ ଚାକିରି ନିୟମିତ କରାଇଦେବାକୁ ପ୍ରତିଶ୍ରୁତି ଦେଇ ତାଙ୍କଠାରୁ ୩ ଳକ୍ଷ ଟଙ୍କା ଠକି ନେଇଥିବା ଅଭିଯୋଗ ହୋଇଛି। ଏ ନେଇ ନଂ. ୮୦/୨୨ରେ ପୋଲିସ ଏକ ମାମଲା ରୁଜୁ କରି ତଦନ୍ତ କରୁଛି। ଏହି ମାମଲାକୁ ମିଶାଇ ଗୋଷାଣିନୂଆଗାଁ ପୋଲିସ ଗଣେଷ ନାଁରେ ମୋଟ ୪ ଠକେଇ ମାମଲା ରୁଜୁ କରିଛି। ହିଲପାଟଣାର ବିଦ୍ୟୁତ୍ଚନ୍ଦ୍ର ନାୟକଙ୍କ ସ୍ତ୍ରୀ ଜଣେ ଶିକ୍ଷୟିତ୍ରୀ ଭାବେ କାର୍ଯ୍ୟ କରୁଛନ୍ତି। ତେବେ ତାଙ୍କ ଚାକିରି ନିୟମିତ ହୋଇ ନ ଥିଲା। ଏଭଳି ସ୍ଥିତିରେ ଅଭିଯୁକ୍ତ ଶିକ୍ଷୟିତ୍ରୀଙ୍କ ସଂସ୍ପର୍ଶରେ ଆସି ଚାକିରି ନିୟମିତ କରାଇଦେବାକୁ ପ୍ରତିଶ୍ରୁତି ଦେଇଥିଲେ। ଗଣେଷଙ୍କ କଥାରେ ବିଶ୍ୱାସ କରି ଶିକ୍ଷୟିତ୍ରୀ ଜଣକ ୨୦୨୦ ଏପ୍ରିଲରେ ନଗଦ ୩ ଲକ୍ଷ ଟଙ୍କା ଦେଇଥିଲେ। ପରେ କରୋନା ମହାମାରୀ ଆସିଯାଇଥିଲା। ଆଉ ଗଣେଷ ବିଭିନ୍ନ ବାହାନା କରି ସମୟ ଗଡାଇ ଚାଲିଥିଲେ। କଟକଣା ହଟିବା ପରେ ମଧ୍ୟ ଶିକ୍ଷୟିତ୍ରୀଙ୍କ ଚାକିରି ନିୟମିତ ନ ହେବାରୁ ସେ ବାରମ୍ବାର ଅଭିଯୁକ୍ତଙ୍କୁ ପଚାରିଥିଲେ। ହେଲେ ଗଣେଷ ଏହାର ସନ୍ତୋଷଜନକ ଉତ୍ତର ନ ଦେବାରୁ ଶିକ୍ଷୟିତ୍ରୀ ଟଙ୍କା ମାଗିଥିଲେ। କିନ୍ତୁ ଟଙ୍କା ନ ମଳିବାରୁ ଠକେଇର ଶିବାର ହୋଇଥିବା ସେ ଜାଣିବାକୁ ପାଇଥିଲେ।
