ଭଞ୍ଜନଗର(ଡି.ଏନ.ଏ)/ ରାୟଗଡ଼ା(ସ୍ବ.ପ୍ର.), ୨୯।୧:ଗଞ୍ଜାମ ଏବଂ ରାୟଗଡ଼ା ଜିଲାର ପୃଥକ୍ ସ୍ଥାନରେ ଶନିବାର ସଡ଼କ ଦୁର୍ଘଟଣା ଘଟି ୩ ଜୀବନ ଯାଇଛି। ଅନ୍ୟ ୫ଜଣ ଗୁରୁତର ହୋଇଛନ୍ତି।
ଗଞ୍ଜାମ ଜିଲା ଭଞ୍ଜନଗର ଥାନା ଅନ୍ତର୍ଗତ ଗୋଲାପଡ଼ାର ଧାନ ବ୍ୟବସାୟୀ ଭୋଳା ପ୍ରଧାନ ଏବଂ କଣ୍ଟାଡୋରର ଲୋକନାଥ ସ୍ବାଇଁ କୌଣସି କାର୍ଯ୍ୟରେ ବାଇକ୍ରେ ଭଞ୍ଜନଗର ଆସି ସନ୍ଧ୍ୟା ସାଢ଼େ ୭ଟାରେ ଘରକୁ ଫେରୁଥିଲେ। ଏହି ସମୟରେ ବିପରୀତ ଦିଗରୁ ଅନ୍ୟ ଏକ ବାଇକ୍ରେ ଆସୁଥିବା ବାଉଁଶଲୁଣ୍ଡିର ଚନ୍ଦନ ନାୟକ, ଅବିନାଶ ପ୍ରଧାନ, କ୍ଷେତ୍ରାନନ୍ଦ ସାହୁଙ୍କ ମଧ୍ୟରେ ମୁହଁାମୁହିଁ ଧକ୍କା ହୋଇଥିଲେ। ଠିକ୍ ଏତିକିବେଳେ ଭଞ୍ଜନଗରରୁ ଦଶପଲ୍ଲା ଅଭିମୁଖେ ଦ୍ରୁତ ଗତିରେ ଯାଉଥିବା ଏକ ଟ୍ରକ ଭୋଳା ଏବଂ ଲୋକନାଥଙ୍କୁ ବାଇକ୍ ସହ ଘୋଷାଡ଼ି ନେଇଥିଲା। ଘଟଣାସ୍ଥଳରେ ଉଭୟଙ୍କ ମୃତ୍ୟୁ ହୋଇଥିଲା। ଦୁର୍ଘଟଣା ପରେ ଡ୍ରାଇଭର ଫେରାର୍ ହୋଇଯାଇଛନ୍ତି। ପୋଲିସ ଗୁରୁତର ୩ ଯୁବକଙ୍କୁ ପ୍ରଥମେ ଭଞ୍ଜନଗର ମେଡିକାଲ ଓ ପରେ ବ୍ରହ୍ମପୁର ସ୍ଥାନାନ୍ତର କରାଯାଇଛି।
ସେହିପରି ରାୟଗଡ଼ା ସଦର ବ୍ଲକ ତଳ ସାଙ୍କେଶ ନିକଟରେ ଟ୍ରକ୍ ଧକ୍କାରେ ଅଟୋରିକ୍ସା ଓଲଟି ପଡ଼ିବାରୁ ଜଣେ ମହିଳାଙ୍କ ମୃତ୍ୟୁ ଘଟିଛି। ସେ ହେଲେ ତୁଳସୀ ମିଣିଆକା (୨୨)। ବୁଚି ସାରକା (୨୨) ଏବଂ ରାଇମତି କୁଲେଶିକା (୨୩) ଗୁରୁତର ହୋଇଛନ୍ତି। ଗୁମ୍ମା ପଞ୍ଚାୟତ କିଆପାଡ଼ୁ ଏବଂ ହାଲୁଆ ପଞ୍ଚାୟତ ଗୌଡ଼ ବୁଡ଼ାଗୁଡ଼ା ଗ୍ରାମର ୧୫ ଜଣ ଅଟୋରିକ୍ସାରେ ରାୟଗଡ଼ା ଅଭିମୁଖେ ଆସୁଥିଲେ। ଏହି ସମୟରେ ବିପରୀତ ଦିଗରୁ ଆସୁଥିବା ଟ୍ରକ୍ ସହ ମୁହଁାମୁହିଁ ଧକ୍କା ହୋଇ ଏହି ଦୁର୍ଘଟଣା ଘଟିଥିଲା। ରାୟଗଡ଼ା ଏସ୍ଡିପିଓ ଦେବଜ୍ୟୋତି ଦାସ, ଟାଉନ ଥାନା ଅଧିକାରୀ ରଶ୍ମିରଞ୍ଜନ ପ୍ରଧାନ ପହଞ୍ଚତ୍ ମୃତାହତଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ଟ୍ରକ୍ ଚାଳକ ଫେରାର ଥିବାବେଳେ ପୋଲିସ ଏକ ମାମଲା ରୁଜୁ କରି ତଦନ୍ତ ଚଳାଇଛି।