କଟକ ଅଫିସ,୨୪।୮: ଲିଜେଣ୍ଡ କ୍ରିକେଟ ଲିଗ୍(ଏଲ୍ଏଲ୍ସି)ର ତିନୋଟି ମ୍ୟାଚ୍ କଟକ ବାରବାଟୀ ଷ୍ଟାଡିୟମରେ ଖେଳାଯିବ। ସେପ୍ଟେମ୍ବେର ୨୭, ୨୯ ଓ ୩୦ରେ ଏହି ମ୍ୟାଚ ଅନୁଷ୍ଠିତ ହେବ। ଭାରତ ସମେତ ବିଶ୍ୱର ବିଭିନ୍ନ ଦେଶର ଅନ୍ତର୍ଜାତୀୟ ଖେଳାଳି ଏଥିରେ ଭାଗ ନେବେ ବୋଲି ଓସିଏ ସମ୍ପାଦକ ସଞ୍ଜୟ ବେହେରା ସୂଚନା ଦେଇଛନ୍ତି।
ସେପ୍ଟେମ୍ବର ୧୬ରୁ ଅକ୍ଟୋବର ୮ ଯାଏ ଏଲ୍ଏଲ୍ସି ଟୁର୍ନାମେଣ୍ଟ ଖେଳାଯିବ। ଟି୨୦ ଫର୍ମାଟରେ ମ୍ୟାଚ୍ଗୁଡ଼ିକ ଖେଳାଯିବ। କ୍ରିକେଟରୁ ଅବସର ନେଇଥିବା ୫୦ରୁ ଅଧିକ କିମ୍ବଦନ୍ତୀ ଖେଳାଳି ଏହି ଲିଗ୍ରେ ସାମିଲ ହେବେ। ଦେଶର ୬ଟି ସ୍ଥାନରେ ଏହି ଟୁର୍ନାମେଣ୍ଟ ଖେଳାଯିବାର କାର୍ଯ୍ୟକ୍ରମ ରହିଛି। ଯାହା ମଧ୍ୟରେ କଟକ ରହିଛି। ତେବେ ଷ୍ଟାଡିୟମରେ ଖେଳ ଦେଖିବା ନିମନ୍ତେ ଟିକେଟ ଦର ଆୟୋଜକ ନିର୍ଦ୍ଧାରଣ କରିବେ ବୋଲି ଓସିଏ ପକ୍ଷରୁ ସୂଚନା ଦିଆଯାଇଛି।
