ହାଙ୍ଗଝୋ,୪ା୧୦(ପି.ଟି.): ଏସିଆନ୍ ଗେମ୍ସ ୨୦୨୩ରେ ଆହୁରି ୩ ପଦକ ପକ୍କା କରିଛନ୍ତି ଭାରତୀୟ ସ୍କ୍ବାଶ୍ ଖେଳାଳି। ପୁରୁଷ ଟିମ୍ ଦଳଗତ ଇଭେଣ୍ଟରେ ସ୍ବର୍ଣ୍ଣ ପଦକ ପାଇଥିବା ବେଳେ ବ୍ୟକ୍ତିଗତ ରାଉଣ୍ଡରେ ସୌରଭ ଘୋଷାଲ, ଦୀପିକା ପଲିକଲ-ହରିନ୍ଦର ପାଲ ଓ ଅନହତ ସିଂ-ଅଭୟ ସିଂଙ୍କ ଯୋଡି ସେମିଫାଇନାଲରେ ପ୍ରବେଶ କରିବା ସହ ୩ ପଦକ ପକ୍କା କରିଛନ୍ତି।
ବ୍ୟାଡ୍ମିଣ୍ଟନ: ସିଙ୍ଗଲ୍ସ ବର୍ଗରେ ପ୍ରି କ୍ୱାର୍ଟରରେ ପ୍ରବେଶ କରିଛନ୍ତି ୩ ଜଣ ଭାରତୀୟ। ଏଚ୍. ଏସ୍. ପ୍ରଣୟ, ପି.ଭି. ସିନ୍ଧୁ ଓ କିଡାମ୍ବୀ ଶ୍ରୀକାନ୍ତ ମଙ୍ଗଳବାର ବିଜୟୀ ହେବା ସହିତ ରାଉଣ୍ଡ ଅଫ୍ ୧୬ରେ ସ୍ଥାନ ପାଇଛନ୍ତି। ବିଶ୍ୱ ମାନ୍ୟତାର ସପ୍ତମ ସ୍ଥାନରେ ଥିବା ପ୍ରଣୟ ମଙ୍ଗୋଲିଆର ବଟଡଭା ମୁଙ୍ଖବାଟଙ୍କୁ ୨୧-୯, ୨୧-୧୨ ସେଟ୍ରେ ପରାସ୍ତ କରିଥିଲେ। ଅନ୍ୟତମ ଭାରତୀୟ ଶ୍ରୀକାନ୍ତ ୨୧-୧୬ ଓ ୨୧-୧୧ସେଟ୍ରେ କୋରିଆର ଲି ୟୁନ୍ ଜ୍ୟୁଙ୍କୁ ପରାସ୍ତ କରିଛନ୍ତି। ପରବର୍ତ୍ତୀ ରାଉଣ୍ଡରେ ସେ ଜାପାନର କୋଡାଇ ନାରୁକାଙ୍କୁ ଭେଟିବେ। ପୂର୍ବତନ ବିଶ୍ୱ ଚାମ୍ପିୟନ ପି.ଭି. ସିନ୍ଧୁ ୨୧-୧୦, ୨୧-୧୫ ଚାଇନିଜ ତାଇପେର ଓ୍ବେ ଚି ହୁଙ୍କୁ ପରାସ୍ତ କରିଥିଲେ। ତେବେ ଅନ୍ୟତମ ଭାରତୀୟ ଖେଳାଳି ଅସ୍ମିତା ଚଲିହା ଓ ମହିଳା ଡବଲ୍ସ ଯୋଡି ତ୍ରିସା ଜୋଲି ଓ ଗାୟତ୍ରୀ ଗୋପୀଚାନ୍ଦ ପରାଜିତ ହୋଇଛନ୍ତି।
କବାଡି: ପୁରୁଷ ଦଳ ବିଜୟରୁ ଅଭିଯାନ ଆରମ୍ଭ କରିଥିବା ବେଳେ ମହିଳା ଦ୍ୱିତୀୟ ମ୍ୟାଚ୍ରେ ହାସଲ କରିଛି ପ୍ରଥମ ବିଜୟ। ଭାରତୀୟ ପୁରୁଷ ଦଳ ୫୫-୧୮ରେ ବାଂଲାଦେଶକୁ ପରାସ୍ତ କରି ଅଭିଯାନ ଆରମ୍ଭ କରିଥିଲା। ଅନ୍ୟପକ୍ଷରେ ମହିଳା ଦଳ ୫୬-୨୩ରେ ଦକ୍ଷିଣ କୋରିଆକୁ ପରାସ୍ତ କରିଛି।
ଆର୍ଚେରୀ: ଭାରତୀୟ ତୀରନ୍ଦାଜମାନେ ଚମତ୍କାର ପ୍ରଦର୍ଶନ କରିଥିବା ବେଳେ ବ୍ୟକ୍ତିଗତ ଇଭେଣ୍ଟରେ ଦେଶ ପାଇଁ ପ୍ରଥମ ସ୍ବର୍ଣ୍ଣ ପକ୍କା କରିଛନ୍ତି। ଓଜସ ଦେଓତାଲେ ଓ ଅଭିଜ୍ଞ ଅଭିଷେକ ବର୍ମା ଫାଇନାଲରେ ପ୍ରବେଶ କରିଥିବା ବେଳେ ଭାରତର ସ୍ବର୍ଣ୍ଣ ଓ ରୌପ୍ୟ ପଦକ ପକ୍କା ହୋଇଛି। ଅତନୁ ଦାସ ଓ ଧୀରଜ ବୋମ୍ମାଦେବରା ରିକର୍ଭ ଇଭେଣ୍ଟରୁ ବିଦାୟ ନେଇଥିବା ବେଳେ ଓଜସ ଦେଓତାଲେ, ଅଭିଷେକ ବର୍ମା ଓ ଜ୍ୟୋତି ସୁରେଖା ଭେନ୍ନମ ପଦକ ପକ୍କା କରିଛନ୍ତି। ଅଦିତି ସ୍ବାମୀଙ୍କୁ ହରାଇ ଜ୍ୟୋତି ଫାଇନାଲରେ ପ୍ରବେଶ କରିଥିବା ବେଳେ ବିଶ୍ୱ ଚାମ୍ପିୟନ ଅଦିତି ବ୍ରୋଞ୍ଜ ପଦକ ମ୍ୟାଚ ଖେଳିବେ।