ନୂଆଦିଲ୍ଲୀ,୧ା୨(ପି.ଟି.): ପ୍ୟାରିସ୍ ଅଲିମ୍ପିକ୍ସ ୨୦୨୪ର ଉଦ୍ଘାଟନୀ ସମାରୋହ ପାଇଁ ଦର୍ଶକ ସଂଖ୍ୟା ହ୍ରାସ କରିଛି ଫ୍ରାନ୍ସ। ପୂର୍ବରୁ ୬ ଲକ୍ଷ ଦର୍ଶକ ଏଥିରେ ଯୋଗ ଦେବା ନେଇ ଯୋଜନା ରହିଥିବା ବେଳେ ବର୍ତ୍ତମାନ ଏହି ସଂଖ୍ୟାକୁ ଅଧା କରି ଦିଆଯାଇଛି। ଫ୍ରାନ୍ସର ଗୃହ ମନ୍ତ୍ରୀ ଜେରାଲ୍ଡ ଡାରମାନିନ ବୁଧବାର ଏହି ସୂଚନା ଦେଇଛନ୍ତି। ପ୍ରଥମ ଥର ପାଇଁ କୌଣସି ଷ୍ଟାଡିୟମ ବଦଳରେ ସିନ୍ ନଦୀ କୂଳରେ ଏହି ଉଦ୍ଘାଟନୀ ଉତ୍ସବ ଅନୁଷ୍ଠିତ ହେବ। ଜୁଲାଇ ୨୬ ତାରିଖରେ ଏହା ଆୟୋଜିତ ହେବ। ବିଶ୍ୱରେ ପ୍ରଥମ ଥର ପାଇଁ ଏଭଳି ହେବାକୁ ଥିବା ବେଳେ ଏହାର ସୁରକ୍ଷା ବ୍ୟବସ୍ଥାକୁ ନେଇ ସମସ୍ୟା ସୃଷ୍ଟି କରିପାରେ। ଏହାକୁ ଦୃଷ୍ଟିରେ ରଖି ଫ୍ରାନ୍ସ ସରକାରଙ୍କ ପକ୍ଷରୁ ଏହି ନିଷ୍ପତ୍ତି ନିଆଯାଇଛି। ସିନ୍ ନଦୀରେ ୬ କିମି ଇଲାକାରେ ଆଥ୍ଲେଟଙ୍କ ପରେଡ୍ ଅନୁଷ୍ଠିତ ହେବ। ନଦୀର ଉଭୟ ପାର୍ଶ୍ୱରେ ଦର୍ଶକମାନେ ଛିଡା ହୋଇ ଏହାର ମଜା ନେଇପାରିବେ। ଏଥି ନିମନ୍ତେ ୧ ଲକ୍ଷ ଟିକେଟ ବିକ୍ରି କରାଯାଇଥିବା ବେଳେ ୨.୨ ଲକ୍ଷ ମାଗଣା ଟିକେଟ ବଣ୍ଟା ଯାଇଥିବା ନେଇ ସୂଚନା ଦେଇଛନ୍ତି ଜେରାଲ୍ଡ ଡାରମାନିନ । ପୂର୍ବରୁ ୬ ଲକ୍ଷ ଦର୍ଶକଙ୍କ ପାଇଁ ବ୍ୟବସ୍ଥା କରାଯାଇଥିବା ବେଳେ ଅଚାନକ କାହିଁକି ପରିବର୍ତ୍ତନ କରାଗଲା ବୋଲି ପ୍ରଶ୍ନରେ ସେ କୌଣସି ଉତ୍ତର ଦେଇ ନ ଥିଲେ। ଏହା ସହ ସେ ଫ୍ରାନ୍ସର ସୁରକ୍ଷାକର୍ମୀଙ୍କୁ ପ୍ରଶଂସା କରିଥିଲେ। ଆମ ନିକଟରେ ବିଶ୍ୱର ଶ୍ରେଷ୍ଠ ସୁରକ୍ଷା ବ୍ୟବସ୍ଥା ରହିଥିବା ବେଳେ ଆମେ ସଫଳତାର ସହ ଏହି କ୍ରୀଡା ମହାକୁମ୍ଭ ଆୟୋଜନ କରିବୁ ବୋଲି ଦୃଢୋକ୍ତି ପ୍ରକାଶ କରିଛନ୍ତି। ପୂର୍ବରୁ ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରୋନ କହିଥିଲେ ଯଦି କଟରପନ୍ଥୀ ଆକ୍ରମଣ ହୁଏ ତେବେ ଆମେ ଏହି ଉଦ୍ଘାଟନୀ ସମାରୋହର ସ୍ଥାନ ପରିବର୍ତ୍ତନ କରିବୁ। ତେବେ ସମାନ କାରଣରୁ ଉଦ୍ଘାଟନୀ ସମାରୋହର ଦର୍ଶକ ସଂଖ୍ୟା ହ୍ରାସ କରାଯାଇଥିବା ଆଶଙ୍କା କରାଯାଉଛି।