କେନ୍ଦ୍ରାପଡା ଅଫିସ/ପଟ୍ଟାମୁଣ୍ଡାଇ (ସ୍ବ.ପ୍ର.),୨୫।୯: ଭୁବନେଶ୍ୱରରୁ ଏକ ଓଲା ଗାଡ଼ିକୁ ଅପହରଣ କରିବା ଘଟଣାରେ ପୋଲିସ ୩ଜଣଙ୍କୁ ଗିରଫ କରିଛି। ସେମାନେ ହେଲେ ରାଜନଗର ଥାନା ଗଳିଦଣ୍ଡା ଗ୍ରାମର ତ୍ରିଲୋଚନ ସାମନ୍ତରାୟ ଓରଫ ଦିପୁ, ପଟ୍ଟାମୁଣ୍ଡାଇ ଥାନା ଡାମରପଙ୍କ ବାଲିପାଟଣା ଗ୍ରାମର ପରେଶ ପରିଡା ଓରଫ ଗୁନୁରୀ ଓ ବିଶ୍ୱଜିତ ବାଇ ଓରଫ କୁଲୁ। ଏ ନେଇ ଥାନାରେ ଆୟୋଜିତ ଖବରଦାତା ସମ୍ମିଳନୀରେ ଏସ୍ପି ନୀତିଶେଖର ସୂଚନା ଦେଇଛନ୍ତି। ସୂଚନା ଅନୁସାରେ, ଗତ ୨୩ ତାରିଖରେ ଅଭିଯୁକ୍ତମାନେ ଭୁବନେଶ୍ୱର ମାଷ୍ଟରକାଣ୍ଟିନ ନିଟକରୁ କେନ୍ଦ୍ରାପଡ଼ା ଆସିବା ପାଇଁ ଓଲା କାର୍ (ନଂ.-ଓଡି-୩୩-ଏକ୍ସ-୧୦୬୮) ବୁକ୍ କରିଥିଲେ। କଟକ ଜିଲା ନିଶ୍ଚିନ୍ତକୋଇଲି ନିକଟରେ କାର୍ ଚାଳକ ବିଜୟ ନାୟକଙ୍କ ମୁଣ୍ଡରେ ସେମାନେ ବନ୍ଧୁକ ଲଗାଇ ଗାଡ଼ି ଚାବି ଓ ମନିପର୍ସରେ ଥିବା ଟଙ୍କା ଛଡାଇ ନେଇଥିଲେ। ଏଥିସହିତ ବିଜୟଙ୍କ ହାତଗୋଡ଼ ବାନ୍ଧି କାର ଡିକିରେ ପକାଇ ଦେଇଥିଲେ। ଅଭିଯୁକ୍ତମାନେ ପଟ୍ଟାମୁଣ୍ଡାଇରେ ପହଞ୍ଚତ୍ବା ପରେ ବିଜୟ କୌଶଳକ୍ରମେ ଗାଡି ଭିତରୁ ବାହାରକୁ ବାହାରି ଯିବାରୁ ଘଟଣା ସମ୍ପର୍କରେ ଜଣାପଡିଥିଲା। ଏହି ରାକେଟରେ ୪ ଜଣ ସମ୍ପୃକ୍ତ ଥିବା ବେଳେ ୩ ଜଣ ଗିରଫ ହୋଇଛନ୍ତି, ଜଣେ ଫେରାର ଅଛନ୍ତି। ସେମାନଙ୍କଠାରୁ ଗୋଟିଏ ଗୁଳି ବହୀନ ଦେଶୀ ବନ୍ଧୁକ, ୫ଟି ମୋବାଇଲ ଓ ଡ୍ରାଇଭରଙ୍କଠାରୁ ଲୁଟି ନେଇଥିବା ମନିପର୍ସରେ ଥିବା ୬ ହଜାର ଟଙ୍କା ପୋଲିସ ଜବତ କରିଛି। ଏଥିସହିତ ଅଭିଯୁକ୍ତମାନେ ବ୍ୟବହାର କରୁଥିବା ୨ଟି ଦାମି ବାଇକ୍ ଭୁବନେଶ୍ୱରରୁ ଜବତ ହୋଇଥିବା ଏସ୍ପି ନୀତିଶେଖର ସୂଚନା ଦେଇଛନ୍ତି। ଏ ନେଇ ପଟ୍ଟାମୁଣ୍ଡାଇ ଥାନା ପୋଲିସ ମାମଲା (ନଂ.-୩୬୦/୨୦ ରୁଜୁ କରିଛି। ଖବରଦାତା ସମ୍ମିଳନୀରେ ଏସ୍ଡିପିଓ ରଞ୍ଜନ କୁମାର ଦେ, ଥାନା ଅଧିକାରୀ ରାକେଶ କୁମାର ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ।