ଭୁବନେଶ୍ୱର, ୨୬।୧୦(ବ୍ୟୁରୋ): ନୂଆଦିଲ୍ଲୀରେ ସୋମବାର ଅନୁଷ୍ଠିତ ୬୭ତମ ଜାତୀୟ ଚଳଚ୍ଚିତ୍ର ପୁରସ୍କାର ଉତ୍ସବରେ ଓଡ଼ିଶାର ୩ଜଣଙ୍କୁ ଜାତୀୟ ଚଳଚ୍ଚିତ୍ର ପୁରସ୍କାର ପ୍ରଦାନ କରାଯାଇଛି। ଶ୍ରେଷ୍ଠ ଓଡ଼ିଆ ଚଳଚ୍ଚିତ୍ର ‘ଶଲା ବୁଢ଼ାର ବଦ୍ଲା’ ପାଇଁ ଫିଲ୍ମ ନିର୍ମାତା ତଥା ନିର୍ଦ୍ଦେଶକ ସବ୍ୟସାଚୀ ମହାପାତ୍ର ଏବଂ ‘କାଲିର ଅତୀତ’ ପାଇଁ ନୀଳମାଧବ ପଣ୍ଡା ଦ୍ୱୈତ ଭାବେ ଏହି ଜାତୀୟ ପୁରସ୍କାର ପାଇଛନ୍ତି। ନନ୍ ଫିଚର ଫିଲ୍ମ ବର୍ଗରେ ଆଶୁତୋଷ ପଟ୍ଟନାୟକ ମଧ୍ୟ ପୁରସ୍କୃତ ହୋଇଛନ୍ତି। ‘ଶ୍ରୀକ୍ଷେତ୍ରରୁ ସାହିଯାତ’ ଫିଲ୍ମ ପାଇଁ ଶ୍ରେଷ୍ଠ କଳା ଓ ସଂସ୍କୃତି ବର୍ଗରେ ତାଙ୍କୁ ଜାତୀୟ ଚଳଚ୍ଚିତ୍ର ପୁରସ୍କାର ମିଳିଛି। ଉପରାଷ୍ଟ୍ରପତି ଭେଙ୍କାୟା ନାଇଡ଼ୁ ଏମାନଙ୍କୁ ପୁରସ୍କାର ପ୍ରଦାନ କରିଛନ୍ତି। ଏହି ଅବସରରେ ସବ୍ୟସାଚୀ ମହାପାତ୍ର ଖୁସିବ୍ୟକ୍ତ କରି କହିଛନ୍ତି, ଏହି ସଫଳତା ପାଇଁ ମା’ ସମଲେଶ୍ୱରୀଙ୍କ ପାଖରେ ମୋର ପ୍ରଣାମ
ଜଣାଇବା ସହିତ ସବୁ ଦର୍ଶକଙ୍କୁ ଧନ୍ୟବାଦ ଜଣାଉଛି। ବାପାଙ୍କ କଥା ଆଜି ବହୁତ ମନେପଡ଼ୁଛି। ସେ ଥିଲେ ବହୁତ ଖୁସି ହୋଇଥାନ୍ତେ ବୋଲି ସବ୍ୟସାଚୀ କହିଛନ୍ତି। ସେହିପରି ନୀଳମାଧବ ପଣ୍ଡା ମଧ୍ୟ ଏହି ସଫଳତା ପାଇଁ ସମସ୍ତଙ୍କୁ ଧନ୍ୟବାଦ ଜଣାଇବା ସହିତ ପୃଥିବୀ ମା’କୁ ମୋର ଏହି ସମ୍ବର୍ଦ୍ଧନା ଉତ୍ସର୍ଗୀକୃତ କରୁଛି ବୋଲି କହିଛନ୍ତି। ‘କାଲିର ଅତୀତ’ ତାଙ୍କର ନିର୍ଦ୍ଦେଶିତ ପ୍ରଥମ ଓଡ଼ିଆ ଚଳଚ୍ଚିତ୍ର।
