କ୍ଷମତାଶାଳୀ ମହିଳାଙ୍କ ତାଲିକାରେ ଅର୍ଥମନ୍ତ୍ରୀଙ୍କ ସମେତ ଅନ୍ୟ ୩ ଭାରତୀୟ…

ନୂଆଦିଲ୍ଲୀ,୬।୧୨ : କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ବିଶ୍ୱର ସବୁଠାରୁ କ୍ଷମତାଶାଳୀ ମହିଳାଙ୍କ ଫୋର୍ବସ ତାଲିକାରେ ୩୨ ତମ ସ୍ଥାନରେ ରହିଛନ୍ତି। ଯେଉଁଥିରେ ଆମେରିକାର ଉପରାଷ୍ଟ୍ରପତି କମଲା ହାରିସ ଏବଂ ସଙ୍ଗୀତକାର ଟେଲର୍‌ ସୱିଫ୍ଟ ମଧ୍ୟ ସାମିଲ ଅଛନ୍ତି। ଏହି ତାଲିକାରେ ନାମିତ ଅନ୍ୟ ତିନିଜଣ ଭାରତୀୟ ମହିଳା ହେଉଛନ୍ତି ଏଚସିଏଲ ନିଗମର ଏସଇଓ ରୋଶନୀ ନାଦର ମାଲହୋତ୍ରା (୬୦ ତମ ସ୍ଥାନ), ଷ୍ଟିଲ ଅଥରିଟି ଅଫ ଇଣ୍ଡିଆର ଚେୟାରମ୍ୟାନ ସୋମା ମଣ୍ଡଳ (୭୦ ସ୍ଥାନ) ଏବଂ ବାୟୋକନ ପ୍ରତିଷ୍ଠାତା କିରଣ ମଜୁମଦାର-ଶୋ(୭୬ ସ୍ଥାନ)।

ଏହି ତାଲିକାରେ ୟୁରୋପୀୟ କମିଶନ ମୁଖ୍ୟ ଉର୍ସୁଲା ଭନ ଡେର୍‌ ଲେୟନ ପ୍ରଥମ ସ୍ଥାନରେ ଅଛନ୍ତି। ଦ୍ୱିତୀୟ ସ୍ଥାନରେ ୟୁରୋପୀୟ ସେଣ୍ଟ୍ରାଲ ବ୍ୟାଙ୍କ ମାଲିକ ଖ୍ରୀଷ୍ଟାଇନ ଲାଗାର୍ଡ ଏବଂ ତୃତୀୟ ସ୍ଥାନରେ ଆମେରିକାର ଉପରାଷ୍ଟ୍ରପତି କମଲା ହାରିସ ରହିଛନ୍ତି। ନିର୍ମଳା ସୀତାରମଣ ମେ ୨୦୧୯ ରେ ଭାରତର ପ୍ରଥମ ପୂର୍ଣ୍ଣକାଳୀନ ଅର୍ଥମନ୍ତ୍ରୀ ହୋଇଥିଲେ ଏବଂ କର୍ପୋରେଟ ବ୍ୟାପାର ମନ୍ତ୍ରଣାଳୟର ମଧ୍ୟ ମୁଖ୍ୟ ହୋଇଥିଲେ। ଫୋର୍ବସ କହିଛି ରାଜନୀତିରେ ପ୍ରବେଶ କରିବା ପୂର୍ବରୁ ସେ ବ୍ରିଟେନର କୃଷି ଇଞ୍ଜିନିୟର୍ସ ଏବଂ ବିବିସି ୱାଲର୍‌ଡ ସର୍ଭିସରେ କାର୍ଯ୍ୟ କରିଥିଲେ। ସେ ମହିଳା ଜାତୀୟ ଆୟୋଗର ସଦସ୍ୟ ମଧ୍ୟ ରହିଛନ୍ତି।

ରୋଶନୀ ନାଦର ମାଲହୋତ୍ରା ଏଚସିଏଲ ପ୍ରତିଷ୍ଠାତା ତଥା ଶିଳ୍ପପତି ଶିବ ନାଦାରଙ୍କ ଝିଅ। ଫୋର୍ବସ କହିଛି ଏଚସିଏଲ ଟେକ୍ନୋଲୋଜିର ଚେୟାରମ୍ୟାନ ଭାବରେ ସେ କମ୍ପାନୀର ସମସ୍ତ ରଣନୀତିକ ନିଷ୍ପତ୍ତି ପାଇଁ ଦାୟୀ ଅଟନ୍ତି। ସେ ଜୁଲାଇ ୨୦୨୦ ରେ ତାଙ୍କ ପିତାଙ୍କ ଠାରୁ ଏହି ପଦ ଗ୍ରହଣ କରିଥିଲେ।

ଫୋର୍ବସ ଅନୁଯାୟୀ, ରାଷ୍ଟ୍ରାୟତ୍ତ ଷ୍ଟିଲ ଅଥରିଟି ଅଫ ଇଣ୍ଡିଆ (ସେଲ) ର ପ୍ରଥମ ମହିଳା ଅଧ୍ୟକ୍ଷ ହେଉଛନ୍ତି ସୋମା ମଣ୍ଡଳ। ୨୦୨୧ ମସିହାରେ ଏହି ଦାୟିତ୍ୱ ଗ୍ରହଣ କରିବା ପରଠାରୁ ସେ ଇସ୍ପାତ ନିର୍ମାତାଙ୍କୁ ଆର୍ଥିକ ଅଭିବୃଦ୍ଧି ରେକର୍ଡ କରିବାରେ ନେତୃତ୍ୱ ନେଇଛନ୍ତି, ତାଙ୍କ ନେତୃତ୍ୱର ପ୍ରଥମ ବର୍ଷରେ ଫାର୍ମର ଲାଭ ତିନିଗୁଣ ହୋଇଛି।

ଫୋର୍ବସ ରିପୋର୍ଟ କରିଛି କିରଣ ମଜୁମଦାର ହେଉଛନ୍ତି ଭାରତର ସବୁଠାରୁ ଧନୀ ଆତ୍ମନିର୍ଭରଶୀଳ ମହିଳା। ସେ ୧୯୭୮ରେ ବାୟୋଫାର୍ମାସ୍ୟୁଟିକାଲ ଫାର୍ମ ବାୟୋକନ ପ୍ରତିଷ୍ଠା କରିଥିଲେ। କମ୍ପାନୀର ମାଲେସିଆର ଜୋହୋର ଅଞ୍ଚଳରେ ଏସିଆର ସର୍ବବୃହତ ଇନସୁଲିନ କାରଖାନା ଅଛି ।