ଟେନସା,୨୧।୭(ସମୀର କୁମାର ପାଢ଼ୀ): ସୁନ୍ଦରଗଡ଼ ଜିଲା ୫୨୦ ନମ୍ବର ଜାତୀୟ ରାଜପଥ କାଲଟା ଫାଣ୍ଡି ବେଞ୍ଜାଢ଼ି ବ୍ରିଜ୍ରେ ରବିବାର ସନ୍ଧ୍ୟାରେ ଏକ ମର୍ମନ୍ତୁଦ ଦୁର୍ଘଟଣା ଘଟିଛି। ଏକ ଟ୍ରକ୍ ଧକ୍କାରେ ୩ଜଣ ବାଇକ୍ ଆରୋହୀଙ୍କ ଘଟଣାସ୍ଥଳରେ ମୃତ୍ୟୁ ଘଟିଛି। ମୃତକମାନେ ତୋଡା ଗ୍ରାମର ଦେବେନ୍ଦ୍ର ଦେହୁରୀ, ଅନୀଲ ଦେହୁରୀ, ଅନାଦୀ ନାଏକ ବୋଲି ଜଣାପଡିଛି।
ମିଳିଥିବା ସୂଚନା ମୁତାବକ, ସେମାନଙ୍କ ସ୍ଥାନୀୟ ଏକ ପଡିଆକୁ ଫୁଟବଲ ଖେଳିବାକୁ ଯାଇଥିଲେ। ଖେଳ ସାରି ୩ଜଣ ବାଇକ୍ ଯୋଗେ ଘରକୁ ଫେରୁଥିଲେ। ହେଲେ ବେଞ୍ଜାଢ଼ି ବ୍ରିଜ୍ ନିକଟରେ ଏକ ଗାଡ଼ି ସେମାନଙ୍କୁ ଧକ୍କା ଦେଇଥିଲା। ଏପରିକି ଗାଡିଟି ବାଇକ୍ ସହ ୩ଜଣ ଯୁବକଙ୍କୁ ଅଧା କିମି ଘୋଷାଡ଼ି ନେଇଯାଇଥିଲା। ପରବର୍ତ୍ତୀ ସମୟରେ ଗାଡିଟି ଫେରାର ହୋଇଯାଇଥିଲା। ଫଳରେ ଘଟଣାସ୍ଥଳରେ ସେମାନଙ୍କ ମୃତ୍ୟୁ ଘଟିଥିଲା। ଖବର ପାଇ ପରିବାର ଲୋକଙ୍କ ସହ ଗ୍ରାମବାସୀ ଘଟଣାସ୍ଥଳରେ ପହଞ୍ଚି ଥିଲେ। ଏନେଇ ଘଟଣାସ୍ଥଳରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଛି। କ୍ଷତିପୂରଣ ଦାବି କରିବା ସହ ତୁରନ୍ତ ଅଭିଯୁକ୍ତଙ୍କୁ ଗିରଫ କରିବାକୁ ଦାବି ହୋଇଛି। ଖବର ପାଇ ପୋଲିସ ପହଞ୍ଚି ଲୋକଙ୍କୁ ବୁଝାଶୁଝା କରୁଛି। ଏନେଇ ପୋଲିସ ଘଟଣାର ତଦନ୍ତ ଚଳାଇଛି।
ଅନ୍ୟପକ୍ଷେ ଦୁର୍ଘଟଣା ଘଟାଇଥିବା ଗାଡିର ସନ୍ଧାନ ମିଳିଛି। ଦୁର୍ଘଟଣା ଘଟାଇବା ପରେ ଡ୍ରାଇଭର ଏବଂ ହେଲପର ଟ୍ରକଟି ଦ୍ରୁତ ଗତିରେ ନେଇ ଏକ ଜଙ୍ଗଲ ମଧ୍ୟରେ ଛିଡା କରି ଫେରାର ହୋଇଯାଇଛନ୍ତି। ପୋଲିସ ପହଞ୍ଚି ଏକ ଟ୍ରକ(ନଂ.ଓଡି ୧୪ଏକ୍ସ ୯୩୧୧)କୁ ଜବତ କରି ଅଧିକ ତଦନ୍ତ ଚଳାଇଛି।