ଫୁଲବାଣୀ ଅଫିସ, ୩ା୪: କନ୍ଧମାଳ ଜିଲା ଗୋଚ୍ଛାପଡା ଥାନା ପୋଲିସ କେରେଙ୍ଗେଲି ଛକରେ ଚଢ଼ାଉ କରି ୩ କୁଇଣ୍ଟାଲ ୭୫ କେଜି ଗଞ୍ଜେଇ ଜବତ କରିଛି। ପୋଲିସ ଘଟଣାରେ ସମ୍ପୃକ୍ତ ୨ଜଣଙ୍କୁ ଗିରଫ କରିଥିବା ବେଳେ ଅନ୍ୟ ୨ ଜଣ ଫେରାର୍ ହୋଇଯାଇଛନ୍ତି। ଗିରଫ ଅଭିଯୁକ୍ତମାନେ ହେଲେ କେରେଙ୍ଗେଲି ଗ୍ରାମର ବସନ୍ତ ଦିଗାଲ ଓ ବିଶ୍ୱାମିତ୍ର ରଣା।
ମିଳିଥିବା ସୂଚନା ମୁତାବକ, କିଛି ଗଞ୍ଜେଇ ଚାଲାଣକାରୀ ବିଭିନ୍ନ ଗାଁରୁ ଗଞ୍ଜେଇ ସଂଗ୍ରହ କେରେଙ୍ଗେଲି ଛକରେ ଆଣି ରହିଥିଲେ। ବାହାର ରାଜ୍ୟକୁ ପଠାଇବା ପାଇ ଗାଡ଼ିକୁ ଅପେକ୍ଷା କରିଥିଲେ। ଏ ନେଇ ପୋଲିସକୁ ଖବର ମିଳିଥିଲା। ଥାନା ଅଧିକାରୀ ରଞ୍ଜିତ କୁମାର ମୁନୀଙ୍କ ନେତୃତ୍ୱରେ ଏକ ଟିମ୍ କେରେଙ୍ଗେଲି ଛକରେ ଚଢ଼ାଉ କରିଥିଲା। ଚଢାଉ ବେଳେ ପୋଲିସ ଅଧିକାରୀଙ୍କୁ ଦେଖି ୨ଜଣ ଘଟଣା ସ୍ଥଳରୁ ଫେରାର ହୋଇଯାଇଥିବା ବେଳେ ୨ଜଣଙ୍କୁ ଧରିବାରେ ସଫଳ ହୋଇଥିଲେ। ପୋଲିସ ଏକ ମାମଲା (ନଂ.୪୨/୨୧) ରୁଜୁ କରି ଘଟଣାର ଅଧିକ ତଦନ୍ତ ଚଳାଇଛି।