ନବରଙ୍ଗପୁର,୧୪।୧୨(ବି.ପ୍ର.): ନବରଙ୍ଗପୁର ଜିଲାର ୩ଜଣ ସରପଞ୍ଚ ଓ ୭ ଜଣ ୱାର୍ଡମେମ୍ବରଙ୍କୁ ଜିଲାପାଳ ତଥା ଜିଲା ମାଜିଷ୍ଟ୍ରେଟ ୧୨ ତାରିଖରେ ଅଯୋଗ୍ୟ ଘୋଷିତ କରିଛନ୍ତି। ଜିଲା ପଞ୍ଚାୟତ ଅଧିକାରୀ ନିର୍ଦ୍ଦେଶନାମା ପାଇବା ପରେ ସମ୍ପୃକ୍ତ ବ୍ଲକର ବିଡିଓମାନଙ୍କୁ ଚିଠିକରି ଜଣାଇଛନ୍ତି। ଅଯୋଗ୍ୟ ଘୋଷିତ ଲୋକ ପ୍ରତିନିଧିମାନଙ୍କର ଦୁଇରୁ ଅଧିକ ସନ୍ତାନ ଥିବା ନେଇ ଅଭିଯୋଗ ହୋଇଥିଲା। ଜିଲା ମାଜିଷ୍ଟ୍ରେଟଙ୍କ କୋର୍ଟରେ ବିଚାରଣା ପରେ ସେମାନଙ୍କୁ ଅଯୋଗ୍ୟ ଘୋଷଣା କରାଯାଇଛି।
ଝରିଗାଁ ବ୍ଲକ ଚିତାବେଡ଼ା ସରପଞ୍ଚ ତୁଳାବତୀ ସାନ୍ତାଙ୍କ ନାମରେ ଅଭିଯୋଗକୁ ନେଇ ଆର୍ଏମ୍ସି(ଜିପି) କେସ୍ ନମ୍ବର ୧/୨୦୨୨ ରୁଜୁ ହୋଇଥିଲା। ସମସ୍ତ ତଥ୍ୟ ପ୍ରମାଣକୁ ଭିତ୍ତିକରି ଜିଲା ମାଜିଷ୍ଟ୍ରେଟ୍ ତାଙ୍କୁ ଅଯୋଗ୍ୟ ଘୋଷଣା କରିଛନ୍ତି। ସେହିଭଳି କୋଷାଗୁମୁଡ଼ା ବ୍ଲକ ବାଲେଗାଁ ସରପଞ୍ଚ ଭଗବତୀ ଭତରା ଓ ଚନ୍ଦାହାଣ୍ଡି ବ୍ଲକ ଦଲବେଡ଼ା ସରପଞ୍ଚ ଭଗବାନ ମାଝିଙ୍କୁ ମଧ୍ୟ ଅଯୋଗ୍ୟ ଘୋଷଣା କରାଯାଇଛିି ା ଏନେଇ କେସ୍ ନଂ. ଯଥାକ୍ରମେ ୩/୨୦୨୨ ଓ ୬/୨୨ରେ ମାମଲା ବିଚାରାଧୀନ ଥିଲା। ସେହିଭଳି ବି.ଏମ୍.ସେମଳା ପଞ୍ଚାୟତ ୭ ନଂ ୱାର୍ଡମେମ୍ବର ଈଶ୍ୱରୀ ଗୌଡ଼, ନନ୍ଦାହାଣ୍ଡି ବ୍ଲକ ଜଗନ୍ନାଥପୁର ପଞ୍ଚାୟତ ୧ନଂ. ୱାର୍ଡମେମ୍ବର ଡମ୍ବରୁ ମାଳି, ୯ ନଂ. ଓ୍ବାର୍ଡମେମ୍ବର ଧନମତି ମୁଦୁଲି, ନବରଙ୍ଗପୁର ବ୍ଲକ ତାରାଗାଁ ୧ ନଂ. ୱାର୍ଡର ତପସ୍ବିନୀ ଭଟ୍ଟ, ୨ନଂ ୱାର୍ଡ ମେମ୍ବର ଅର୍ଜୁନ ଭତରା, ୩ ନଂ. ୱାର୍ଡମେମ୍ବର ଭୁବନ ଭତରା ଓ ୯ ନଂ. ୱାର୍ଡମେମ୍ବର ତୁଳାବତୀ ମୁଦୁଲିଙ୍କୁ ସମସ୍ତ ତଥ୍ୟ ଓ ସାକ୍ଷ୍ୟକୁ ଭିତ୍ତିକରି ଜିଲା ମାଜିଷ୍ଟ୍ରେଟ ଅଯୋଗ୍ୟ ଘୋଷିତ କରିଛନ୍ତି।