ବଡ଼ବିଲ,୧୧।୪(ସ୍ବ.ପ୍ର.): କେନ୍ଦୁଝର ଜିଲା ବଡ଼ବିଲ ବଜାର ମଧୁସୂଦନ ଛକ ନିକଟରେ ଅଗ୍ନିକାଣ୍ଡ ଘଟି ୩ଟି ଦୋକାନ ଘର ପୋଡ଼ିଜଳି ପାଉଁଶ ହୋଇଯାଇଥିବା ଜଣାପଡ଼ଛି। ଏକ ଟାୟାର ରିପ୍ୟାରିଂ ଦୋକାନ, ସାଇକେଲ ରିପ୍ୟାରିଂ ଦୋକାନ ଏବଂ ଫୁଲ ଦୋକାନ ଏହି ଅଗ୍ନିକାଣ୍ଡରେ ଭସ୍ମୀଭୂତ ହୋଇଯାଇଛି।
ମିଳିଥିବା ସୂଚନା ଅନୁଯାୟୀ, ରବିବାର ବଡ଼ି ଭୋର୍ ସମୟରେ ହଠାତ୍ ମଧୁସୂଦନ ଛକ ନିକଟରେ ଥିବା ଏହି ୩ ଦୋକାନରେ ନିଆଁ ଲାଗିଯାଇଥିଲା। ସ୍ଥାନୀୟ ଲୋକଙ୍କ ଠାରୁ ସୂଚନା ପାଇ ଦମକଳବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ଫଳରେ ସେହି ଦୋକାନ ନିକଟବର୍ତ୍ତୀ ବସ୍ତି ଓ ଅନ୍ୟାନ୍ୟ ଦୋକାନ ଅଗ୍ନିକାଣ୍ଡରୁ ବର୍ତ୍ତିଯାଇଥିବା ଜଣାପଡ଼ିଛି। ତେବେ ବିଦ୍ୟୁତ ଖୁଣ୍ଟ ଦୋହଲିବା ସହ ନିଆଁ ଝୁଲ ଟାୟାର ଦୋକାନ ଉପରେ ପଡ଼ିଥିଲା ଓ ଟାୟାର ରପ୍ୟାରିଂ ଦୋକାନରୁ ନିଆଁ ପାଖରେ ଥିବା ସାଇକେଲ ରିପ୍ୟାରିଂ ଦୋକାନ ଏବଂ ଫୁଲ ଦୋକାନକୁ ବ୍ୟାପିଥିଲା। ରାସ୍ତା କଡ଼ରେ ଥିବା ଏହି ବିଦ୍ୟୁତ୍ ଖୁଣ୍ଟକୁ କୌଣସି ଭାରୀଯାନ ଧକ୍କା ଦେବା ଯୋଗୁ ଏଭଳି ହୋଇଥିବା ଅନୁମାନ କରାଯାଉଛି।