ଖଡ଼ିଆଳ,୨୦।୮(ସୁଜିତ୍ କୁମାର ପ୍ରଧାନ)ନୂଆପଡ଼ା ଜିଲା ଖଡ଼ିଆଳ ବ୍ଲକ ଦୋହେଲପଡା ଗାଁର ନାଭ ରାଉତଙ୍କ ପରିବାରରେ ଦୁଃଖର ପାହାଡ଼ ପଡିଛି। ୩ ବର୍ଷ ତଳେ ରୋଗରେ ପଡ଼ି ସ୍ତ୍ରୀଙ୍କ ପରଲୋକ ପରେ ୩ କୁନି ଝିଅପୁଅକୁ ନେଇ ତାଙ୍କର ଅଭାବୀ ସଂସାର। ବଡ଼ ଝିଅ ଜେମତିଙ୍କୁ (୧୩), ଆଉ ଗୋଟିଏ ଝିଅ ଲିପିକା (୭) ଓ ସାନ ପୁଅ ଯୁବରାଜଙ୍କୁ ୪ ବର୍ଷ। ସ୍ତ୍ରୀ ନୁରଙ୍କ ମୃତ୍ୟୁ ପରେ ଦୁଃଖ କଷ୍ଟରେ ପୁଅ ଝିଅଙ୍କୁ ପାଳନ ପୋଷଣ କରୁଛନ୍ତି ନାଭ। ତାଙ୍କର ନା ଅଛି ଜମିବାଡ଼ି, ନା ଅଛି ଗାଁରେ କାମ କରିବାର ସୁଯୋଗ। ତେଣୁ ବଡ଼ଝିଅ ଜେମତିଙ୍କ ହାତରେ ଦୁଇ ଭଉଣୀଭାଇଙ୍କ ଦାୟିତ୍ୱ ଦେଇ ଦାଦନ ଖଟିବାକୁ ଯାଆନ୍ତି ନାଭ। କେବେ କେବେ ଆସି ସେମାନଙ୍କୁ ଦେଖି ଦେଇ ଯାଆନ୍ତି। ବାପାଙ୍କ ଅନୁପସ୍ଥିତିରେ ଜେମତି ଦୁଇ ଭଉଣୀଭାଇଙ୍କ ଦାୟିତ୍ୱ ନିଅନ୍ତି। ସେମାନଙ୍କ ସ୍ନାନ ଶୌଚ କରିବା ସହ ରାନ୍ଧି ଖୁଆଇ ଦିଅନ୍ତି। କେବେ କେବେ ଭୋକରେ ମଧ୍ୟ ଶୁଇ ଯାଆନ୍ତି ତିନିଜଣ। ବଡ଼ ଦୁଇ ଭଉଣୀ ପଢିବାକୁ ଯାଉ ନ ଥିବା ବେଳେ ସାନ ଯୁବରାଜ ଅଙ୍ଗନୱାଡି କେନ୍ଦ୍ର ଯାଏ। ନାଭ ୪ ବର୍ଷ ତଳେ ଆବାସ ଯୋଜନାରେ ଘର ଖଣ୍ଡେ ପାଇ ନିର୍ମାଣ ଆରମ୍ଭ କରିଥିଲେ, କିନ୍ତୁ ସ୍ତ୍ରୀ ରୋଗରେ ପଡିବା ପରେ ଘର କାମ ଆଉ ଆଗେଇଲାନି। ସେଥିପାଇଁ ନାଭଙ୍କ ବଡଭାଇଙ୍କ ଘରେ ୩ ଭାଇଭଉଣୀ ରହୁଛନ୍ତି। ବଡଭାଇଙ୍କ ପରିବାର ମଧ୍ୟ ଦାଦନ ଯାଇଛନ୍ତି। ରାଶନ କାର୍ଡରେ ମାତ୍ର ଦଶ କିଲୋଗ୍ରାମ ଚାଉଳ ମିଳେ। ଏତିକି ହିଁ ମାସକ ଚଳିବାର ସମ୍ବଳ ନାଭ ଓ ଜେମତିଙ୍କ ନାଁରେ ରାସନ ମିଳୁଥିବା ବେଳେ ଲିପିକା ଓ ଯୁବରାଜଙ୍କ ନାଁ ସଂଯୋଗ ହୋଇପାରିନି। ଗାଁରେ କର୍ମ ନିଯୁକ୍ତିର କୌଣସି ସୁବିଧା ନାହିଁ। ନାଭ ବାଧ୍ୟ ହୋଇ ଦାଦନ ଯାଆନ୍ତି। ତିନି ପୁଅ ଝିଅଙ୍କ ପାଇଁ ହୃଦୟ କାନ୍ଦୁଥିଲେ ମଧ୍ୟ ସେ ଛାତିକି ପଥର କରି ବାହାରେ ରହି କାମ କରନ୍ତି। ଦୋହେଲ ପଡା ସରପଞ୍ଚ ଦୀପିକା ବେହେରା ୩ଭାଇ ଭଉଣୀଙ୍କ ଥଇଥାନ ସକାଶେ ପ୍ରଶାସନ ନିକଟରେ ଦାବି କରିଥିବା ବେଳେ ବିଡ଼ିଓ ବିରସେନ ବେହେରା ସେମାନଙ୍କ ଥଇଥାନ ପାଇଁ ଜିଲା ଶିଶୁ ମଙ୍ଗଳ କମିଟି (ସିଡ୍ଲ୍ୟୁସି) ନୂଆପଡା ସହ କଥା ହେବେ ଓ ତାଙ୍କ ପରିବାରକୁ ଅନ୍ତ୍ୟଦୟ କାର୍ଡ ଯୋଗାଇ ଦେବେ ବୋଲି କହିଛନ୍ତି। ଗରିବଙ୍କ ପାଇଁ ସରକାର ଅନେକ ଯୋଜନା କରୁଥିବା ବେଳେ ନାଭଙ୍କ ପରିବାର ମଧ୍ୟ ଏବେ ସରକାରୀ ସହଯୋଗ ଅପେକ୍ଷାରେ। ତିନି ଭାଇ ଭଉଣୀଙ୍କୁ ଥଇଥାନ ସହ ଅନ୍ତ୍ୟଦୟ କାର୍ଡ ଖଣ୍ଡେ ଯୋଗାଇ ଦେଲେ ମଧ୍ୟ କିଛି ପରିମାଣରେ ଦୁଃଖ ତାଙ୍କର ଲାଘବ ହୋଇ ପାରନ୍ତା ବୋଲି ଗ୍ରାମବାସୀ କହନ୍ତି।