ରାଇରଙ୍ଗପୁର,୬।୯(ମନୋରଞ୍ଜନ ତିରିଆ): ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆହ୍ବାନ କ୍ରମେ ‘ମେରି ମାଟି, ମେରା ଦେଶ’ କାର୍ଯ୍ୟକ୍ରମ ନିମନ୍ତେ ଶହୀଦ୍ ଯବାନଙ୍କ ଘରୁ ପବିତ୍ର ମାଟି ସଂଗ୍ରହ କରାଯାଇଛି। ଏହି ମାଟିକୁ ଏକାଠି କରି ଦିଲ୍ଲୀସ୍ଥିତ ‘ରାଷ୍ଟ୍ରୀୟ ଯୁଦ୍ଧ ସ୍ମାରକୀ’ ନିକଟରେ ଶହୀଦଙ୍କ ସମ୍ମାନରେ ‘ଅମୃତ ବାଟିକା’ ନିର୍ମାଣ ନିମନ୍ତେ ଯୋଜନା ରଖାଯାଇଛି। କାର୍ଯ୍ୟକ୍ରମ ଦ୍ୱାରା ଅନୁପ୍ରାଣିତ ହୋଇ ବେଙ୍ଗାଲୁରୁର ଉମେଶ ଜୀ ନାମକ ଜଣେ ବ୍ୟକ୍ତି ସାରା ଭାରତ ଭ୍ରମଣ କରି ବିଭିନ୍ନ ପ୍ରାନ୍ତର ଶହୀଦମାନଙ୍କ ଗଁାରୁ ମାଟି ସଂଗ୍ରହ କରି ବେଙ୍ଗାଲୁରୁ ନିକଟରେ ଗୋଟିଏ ଶହୀଦ ସ୍ମାରକ ନିର୍ମାଣ କରିବାକୁ ଯାଉଛନ୍ତି। ଏହି ଅବସରରେ ମୟୂରଭଞ୍ଜ ଜିଲା ଯଶିପୁର ଥାନା ତିଳକୁଟି ପଞ୍ଚାୟତ ଅନ୍ତର୍ଗତ ଶିରାକୋଳି ଗ୍ରାମର କାର୍ଗିଲ ଯୁଦ୍ଧରେ ଶହୀଦ ଯବାନ୍ ବୁଧୁରାମ ହେସାଃ, ଗୋଡ଼ାପଳସା ପଞ୍ଚାୟତ ବଣସାହିର ଛତିଶଗଡ଼ର ଦାନ୍ତେୱାଡ଼ାଠାରେ ନକ୍ସଲଙ୍କ ଆକ୍ରମଣରେ ଶହୀଦ ପାଣୁରାମ ନାୟକ ଏବଂ ଫୁଲୱାମାଠାରେ ଶହୀଦ ହୋଇଥିବା ରାଇରଙ୍ଗପୁର ସହର ସନ୍ନିକଟ ବଡ଼ଚମ୍ପାଉଦାର ଯବାନ୍ ନୁନ୍ଦୁରାମ ସୋରେନ୍ଙ୍କ ଘରୁ ପବିତ୍ର ମାଟିକୁ ଯଶିପୁର ନିବାସୀ ଅବସରପ୍ରାପ୍ତ ମେଜର ଦେବେନ୍ଦ୍ରନାଥ ଦାସ ଗ୍ରହଣ କରିଛନ୍ତି। ସହିଦ୍ ନୁନ୍ଦୁରାମ ସୋରେନ୍ଙ୍କ ରାଇରଙ୍ଗପୁର ସହର ଉପକଣ୍ଠସ୍ଥ ବଡ଼ଚମ୍ପାଉଦା ଗ୍ରାମର ସହିଦ ଘରୁ ମାଟି ସଂଗ୍ରହ କରାଯାଇ ଏହାକୁ ମେଜର ଦାସଙ୍କୁ ରାଇରଙ୍ଗପୁର ଟ୍ୟାକ୍ସି ଷ୍ଠାଣ୍ଡ ନିକଟରେ ଥିବା ନୁନ୍ଦୁରାମଙ୍କ ପ୍ରତିମୂର୍ତ୍ତି ନିକଟରେ ଅର୍ପଣ କରାଯାଇଥିଲା। ଶହୀଦ ନୁନ୍ଦୁରାମ ମେମୋରିଆଲ୍ ଟ୍ରଷ୍ଟର ମୁଖ୍ୟ ମନୋରଞ୍ଜନ ହଁାସଦା, ଉପଦେଷ୍ଟା କ୍ୟାପ୍ଟେନ୍ ମହେନ୍ଦ୍ରନାଥ ମହାନ୍ତ ଶହୀଦଙ୍କ ମାଟିକୁ ମେଜର ଦାସଙ୍କୁ ଅର୍ପଣ କରିଥିଲେ। ଏହି ଅବସରରେ ରାଇରଙ୍ଗପୁର ପୌରାଧ୍ୟକ୍ଷ ଅଭିଷେକ ପଟ୍ଟନାୟକ, ବିଜେଡି ଜିଲା ସଭାପତି କାଶୀନାଥ ହେମ୍ବ୍ରମ, ଶହୀଦ ନୁନ୍ଦୁରାମଙ୍କ ଭାଇ ଡମାନ ସୋରେନ୍ ଓ ଦାସମାତ୍ ସୋରେନ୍, ମୁଚିରାମ ମାଝୀ, ଅଧ୍ୟାପକ ବିଜୟ କୁମାର ରାମ, ପୂର୍ବତନ ବିଧାୟକ ସାଇବା ସୁଶୀଲ କୁମାର ହଁାସଦା, ବିଜୁ ଜନତା ଦଳ ମହିଳା ଶାଖାର ଜିଲା ସଭାପତି ତନୁଜା ମହାନ୍ତ, ଅଞ୍ଜଳୀ ସୋରେନ୍, ପଙ୍କଜ ଦାସ, ବିଶିକେଶନ୍ ମହାନ୍ତ, ଦୀପୁ ମହାନ୍ତ ପ୍ରମୁଖ ଉପସ୍ଥିତ ଥିଲେ।
