କେପ୍ ଟାଉନ୍, ୨୦ା୧୧ (ପି.ଟି.)-ଇଂଲଣ୍ଡ ବିପକ୍ଷ ହ୍ବାଇଟ୍ ବଲ୍ ସିରିଜ ପୂର୍ବରୁ କରାଯାଇଥିବା କୋଭିଡ୍ ଟେଷ୍ଟରେ ଜଣଙ୍କର ପଜିଟିଭ ଆସିବାରୁ ଦକ୍ଷିଣ ଆଫ୍ରିକା ପୁରୁଷ କ୍ରିକେଟ ଦଳର ୩ ଜଣ ଖେଳାଳିଙ୍କୁ ଆଇସୋଲେଶନରେ ରଖାଯାଇଛି। କ୍ରିକେଟ ସାଉଥ ଆଫ୍ରିକା (ସିଏସ୍ଏ) ତରଫରୁ ଖେଳାଳି ତ୍ରୟଙ୍କ ନାମ ପ୍ରକାଶ କରାଯାଇ ନାହିଁ। ନଭେମ୍ବର ୨୭ରୁ ଆରମ୍ଭ ହେବାକୁଥିବା ସୀମିତ ଓଭର ସିରିଜ ପୂର୍ବରୁ ଏଠାରେ ଜୈବ-ସୁରକ୍ଷିତ ଅଞ୍ଚଳରେ ପ୍ରବେଶ ପୂର୍ବରୁ ଖେଳାଳି ସପୋର୍ଟ ଷ୍ଟାଫ୍ଙ୍କର ମୋଟ ୫୦ ଆରଟିପିସିଆର ଟେଷ୍ଟ ହୋଇଥିଲା। ଜଣେ ଖେଳାଳିଙ୍କର ପଜିଟିଭ ଆସିବା ପରେ ତାଙ୍କ ସଂସ୍ପର୍ଶରେ ଆସିଥିବା ଅନ୍ୟ ଦୁଇଜଣ ଖେଳାଳିଙ୍କୁ ସତର୍କତାମୂଳକ ପଦକ୍ଷେପ ସ୍ବରୂପ ଡାକ୍ତରୀ ଦଳ ତତ୍ତ୍ୱାବଧାନରେ ରଖାଯାଇଥିବା ସିଏସ୍ଏ ପ୍ରକାଶ କରିଛି। ଏହି ୩ ଜଣ ଖେଳାଳିଙ୍କ ନିକଟରେ କୌଣସି ଲକ୍ଷଣ ଦେଖାଯାଇ ନ ଥିଲା। ଇଂଲଣ୍ଡ ଓ ଦକ୍ଷିଣ ଆଫ୍ରିକା ମଧ୍ୟରେ ତିନୋଟି ଅନ୍ତର୍ଜାତୀୟ ଟି୨୦ ଏବଂ ସମାନ ସଂଖ୍ୟକ ଅନ୍ତର୍ଜାତୀୟ ଦିନିକିଆ ଖେଳାଯିବାର କାର୍ଯ୍ୟକ୍ରମ ରହିଛି। ଏହି ୩ ଖେଳାଳିଙ୍କ ସ୍ଥାନରେ ବଦଳ ଖେଳାଳି ନେବା ସମ୍ପର୍କରେ କୌଣସି ନିଷ୍ପତ୍ତି ହୋଇ ନାହିଁ। ତେବେ ସପ୍ତାହ ଶେଷରେ ଇଣ୍ଟ୍ରା-ସ୍କ୍ବାର୍ଡ ଓ୍ବାର୍ମଅପ୍ ପାଇଁ ଦୁଇ ଜଣ ନୂଆ ଖେଳାଳିଙ୍କୁ ସାମିଲ କରାଯାଇଛି।
