ରାୟଗଡ଼ା ଅଫିସ,୨୬ା୫: ସ୍ପେଶାଲ ଟାସ୍କ ଫୋର୍ସ(ଏସ୍ଟିଏଫ୍) ଟିମ୍ ଦ୍ୱାରା ଗୁରୁବାର ରାୟଗଡ଼ାରୁ ୩ କଲରାପତରିଆ ବାଘ ଛାଲ ଜବତ କରାଯାଇଛି। ଘଟଣାରେ ସମ୍ପୃକ୍ତ ଡମ୍ବୁରୁଧର ମାଝିଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି। ରାୟଗଡ଼ା ଜିଲା କାଶୀପୁର ବ୍ଲକ ଟିକିରି ଥାନା ଅନ୍ତର୍ଗତ ନାକଟିଗୁଡ଼ା ହୁଣ୍ଡିବର ଗ୍ରାମରେ ଅଭିଯୁକ୍ତ ଡମ୍ବୁରୁଧରଙ୍କ ଘର ବୋଲି ଜଣାପଡିଛି। ଏଥିସହ ଜବତ ବାଘଛାଲକୁ ପରୀକ୍ଷା ନିମନ୍ତେ ଡେରାଡୁନ୍ସ୍ଥିତ ବନ୍ୟଜନ୍ତୁ ପରୀକ୍ଷାଗାରକୁ ପଠାଯିବ ବୋଲି ଏସ୍ଟିଏଫ୍ ତରଫରୁ ଗଣମାଧ୍ୟମକୁ ସୂଚନା ଦିଆଯାଇଛି। ଏସ୍ଟିଏଫ୍ ଟିମ୍ ପକ୍ଷରୁ ପ୍ରେସ୍ ବିଜ୍ଞପ୍ତିରେ ଉଲ୍ଲେଖ ରହିଛି, ଏକ ବିଶେଷ ସୂତ୍ରରୁ ଖବର ପାଇ ଏସ୍ଟିଏଫ୍ ଟିମ୍ ଗୁରୁବାର ୩୨୬ନମ୍ବର ଜାତୀୟ ରାଜପଥର ରାୟଗଡ଼ା ଜିଲା ସଦର ଥାନା ଅନ୍ତର୍ଗତ ଶିରିଗୁଡ଼ା ନିକଟସ୍ଥ ସ୍ବର୍ଗଧାମ ଛକଠାରେ ଡମ୍ବୁରୁଧର ନାମକ ଅଭିଯୁକ୍ତ ଶୀକାର କରି ଆଣିଥିବା ବାଘ ଛାଲର ଡିଲ୍ କରୁଥିଲେ। ଏହି ସମୟରେ ଏସ୍ଟିଏଫ ଟିମ୍ ଅଚାନକ ଚଢାଉ କରି ଘଟଣାସ୍ଥଳରୁ ଡମ୍ବୁରୁଧରଙ୍କୁ ଗିରଫ କରିବା ସହ ତାଙ୍କଠାରୁ ୩ଟି ବାଘ ଛାଲ ସହ ଅନ୍ୟ କିଛି ଆପରାଧିକ ସାମଗ୍ରୀ ଜବତ କରିଥିଲା। ଗିରଫ ପରେ ରାୟଗଡ଼ା ଏସ୍ଡିଜେଏମ୍ଙ୍କ କୋର୍ଟ ଚାଲାଣ କରାଯାଇଥିଲା ା