ଜେନେଭା, ୧୩ା୧୦: ଶୂନ ଅଙ୍ଗାରକାମ୍ଳ ନିର୍ଗମନ ବା ଜିରୋ କାର୍ବନ ଏମିଶନ ଲକ୍ଷ୍ୟ ହାସଲ ପାଇଁ ପୁନଃ ବ୍ୟବହାରଯୋଗ୍ୟ ଶକ୍ତିରେ ବୈଶ୍ୱିକ ନିବେଶ ୨୦୫୦ ସୁଦ୍ଧା ୩ ଗୁଣା ବଢ଼ିବା ଆବଶ୍ୟକ ବୋଲି ବିଶ୍ୱ ପାଣିପାଗ ସଂସ୍ଥା (ଡବ୍ଲ୍ୟୁଏମ୍ଓ) ପକ୍ଷରୁ ଜାରି ଏକ ରିପୋର୍ଟରେ କୁହାଯାଇଛି। ସ୍ବଚ୍ଛ ଶକ୍ତି ଉତ୍ସରୁ ବିଦ୍ୟୁତ ଉତ୍ପାଦନ ଓ ଯୋଗାଣ ଆସନ୍ତା ୮ ବର୍ଷରେ ଦୁଇଗଣା ହେବା ଜରୁରୀ ବୋଲି ଡବ୍ଲ୍ୟୁଏମ୍ଓ ମହାନିର୍ଦ୍ଦେଶକ ପେଟେରି ତାଲାସ୍ କହିଛନ୍ତି।
୨୦୨୨ ଷ୍ଟେଟ୍ କ୍ଲାଇମେଟ୍ ସର୍ଭିସ ରିପୋର୍ଟ ଅନୁସାରେ, ଜଳବାୟୁ ପରିବର୍ତ୍ତନ ଯୋଗୁ ବୈଶ୍ୱିକ ଶକ୍ତି ନିରାପତ୍ତା ପ୍ରତି ବିପଦ ସୃଷ୍ଟି ହୋଇଛି। ଏହା ସିଧାସଳଖ ଭାବେ ଇନ୍ଧନ ଯୋଗାଣ, ଶକ୍ତି ଉତ୍ପାଦନ ଏବଂ ଶକ୍ତି ଭିତ୍ତିଭୂମିକୁ ପ୍ରଭାବିତ କରୁଛି। ଗ୍ଲୋବାଲ ସ୍କେଲ୍ରେ ଜଳ ଉତ୍ସ କମ୍ ଥିବାବେଳେ ୨୦୨୦ରେ ୮୭% ବୈଶ୍ୱିକ ବିଦ୍ୟୁତ୍ ଆବଶ୍ୟକତା ଥର୍ମାଲ, ନ୍ୟୁକ୍ଲିୟର ଏବଂ ହାଇଡ୍ରୋଇଲେକ୍ଟ୍ରିକ୍ ସିଷ୍ଟମ୍ରୁ ଉତ୍ପାଦନ ନିମନ୍ତେ ଜଳର ଉପଲବ୍ଧତା ଉପରେ ନିର୍ଭରଶୀଳ ଥିଲା। କୁଲିଂ ପାଇଁ ମଧୁର ଜଳ ଉପରେ ନିର୍ଭର କରୁଥିବା ପ୍ରାୟ ୩୩% ଥର୍ମାଲ ପାଓ୍ବାର ପ୍ଲାଣ୍ଟ୍ ଜଳ ନିଅଣ୍ଟ କ୍ଷେତ୍ରରେ ରହିଛି। ସେହିପରି ପ୍ରାୟ ୧୫% ନ୍ୟୁକ୍ଲିୟର ପାଓ୍ବାର ପ୍ଲାଣ୍ଟ୍ରେ ମଧ୍ୟ ଅନୁରୂପ ଆବଶ୍ୟକତା ରହିଛି। ଆସନ୍ତା ୨୦ ବର୍ଷରେ ଏହା ୨୫%କୁ ବୃ୍ଦ୍ଧି ପାଇପାରେ।
ମୋଟ ବୈଶ୍ୱିକ ସବୁଜଗୃହ ଗ୍ୟାସ୍ ନିର୍ଗମନର ୩ ଚତୁର୍ଥାଂଶ। ଏକବିଂଶ ଶତାବ୍ଦୀରେ ଶକ୍ତି ଦକ୍ଷତା ବୃଦ୍ଧି ନିମନ୍ତେ ଆମକୁ ସୌର, ପବନ ଶକ୍ତି, ହାଇଡ୍ରୋପାଓ୍ବାର ଭଳି ସ୍ବଚ୍ଛ ଏନର୍ଜୀ ଉତ୍ସକୁ ବ୍ୟବହାର କରିବା ନିହାତି ଆବଶ୍ୟକ ବୋଲି ଡବ୍ଲ୍ୟୁଏମ୍ଓ ମହାନିର୍ଦ୍ଦେଶକ ପେଟେରି କହିଛନ୍ତି। ସମୟ ଆମ ସପକ୍ଷରେ ନାହିଁ। ଆମ ଆଖି ଆଗରେ ଜଳବାୟୁରେ ବିପଜ୍ଜନକ ପରିବର୍ତ୍ତନ ହେଉଛି। ଗ୍ଲୋବାଲ ଏନର୍ଜୀ ସିଷ୍ଟମର ସମ୍ପୂର୍ଣ୍ଣ ରୂପାନ୍ତର କରିବା ଜରୁରୀ ବୋଲି ସେ ପ୍ରକାଶ କରିଛନ୍ତି। ଆଗକୁ ସୌର ଶକ୍ତି ସର୍ବାଧିକ ବ୍ୟବହାର ହେବାକୁ ଥିବା ଉତ୍ସ ହେବାକୁ ଯାଉଛି। ପୁନଃନବୀକରଣ ଯୋଗ୍ୟ ଶକ୍ତି ଆବଶ୍ୟକତା ଗ୍ୟାପ୍କୁ ପୂର୍ଣ୍ଣ କରିବାରେ ଆଫ୍ରିକା ନିକଟରେ ବଡ଼ ସୁଯୋଗ ରହିଛି। ସମସ୍ତ ଆଫ୍ରିକୀୟଙ୍କ ନିକଟରେ ମର୍ଡନ ଏନର୍ଜୀ ପହଞ୍ଚାଇବାକୁ ହେଲେ ବାର୍ଷିକ ପ୍ରାୟ ୨୫ ବିଲିୟନ ଡଲାରର ନିବେଶ ଆବଶ୍ୟକ, ଯାହାକି ଏବେର ଗ୍ଲୋବାଲ ଏନର୍ଜୀ ଇନ୍ଭେଷ୍ଟମେଣ୍ଟ୍ର ୧% ବୋଲି ରିପୋର୍ଟରେ କୁହାଯାଇଛି।