ବଅଁରପାଳ, ୩ା୨ (ଡି.ଏନ.ଏ.):ଅନୁଗୋଳ ଜିଲା ନାଲ୍କୋରେ ଜଳ ସଙ୍କଟ ଦେଖା ଦେଇଛି। ବ୍ରାହ୍ମଣୀରୁ ଆବଶ୍ୟକତା ଅନୁଯାୟୀ କାରଖାନାକୁ ପାଣି ଆସିପାରୁ ନ ଥିବାରୁ କ୍ୟାପଟିଭ୍ ପାଓ୍ବାର ପ୍ଲାଣ୍ଟ (ସିପିପି)ର ୩ଟି ୟୁନିଟ୍ ଅଚଳ ହୋଇପଡ଼ିଛି। ଫଳରେ ବିଦ୍ୟୁତ୍ ଉତ୍ପାଦନ ହ୍ରାସ ପାଇଛି।
ପ୍ରକାଶ ଯେ, ନାଲ୍କୋ ସିପିପିରେ ୧୦ଟି ୟୁନିଟ୍ରୁ ଦୈନିକ ୧୨ଶହ ମେଗାଓ୍ବାଟ୍ ବିଦ୍ୟୁତ୍ ଶକ୍ତି ଉତ୍ପାଦନ ହୋଇଥାଏ। ଏଥିପାଇଁ ଦୈନିକ ୭୦ ହଜାର କ୍ୟୁସେକ ଜଳ ଆବଶ୍ୟକ ପଡ଼ିଥାଏ। ସେହିପରି ସ୍ମେଲଟର ପାଇଁ ୨୦ ହଜାର କ୍ୟୁସେକ ଓ ଟାଉନଶିପ୍ରେ ବ୍ୟବହାର ପାଇଁ ୧୦ ହଜାର କ୍ୟୁସେକ ପାଣି ନାଲ୍କୋ ଇନ୍ଟେକ ପମ୍ପ ହାଉସ ଦ୍ୱାରା ଆସିଥାଏ। କିନ୍ତୁ ଇନ୍ଟେକ୍ ପମ୍ପ ହାଉସ ଏବେ ବ୍ରାହ୍ମଣୀରୁ ଆବଶ୍ୟକ ପରିମାଣର ଜଳ କାରଖାନାକୁ ଯୋଗାଣ କରିପାରୁ ନାହିଁ। ସିପିପି ପାଇଁ ୭୦ ହଜାର ସ୍ଥାନରେ ୬୦ ହଜାର କ୍ୟୁସେକ ଜଳ ଆସୁଥିବାରୁ ପ୍ଲାଣ୍ଟର ଟର୍ବାଇନ ଚଳାଇବାରେ ଅସୁବିଧା ହେଉଛି। ଏଥିଯୋଗୁ ୧୦ଟି ୟୁନିଟ୍ ମଧ୍ୟରୁ ୩ଟି ଅଚଳ ରହିଛି। ଏହାଦ୍ୱାରା ଦୈନିକ ୩୬୦ ମେଗାଓ୍ବାଟ୍ ବିଦ୍ୟୁତ୍ ଉତ୍ପାଦନ ହ୍ରାସ ପାଇଛି। ବ୍ରାହ୍ମଣୀରୁ ଯୋଗାଣ ହେଉଥିବା ପାଣି ବାଟମାରଣା ହେଉଥିବାରୁ ନାଲ୍କୋରେ ଜଳ ସଂକଟ ସୃଷ୍ଟି ହୋଇଥିବା ବରିଷ୍ଠ ଶ୍ରମିକ ନେତା ଗନ୍ଧର୍ବ ବିଶ୍ୱାଳ ଅଭିଯୋଗ କରିଛନ୍ତି। ଏ ସମ୍ପର୍କରେ ଡିଜିଏମ୍ ସୁନୀଲ ମହାପାତ୍ର କହିଛନ୍ତି, ସିପିପିରେ ବର୍ତ୍ତମାନ ଜଳ ସଂକଟ ଦେଖାଦେଇଛି। ତେଣୁ ୩ଟି ୟୁନିଟ୍ ଅଚଳ ହୋଇପଡିଛି।
