ଲକ୍ଷ୍ନୌ, ୯ା୪- କୋଭିଡ୍ ଟିକା ନେବା ପାଇଁ ସରକାରୀ ମେଡିକାଲ ଯାଇଥିଲେ ୩ ବୃଦ୍ଧା। କିନ୍ତୁ ସେମାନଙ୍କୁ ମେଡିକାଲ ସ୍ବାସ୍ଥ୍ୟ କର୍ମୀ ଦେଇଛନ୍ତି କୁକୁର କାମୁଡ଼ା ଇଞ୍ଜେକଶନ। ସ୍ବାସ୍ଥ୍ୟ କର୍ମୀଙ୍କ ଖାମଖିଆଲି ମନୋଭାବ ଯୋଗୁ ଉତ୍ତର ପ୍ରଦେଶର ଶାମଲି ଜିଲାରେ ଘଟିଛି ଏଭଳି ଘଟଣା। ତଦନ୍ତ ପରେ ରାଜ୍ୟ ସରକାର ଏହା ଜାଣିବାକୁ ପାଇଛନ୍ତି।
ସରୋଜ (୭୦), ଅନାରକଲି (୭୨) ଓ ସତ୍ୟଓ୍ବତୀ (୬୦) ଶାମଲି ଜିଲାର ସ୍ବାସ୍ଥ୍ୟ କେନ୍ଦ୍ରରୁ ଫେରିବା ପରେ ଅସୁସ୍ଥ ହୋଇ ପଡ଼ିଥିଲେ।
ଆମ ପାଖରେ ଘଟଣାର ପୂରା ରିପୋର୍ଟ ଅଛି। କୋଭିଡ୍ ଭାକ୍ସିନ ନେବାକୁ ଆସିଥିବା ମହିଳାଙ୍କୁ ଭୁଲ ବଶତଃ ଦିଆଯାଇଛି କୁକୁର କାମୁଡ଼ା ଇଞ୍ଜେକଶନ। ସେମାନଙ୍କୁ ପ୍ରଥମ ମହଲା ଯିବାର ଥିଲା। କିନ୍ତୁ ସିଧା ଓପିଡିରେ ପହଞ୍ଚିଥିଲେ ୩ ବୃଦ୍ଧା। ବ୍ୟକ୍ତିଗତ କାରଣ ଯୋଗୁ ବାହାରକୁ ଚାଲିଯାଇଥିଲେ ଫାରାମାସିଷ୍ଟ। ‘ଜନ ଔଷଧି କେନ୍ଦ୍ର’ରେ ଅନ୍ୟ ଜଣେ ଲୋକ ଦେଇଥିଲେ କୁକୁର କାମୁଡ଼ା ଇଞ୍ଜେକ୍ଶନ ବୋଲି ଜିଲା ମାଜିଷ୍ଟ୍ରେଟ୍ ଯଶଜୀତ କୌର କହିଛନ୍ତି। ଉକ୍ତ ବ୍ୟକ୍ତି ଇଞ୍ଜେକଶନ ଦେବା ପୂର୍ବରୁ ୩ ମହିଳାଙ୍କୁ କିଛି ପଚାରି ନ ଥିଲେ, ଯାହାକି ତଦନ୍ତରୁ ସାମ୍ନାକୁ ଆସିଛି। ଏଣୁ ଉକ୍ତ ଫାର୍ମାସିଷ୍ଟକୁ ନିଲମ୍ବିତ କରିବା ପାଇଁ ମେଡିକାଲ ମୁଖ୍ୟ ଅଫିସର(ସିଏମ୍ଓ)ଙ୍କୁ ନିର୍ଦ୍ଦେଶ ଦେଇଛି।