କେସିଙ୍ଗା,୧୫।୯(ତୁମେଶ୍ୱର ସାହୁ): ଆଉ କିଛି ଦିନ ପରେ ପଶ୍ଚିମ ଓଡ଼ିଶାର ମହାନ କୃଷି ଭିତ୍ତିକ ଗଣପର୍ବ ନୂଆଁଖାଇ ପାଳନ କରାଯିବ। ଏନେଇ ଗାଁଠୁ ସହର ସବୁଠି ଚଳଚଞ୍ଚଳ। ହେଲେ ଏହି ପରିପ୍ରେକ୍ଷୀରେ କଳାହାଣ୍ଡି ଜିଲା ପଥର୍ଲା, ବହାଦୁରପଦର ସମେତ ପଲକାପଡ଼ା ବାସୀ ନୂଆଁଖାଇ ପୂର୍ବରୁ ଶୁକ୍ରବାର ନବାନ୍ନ ଭକ୍ଷଣ କରି ହସଖୁସିରେ ନୂଆଁଖାଇ ପାଳନ କରିଛନ୍ତି।
ଗଙ୍ଗବଂଶୀୟ ରାଜରାଜୁଡ଼ା ସମୟରୁ ପଥର୍ଲା, ବହାଦୁରପଦର ସମେତ ପଲକାପଡ଼ା ଗ୍ରାମବାସୀ ପ୍ରତିବର୍ଷ ଭାଦ୍ରବ ସପ୍ତପୁରୀ ଅମାବାସ୍ୟା ପ୍ରତିପଦରେ ପଥର୍ଲା ଗୌନ୍ତିଆଙ୍କ ଆଦେଶରେ ପ୍ରଥମେ ଅଞ୍ଚଳରେ ନୂଆଁଖାଇ ପର୍ବ ପାଳନ କରିଆସୁଛନ୍ତି। ପୂର୍ବ ନିର୍ଦ୍ଧାରିତ ସମୟ ଅନୁସାରେ ଅଞ୍ଚଳର ଅଧିଷ୍ଠାତ୍ରୀ ଦେବୀଙ୍କଠାରେ ନବାନ୍ନ ଭୋଗ ଲାଗି କରାଯାଇଥାଏ।
ପରେ ଗ୍ରାମର ମୁଖ୍ୟ ପୂଜକଙ୍କ ଘରେ ନୂଆ ଧାନର ଚୁଡାକୁ କୁରେଇ ପତ୍ରରେ ରଖି ଖିରି, ପିଠା ଆଦି ଗ୍ରାମ ଦେବଦେବୀଙ୍କ ପାଖେ ଭୋଗ ଅର୍ପଣ ପରେ ଗ୍ରାମର ପ୍ରତ୍ୟେକ ଘରେ ନୂଆଁ ଖାଇଥାନ୍ତି। ପରେ ନୂଆଁଖାଇ ଜୁହାର ସହ ଭେଟ୍ଘାଟ୍ କାର୍ଯ୍ୟକ୍ରମ ହୋଇଥାଏ।