ପଟ୍ଟାଙ୍ଗି,୩ା୪(ଡି.ଏନ.ଏ.): ନିଜ ଅଞ୍ଚଳରେ କାମ କଲେ ଟଙ୍କା ଠିକ ସମୟରେ ମଜୁରି ମିଳୁନାହିଁ। ବାହାର ରାଜ୍ୟରେ କାମ କଲେ ପରିଶ୍ରମର ଉଚିତ୍ ମଜୁରି ମିଳିବ ଏହି ଉଦ୍ଦେଶ୍ୟ ନେଇ ବାହାର ରାଜ୍ୟକୁ କାମ କରିବାକୁ ଯାଇଥିବା ଦାଦନ ଶ୍ରମିକମାନେ ନିର୍ଯାତନାର ଶିକାର ହୋଇଛନ୍ତି। ପାରିଶ୍ରମିକ ନ ପାଇ ମାଡ଼ ଖାଇ ଚାଲିଚାଲି ଗ୍ରାମକୁ ଫେରିଛନ୍ତି। ସେମାନେ ଫେରୁଥିବା ବେଳେ ସେମାନଙ୍କୁ କୋରାପୁଟ ଜିଲା ପଟ୍ଟାଙ୍ଗି ଛକରେ ଭେଟିଛନ୍ତି ଓଡ଼ିଶା ମୋଟର ଚାଳକ ସଂଘ କର୍ମକର୍ତ୍ତା ଓ ଖବରଦାତମାନେ। ସେମାନେ ଏହି ୩ ଶ୍ରମିକଙ୍କ ନବରଙ୍ଗପୁର ପର୍ଯ୍ୟନ୍ତ ଯିବା ବ୍ୟବସ୍ଥା କରିଛନ୍ତି।
ଖବରରୁ ଜଣାପଡିଛି, କଳାହାଣ୍ଡି ଜିଲା ଜୟପାଟଣା ବ୍ଲକ ଟିଙ୍ଗପକାନ ଗ୍ରାମର ୧୨ଜଣ ଶ୍ରମିକ ଖୋର୍ଦ୍ଧା ଜିଲା ବାଲୁଗାଁ ଅଞ୍ଚଳର ଜଣେ ଠିକାଦାର ରାମକୃଷ୍ଣ ପ୍ରଧାନଙ୍କ ମାଧ୍ୟମରେ ଦାଦନ ଶ୍ରମିକ ରୂପେ କାମ କରିବାକୁ ୨ମାସ ତଳେ ବେଙ୍ଗାଲୁରୁ ଯାଇଥିଲେ। ସେଠାରେ ଏକ କମ୍ପାନୀରେ ସମସ୍ତେ କାମ କରୁଥିଲେ। ତେବେ ଟିଙ୍ଗଲକାନ ଗ୍ରାମର ଶ୍ରମିକ କାତାର ମାଝୀ, ବୁଦୁ ମାଝୀ ଏବଂ ଭିକାରୀ ମାଝୀ ନିଜ ପାରିଶ୍ରମିକ କମ୍ପାନୀ କର୍ତ୍ତୃପକ୍ଷଙ୍କୁ ମାଗିବାରୁ ସେମାନଙ୍କ ଉପରେ ନିର୍ଯାତନା ଆରମ୍ଭ ହୋଇଥିଲା। କମ୍ପାନୀ କର୍ତ୍ତୃପକ୍ଷ ସେମାନଙ୍କୁ ମାଡ଼ ମାରିବା ସହ ସେମାନଙ୍କ ଖାଇବା ବନ୍ଦ କରି ଦେଇଥିଲେ। ଏହା ସହି ନ ପାରି ଶେଷରେ ସେମାନେ କମ୍ପାନୀରୁ ଲୁଚି ୨୬ ତାରିଖରେ ନିଜ ଗ୍ରାମ ଟିଙ୍ଗପକାନ ଅଭିମୁଖେ ବାହାରି ଆସିଥିଲେ। ସେମାନେ ଚାଲିଚାଲି ଆସି କୋରାପୁଟ ଜିଲା ପଟ୍ଟାଙ୍ଗି ବ୍ଲକର ପଡାଲଗୁଡା ଗ୍ରାମ ଛକରେ ପହଞ୍ଚତ୍ ସେଠାରେ ଏକ ଦୋକାନ ମାଲିକଙ୍କୁ ସମସ୍ତ ଘଟଣା ଜଣାଇଥିଲେ। ଶ୍ରମିକମାନଙ୍କ ଦୁଃଖ ଶୁଣି ଦୋକାନ ମାଲିକ ତଥା ଓଡିଶା ମୋଟର ଚାଳକ ସଂଘ ପଟ୍ଟାଙ୍ଗି ଶାଖାର କାର୍ଯ୍ୟକାରୀ ସଭାପତି ଭଗବାନ ପଡାଲ ସେମାନଙ୍କ ଖାଇବା ବ୍ୟବସ୍ଥା କରିଥିଲେ। ଏସମ୍ପର୍କରେ ଖବର ପାଇ ଗଣମାଧ୍ୟମ ପ୍ରତିନିଧି ଓ ସଂଘ ସଭାପତି ଅର୍ଜୁନ ଖରା, ସାଧାରଣ ସମ୍ପାଦକ ଶରତ କୁମାର ଧଳ, କୋଷାଧ୍ୟକ୍ଷ ଏମ. ଉମା ମହେଶ୍ବର ଓ ତ୍ରିନାଥ ଗେମେଲ ସେଠାରେ ପହଞ୍ଚତ୍ଥିଲେ। ସମସ୍ତେ ମିଶି ତିନି ଶ୍ରମିକଙ୍କୁ ୧୫ଶହ ଟଙ୍କା ସହାୟତା ଦେଇ ଏକ ଗାଡି ଯୋଗେ ସେମାନଙ୍କୁ ନବରଙ୍ଗପୁର ଜିଲା ପର୍ଯ୍ୟନ୍ତ ପଠାଇବା ବ୍ୟବସ୍ଥା କରିଥିଲେ।