ଭଦ୍ରକ ଅଫିସ, ୨୬।୨- ୩ ବର୍ଷ ବୟସରେ ସ୍ବତନ୍ତ୍ର ମଡେଲ ପାଇଁ ଜିଲା, ରାଜ୍ୟ ଓ ଦେଶ ପାଇଁ ଗୌରବ ଆଣିଛନ୍ତି। ଆସନ୍ତା ଜୁଲାଇରେ ନେପାଳରେ ହେବାକୁ ଥିବା ଅନ୍ତର୍ଜାତୀୟ ମଡେଲ ପ୍ରତିଯୋଗିତା ନିମନ୍ତେ ସର୍ବଭାରତୀୟ ଶିଶୁ ବର୍ଗରୁ ଚୟନ ହୋଇଛନ୍ତି। ଏହି ଶିଶୁ ପ୍ରତିଭା ହେଲେ ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ବିରିଡ଼ି ଗ୍ରାମର ସାଇ ଶ୍ରେୟାଂସୁ ପଣ୍ଡା(କାହ୍ନା)। ଜନ୍ମଜାତ ଗୁଣ ଓ ଅବିଶ୍ୱସନୀୟ ପରିପ୍ରକାଶ ଶୈଳୀ ଯୋଗୁ ରାଜ୍ୟ ଓ ଦେଶର ଏକମାତ୍ର ଶୈଶବ ଆନ୍ତର୍ଜାତିକ ମଡେଲ ପ୍ରତିଯୋଗୀ ହେବାର ସେ ଗୌରବ ଅର୍ଜନ କରିଛନ୍ତି। ଯେଉଁଥିପାଇଁ ଏବେ ଚାରିଆଡ଼େ ତାଙ୍କର ପ୍ରଶଂସା। ମାତ୍ର ଦେଢ଼ ବର୍ଷ ବୟସରୁ ନୃତ୍ୟ, ମଡେଲ କଳା, ଫଟୋ ପୋଜିଂରେ ଆଗ୍ରହ ଦେଖାଇବାରୁ ବାପା ଶ୍ରୀରାମ ପଣ୍ଡା ଓ ମା’ ପୁଷ୍ପାଞ୍ଜଳି ଏଥିପାଇଁ ବ୍ୟବସ୍ଥା ଆରମ୍ଭ କରିଥିଲେ। ଜେଜେବାପା ସୁଶାନ୍ତ ପଣ୍ଡା ଓ ଜେଜେମା’ ଶିକ୍ଷୟିତ୍ରୀ ପ୍ରମିଳା ପଣ୍ଡା କାହ୍ନାକୁ ପ୍ରୋତ୍ସାହିତ କରିଥିଲେ। ଏହାପରେ ବିକଶିତ ହେବାକୁ ଲାଗିଥିଲା ସହଜାତ ପ୍ରତିଭା। ଶ୍ରୀରାମ ବୌଦ୍ଧ ଜିଲାର ରାଜପଥ କାର୍ଯ୍ୟରେ ଯନ୍ତ୍ରୀ ଭାବେ ନିୟୋଜିତ ହୋଇଥିବାରୁ ସେଠାରେ ବସବାସ କରନ୍ତି। ସାଇ ଶ୍ରେୟାଂସୁଙ୍କ ମା’ ପୁଅର ମଡେଲ ପ୍ରତି ଆଗ୍ରହ ଦେଖି ମଡେଲ ଗୁରୁ ପ୍ରସନ୍ନଙ୍କ ତତ୍ତ୍ବାବଧାନରେ ତାଙ୍କୁ ସ୍ବତନ୍ତ୍ର ତାଲିମ ଦେଇଥିଲେ। ଏହି ସମୟରେ ଶ୍ରେୟାଂସୁ ବିଭିନ୍ନ ଜିଲା ଓ ବ୍ଲକସ୍ତରୀୟ ପ୍ରତିଯୋଗିତାରେ ଅଂଶଗ୍ରହଣ କରି ସଫଳ ହେବାରେ ଲାଗିଥାନ୍ତି। କୋଭିଡ୍ ଲକ୍ଡାଉନ ସମୟରେ ସେପ୍ଟେମ୍ବରରେ ମୁମ୍ବାଇର ଗ୍ଲୋବାଲ ବିୟୁଟି ଇଣ୍ଟରନ୍ୟାଶନାଲ ଅର୍ଗନାଇଜେଶନ ପକ୍ଷରୁ ଅନ୍ଲାଇନରେ କିଟ୍ସ ଆଣ୍ଡ ଟିନ୍ ୱାଲର୍ଡ ଇଭେଣ୍ଟ ୨୦୨୦-୨୧ ମଡେଲ ବିଭାଗରେ ଶିଶୁ ପ୍ରତିଯୋଗିତା ବିଜ୍ଞାପନ ପ୍ରକାଶିତ ହୋଇଥିଲା। ଯାହାର ସୁଯୋଗ ହାତଛଡ଼ା କରି ନ ଥିଲେ ଶ୍ରେୟାଂସୁଙ୍କ ମା’ ବାପା। ଆଉ ଏହି ପ୍ରତିଯୋଗିତା ଶ୍ରେୟାଂସୁଙ୍କ ପାଇଁ ଆଣିଦେଲା ପରିଚୟ। ୪୦ ପ୍ରତିଯୋଗୀଙ୍କୁ ପଛରେ ପକାଇ ଶ୍ରେୟାଂସୁ ବିଜୟୀ ହୋଇଥିଲେ। ନେପାଳରେ ହେବାକୁ ଥିବା ପ୍ରତିଯୋଗିତାରେ ସେ ଯେମିତି ସଫଳ ହୋଇ ଭାରତର ନାମ ରଖିବେ ସେଥିପାଇଁ ପ୍ରସ୍ତୁତି ପ୍ରକ୍ରିୟା ଆରମ୍ଭ କରିଦେଇଛନ୍ତି।
