ଅମରାବତୀ, ୫ା୬:ଆନ୍ଧ୍ରପ୍ରଦେଶ ବିଧାନସଭା ନିର୍ବାଚନରେ ପୂର୍ବତନ ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରାବାବୁ ନାଇଡୁଙ୍କ ତେଲୁଗୁଦେଶମ୍ ପାର୍ଟି (ଟିଡିପି) ବଡ଼ ବିଜୟ ହାସଲ କରିଛି। ଏଥର ଟିଡିପି ଭାଜପା ଏବଂ ପଓ୍ବନ କଲ୍ୟାଣଙ୍କ ଜନସେନା ପାର୍ଟି (ଜେଏସ୍ପି) ସହ ଏକାଠି ଲଢ଼ିଥିଲା। ୧୭୫ ଆସନ ବିଶିଷ୍ଟ ବିଧାନସଭାରେ ଟିଡିପି ୧୩୫ ଆସନରେ ଜିିତି ଥିବାବେଳେ ସହଯୋଗୀ ଦଳ ଜେଏସ୍ପିକୁ ୨୧ ଏବଂ ଭାଜପାକୁ ୮ ଆସନ ମିଳିଛି। ଅନ୍ୟପକ୍ଷରେ ବିଦାୟୀ ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡୀଙ୍କ ଓ୍ବାଇଏସ୍ଆର୍ସିପି ଶୋଚନୀୟ ପରାଜୟବରଣ କରିଛି। ଏହି ଦଳ ମାତ୍ର ୧୧ଟି ଆସନରେ ସୀମିତ ରହିଛି। ଏପରିକି ଜଗନଙ୍କ ମନ୍ତ୍ରିମଣ୍ଡଳର ଜଣେ ମନ୍ତ୍ରୀଙ୍କୁ ବାଦ୍ଦେଲେ ଅନ୍ୟମାନେ ଏବଂ ବିଧାନସଭା ବାଚସ୍ପତି ଥାମିଲେନି ସୀତାରାମ ପରାଜିତ ହୋଇଛନ୍ତି।
ନିର୍ବାଚନରେ ପରାଜୟକୁ ଜଗନମୋହନ ସ୍ବୀକାର କରିବା ସହ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି। ମଙ୍ଗଳବାର ସନ୍ଧ୍ୟାରେ ସେ ରାଜ୍ୟପାଳ ଏସ୍. ଅବଦୁଲ ନାଜିରଙ୍କୁ ଭେଟି ତାଙ୍କ ଇସ୍ତଫାପତ୍ର ପ୍ରଦାନ କରିଛନ୍ତି। ନୂଆ ସରକାର ଗଠନ ପର୍ଯ୍ୟନ୍ତ ସେ କାମଚଳା ମୁଖ୍ୟମନ୍ତ୍ରୀ ଭାବେ ରହିବେ। ମେ’ ୧୩ରେ ଆନ୍ଧ୍ରପ୍ରଦେଶ ବିଧାନସଭା ନିର୍ବାଚନ ଅନୁଷ୍ଠିତ ହୋଇଥିଲା। ଟିଡିପି ୧୪୪ ଆସନରେ ପ୍ରାର୍ଥୀ ଦେଇଥିବାବେଳେ ଜେଏସ୍ପି ୨୧ ଏବଂ ଭାଜପା ୧୦ ଆସନରେ ଲଢ଼ିଥିଲା।
ସୂଚନାଯୋଗ୍ୟ, ୩ ବର୍ଷ ପୂର୍ବେ କ୍ଷୁବ୍ଧ ଚନ୍ଦ୍ରାବାବୁ ବିଧାନସଭା ଛାଡ଼ି ଚାଲିଯାଇଥିଲେ। ସେ କେବଳ ମୁଖ୍ୟମନ୍ତ୍ରୀ ହେଲେ ବିଧାନସଭାକୁ ଫେରିବେ ବୋଲି ସେତେବେଳେ କହିଥିଲେ। କିଛି ମାସ ପୂର୍ବରୁ ଦୁର୍ନୀତି ମାମଲାରେ ଚନ୍ଦ୍ରାବାବୁଙ୍କୁ ଗିରଫ କରାଯାଇଥିଲା। ଏବେ ଟିଡିପିର ଐତିହାସିକ ବିଜୟ ସହ ତାଙ୍କ ସଂକଳ୍ପ ପୂରା ହୋଇଛି। ବର୍ତ୍ତମାନର ବିଧାନସଭାରେ ଟିଡିପି ବିଧାୟକଙ୍କ ସଂଖ୍ୟା ୨୩ ଥିଲା। ଲୋକ ସଭା ନିର୍ବାଚନରେ ମଧ୍ୟ ଟିଡିପି ଭଲ ପ୍ରଦର୍ଶନ କରିଛି। ଆନ୍ଧ୍ରର ୨୫ ଲୋକ ସଭା ଆସନରୁ ଟିଡିପି ୧୬ ଆସନ ଜିତୁଥିବାବେଳେ ଏହାର ସହଯୋଗୀ ଭାଜପା ଏବଂ ଜନସେନା ପାର୍ଟି ଯଥାକ୍ରମେ ୩ ଓ ୨ ଆସନରେ ବିଜୟୀ ହେବାକୁ ଯାଉଛନ୍ତି। ଏଥିସହ ଚନ୍ଦ୍ରାବାବୁ କେନ୍ଦ୍ରରେ ନୂଆ ସରକାର ଗଠନ ପାଇଁ କିଙ୍ଗ୍ମେକର ଭୂମିକା ନେବାକୁ ଯାଉଛନ୍ତି। କାରଣ ଏନ୍ଡିଏରେ ଭାଜପା ପରେ ଟିଡିପି ହେଉଛି ଦ୍ୱିତୀୟ ବୃହତ୍ ଦଳ। ଭାଜପା ପୂର୍ଣ୍ଣ ସଂଖ୍ୟାଗରିଷ୍ଠତା ହାସଲ କରିବାରେ ବିଫଳ ହୋଇଛି। ତେଣୁ ସରକାର ଗଢ଼ିବା ପାଇଁ ଭାଜପା ଟିଡିପି ଏବଂ ଜେଡିୟୁ ଉପରେ ନିର୍ଭର କରିବ।
୧୯୫୦ ଏପ୍ରିଲ ୨୦ରେ ଆନ୍ଧ୍ରର ଚିତ୍ତୋର ଜିଲାରେ ଜନ୍ମିତ ଚନ୍ଦ୍ରାବାବୁ ଛାତ୍ର ଜୀବନରୁ ରାଜନୀତିରେ ସାମିଲ ହୋଇଥିଲେ। ସେ ୧୯୯୫ରେ ପ୍ରଥମେ ମୁଖ୍ୟମନ୍ତ୍ରୀ ହୋଇଥିଲେ ଓ ପରେ ଆଉ ୨ ଥର ଏହି ପଦ ସମ୍ଭାଳିଥିଲେ। ଅବିଭାଜିତ ଆନ୍ଧ୍ରପ୍ରଦେଶର ରାଜଧାନୀ ହାଇଦ୍ରାବାଦକୁ ଟେକ୍ନୋଲୋଜି ଓ କମ୍ପ୍ୟୁଟର ସଫ୍ଟଓ୍ବେର ହବ୍ରେ ପରିଣତ କରିବାର ଶ୍ରେୟ ତାଙ୍କୁ ଦିଆଯାଇଥାଏ।