କଣ୍ଟାମାଳ,୯।୯( ଆଦିତେଶ୍ୱର ମିଶ୍ର): ବୌଦ୍ଧ ଜିଲା କଣ୍ଟାମାଳ ପ୍ରଥମ ଶ୍ରେଣୀ ବିଚାର ବିଭାଗୀୟ ଦଣ୍ଡାଧୀଶ ସତ୍ୟ ନାରାୟଣ ଦାସ ଏକ ବାଘ ଛାଲ ଚେରା ଚାଲାଣ ମାମଲାର ବିଚାର କରି ଅଭିଯୁକ୍ତଙ୍କୁ ୩ ବର୍ଷ କାରାଦଣ୍ଡ ଦେବା ସହ ୧୦ ହଜାର ଟଙ୍କା ଜରିମାନା ଆଦେଶ ପ୍ରଦାନ କରିଛନ୍ତି।
ମାମଲାରୁ ପ୍ରକାଶ ଯେ, ଗତ ୨୦୨୧ ଏପ୍ରିଲ ମାସରେ ମନମୁଣ୍ଡା- କଣ୍ଟାମାଳ ରାସ୍ତାର ଜାଲପାଲି ଛକଠାରେ ଏକ ବାଘ ଛାଲ ଚୋରା ଚାଲାଣ ହେଉଥିବା ଖବର ପାଇ ଭୁବନେଶ୍ୱର ସ୍ପେଶାଲ ଟାସ୍କ ଫୋର୍ସ ପକ୍ଷରୁ ଚଢାଉ କରାଯାଇଥିଲା। ମନମୁଣ୍ଡା ଥାନା ବାଦଳଗୁଡା ଗ୍ରାମର ମହେନ୍ଦ୍ର ଭୋଇନା ଏକ ବାଘ ଛାଲ ଧରି ରାସ୍ତାକଡରେ ଠିଆ ହୋଇଥିବା ବେଳେ ଏସଟିଏଫ କର୍ମଚାରୀ ଚଢାଉ କରି ତାଙ୍କ ପାଖରୁ ବାଘ ଛାଲ ଜବତ କରିଥିଲେ । ଏହି ଘଟଣାରେ ତାଙ୍କୁ ଗିରଫ କରାଯାଇଥିଲା। ପରେ ଏକ ମାମଲା ରୁଜୁ କରାଯାଇ ବିଚାର ପାଇଁ କୋର୍ଟକୁ ପଠାଯାଇଥିଲା। ଅନ୍ୟପକ୍ଷରେ ଏସ୍ଟିଏଫ ପକ୍ଷରୁ ବାଘ ଛାଲକୁ ପରୀକ୍ଷା ପାଇଁ ଡେରାଡୁନ ପଠାଯାଇଥିଲା। ପରବର୍ତ୍ତୀ ସମୟରେ ମାମଲା ପ୍ରଥମ ଶ୍ରେଣୀ ବିଚାର ବିଭାଗୀୟ ଦଣ୍ଡାଧୀଶଙ୍କ ଅଦାଲତରେ ସିଟି ନଂ.୮୮/୨୧ ହୋଇ ବିଚାର ହୋଇଥିଲା । ମାମଲାରେ ସରକାରଙ୍କ ପକ୍ଷରୁ ୭ ଜଣ ସାକ୍ଷୀଙ୍କ ବୟାନ ଓ ବାଘ ଛାଲ ପରୀକ୍ଷାକୁ ନେଇ ପ୍ରମାଣ ଥିବାରୁ ଅଭିଯୁକ୍ତ ମହେନ୍ଦ୍ରଙ୍କୁ ଦଣ୍ଡାଧୀଶ ୩ ବର୍ଷ କାରାଦଣ୍ଡ ଓ ୧୦ ହଜାର ଟଙ୍କା ଜରିମାନା ଦେବାକୁ ଆଦେଶ ପ୍ରଦାନ କରିଛନ୍ତି । ଜରିମାନା ଅନାଦେୟ ହେଲେ ଆଉ ଅଧିକ ୬ ମାସ କାରାଦଣ୍ଡାଦେଶ ପ୍ରଦାନ କରିଛନ୍ତି। ମାମଲାକୁ ସରକାରୀ ଓକିଲ ସାଇରଞ୍ଜନ ମହାନନ୍ଦିଆ ପରିଚାଳନା କରୁଥିଲେ।