କେନ୍ଦୁଝର,୧୦ା୫(ସ୍ବ.ପ୍ର.): କେନ୍ଦୁଝର ସ୍ବତନ୍ତ୍ର ଭିଜିଲାନ୍ସ କୋର୍ଟ ଏକ ଦୁର୍ନୀତି ମାମଲରେ ବିଚାର କରି ସହକାରୀ ଯନ୍ତ୍ରୀ ଶଙ୍କର୍ଷଣ ବେହେରା ଓ କନିଷ୍ଠ ଯନ୍ତ୍ରୀ ଅଶୋକ କୁମାର କରଙ୍କୁ ୩ ବର୍ଷ ଜେଲ୍ ଏବଂ ୩ ହଜାର ଟଙ୍କା ଜରିମାନା ଆଦେଶ କରିଛନ୍ତି। ଜରିମାନା ଅନାଦେୟ ୨ ମାସ ଅଧିକ ଦଣ୍ଡ ଆଦେଶ କରିଛନ୍ତି। ଏହି ଦୁଇ ଯନ୍ତ୍ରୀ ଆନନ୍ଦପୁର ବ୍ଲକରେ କାମ କରୁଥିଲେ। ୨୦୦୪-୨୦୦୫ ମସିହାର ଏକ ଅସମ୍ପୂର୍ଣ୍ଣ ଘରକୁ ସମ୍ପୂର୍ଣ୍ଣ କରିବା ପାଇଁ ବିଧାୟକ ପାଣ୍ଠିର ୧ ଲକ୍ଷ ଟଙ୍କା ଅନୁଦାନ ମିଳିଥିଲା। ଏହି କାମ ମଦନମୋହନ ମିଶ୍ର ନାମକ ଜଣେ ଠିକାଦାରଙ୍କ ଜରିଆରେ କରାଯାଇଥିଲା। ତେବେ କାମ ନ ହୋଇ ସମ୍ପୂର୍ଣ୍ଣ ହୋଇଥିବା ଦର୍ଶାଇ ଏହି ଦୁଇ ଯନ୍ତ୍ରୀ ମାପଚୁପ କରିବା ସହ ବିଲ୍ ପୈଠ କରିଥିଲେ। ଏ ନେଇ ଭିଜିଲାନ୍ସ ପକ୍ଷରୁ ୧୦ା୪ା୨୦୦୭ରେ ଏକ ଦୁର୍ନୀତି ମାମଲା ରୁଜୁ ହୋଇଥିଲା। ୩୪ଜଣ ସାକ୍ଷୀଙ୍କ ବୟାନ ଓ ତଦନ୍ତ ରିପୋର୍ଟକୁ ଭିତ୍ତିକରି ସ୍ବତନ୍ତ୍ର ଭିଜିଲାନ୍ସ ବିଚାରପତି ରଶ୍ମିତା ଦଳେଇ ଉଭୟ ଯନ୍ତ୍ରୀଙ୍କୁ ଏହି ଦଣ୍ଡାଦେଶ ଶୁଣାଇଛନ୍ତି ବୋଲି ସ୍ବତନ୍ତ୍ର ପବ୍ଲିକ ପ୍ରସିକ୍ୟୁଟର ଦେବଦତ୍ତ ବିଶ୍ୱାଳ କହିଛନ୍ତି।
