ଭୁବନେଶ୍ୱର,୧୩।୨(ସୂର୍ଯ୍ୟକାନ୍ତ ବେହେରା):ଦାମୀ କାର୍ରେ ଗଞ୍ଜେଇ ଚାଲାଣବେଳେ କମିଶନରେଟ ପୋଲିସର ସ୍ପେଶାଲ କ୍ରାଇମ୍ ୟୁନିଟ୍ ୩୦ କି.ମି ପିଛା କରି ୩ ଆନ୍ତଃରାଜ୍ୟ ନିଶାବେପାରୀଙ୍କୁ ଭୁବନେଶ୍ୱର ଉପକଣ୍ଠ ପାହାଳରୁ କାବୁ କରିବାରେ ସଫଳ ହୋଇଛି। ଗିରଫ ଅଭିଯୁକ୍ତମାନେ ହେଲେ ରବି ଶଙ୍କର ଦାସ, ରାଜେଶ କିଶୋର ଦାସ, ଲବ କିଶୋର ପ୍ରସାଦ ସହଦେବ। ସେମାନଙ୍କ ଘର ଝାଡଖଣ୍ଡର ପଶ୍ଟିମ ସିଂହଭୂମ ଅଞ୍ଚଳରେ। ସେମାନଙ୍କଠାରୁ ୩୦୦ କେଜି ଗଞ୍ଜେଇ, ୨ କାର୍, ୩ ମୋବାଇଲ ଫୋନ, ୧୪ ହଜାର ଟଙ୍କା ଏବଂ ଭିନ୍ନ ଭିନ୍ନ ଗାଡ଼ି ନମ୍ବର ପ୍ଲେଟ୍ ଜବତ ହୋଇଛି। ଜବତ ଗଞ୍ଜେଇର ମୂଲ୍ୟ ୩୦ ଲକ୍ଷ ହେବ। ଅଭିଯୁକ୍ତମାନେ ଧରା ନ ପଡ଼ିବା ଲାଗି ଗାଡ଼ିରେ ପ୍ରେସ୍ ଲେଖିବା ସହ ନମ୍ବର ପ୍ଲେଟ୍ ବଦଳାଇ ମାଲକାନଗିରି ଚିତ୍ରକୋଣ୍ଡାରୁ ଭୁବନେଶ୍ୱର ଦେଇ କୋଲକାତାକୁ ଗଞ୍ଜେଇ ଚାଲାଣ କରୁଥିଲେ ବୋଲି ଖବରଦାତା ସମ୍ମିଳନୀରେ ପୋଲିସ କମିଶନର ସଞ୍ଜୀବ ପଣ୍ଡା ସୂଚନା ଦେଇଛନ୍ତି। ଏନେଇ ପୋଲିସ ଏକ ମାମଲା ରୁଜୁ କରି ସମସ୍ତ ଅଭିଯୁକ୍ତଙ୍କୁ କୋର୍ଟଚାଲାଣ କରିଛି। ଜାମିନ ନାମଞ୍ଜୁର ହେବାରୁ ସମସ୍ତଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଏହି ଆନ୍ତଃରାଜ୍ୟ ନିଶା କାରବାରର ଚେର କେଉଁଆଡେ ଲମ୍ବିଛି ତାହା ଜାଣିବା ପାଇଁ ପୋଲିସ ଅଭିଯୁକ୍ତମାନଙ୍କୁ ୩ ଦିନିଆ ରିମାଣ୍ଡରେ ନେବାକୁ କୋର୍ଟରେ ଆବେଦନ କରିଛି। ଅଭିଯୁକ୍ତ ରବି ଜଣେ ପେସାଦାର ନିଶାବେପାରୀ। ତାଙ୍କର ଅନେକ ଦାମୀ ଗାଡ଼ି ରହିଛି। ଏପରି କି ସେ ପୂର୍ବରୁ ଝାଡଖଣ୍ଡ ପୋଲିସ ଦ୍ୱାରା ଗିରଫ ହୋଇଥିଲେ।
ଅଭିଯୁକ୍ତମାନେ ଚିତ୍ରାକୋଣ୍ଡାରୁ ଗଞ୍ଜେଇ ଆଣି ମାଲକାନଗିରି, ଭାଇଜାଗ, ଭୁବନେଶ୍ୱର ହୋଇ ପଶ୍ଚିମବଙ୍ଗ ଯାଉଥିବା ପୋଲିସ ବିଶେଷ ସୂତ୍ରରୁ ଖବର ପାଇଥିଲା। ଗଞ୍ଜେଇ ଚାଲାଣକାରୀମାନେ ନମ୍ବରପ୍ଲେଟ୍ ବଦଳାଉଥିବାରୁ ସେମାନଙ୍କୁ ଚିହ୍ନଟ କରିବା ମୁସ୍କିଲ ଥିଲା। ହେଲେ ଅଭିଯୁକ୍ତମାନଙ୍କ ଗାଡ଼ିର କମ୍ପ୍ରେସର ଖରାପ ଯୋଗୁ ବାଟରେ ଅଧିକ ବେଗରେ ସାଉଣ୍ଡ କରୁଥିବାରୁ ଚିହ୍ନିବା ସହଜ ହେଲା। ପୋଲିସ ପିତାପଲ୍ଲୀରୁ ପାହାଳ ପର୍ଯ୍ୟନ୍ତ ଗଞ୍ଜେଇ ଚାଲାଣକାରୀଙ୍କ ଗାଡିକୁ ପିଛା କରି ଶେଷରେ ଧରିଥିଲା। ଏହାପରେ ଯାଞ୍ଚ ବେଳେ ଗାଡ଼ିର ସିଟ୍ ଓ ପଛରେ ଥିବା ସିକ୍ରେଟ ଚାମ୍ବରରେ ଗଞ୍ଜେଇ ପ୍ୟାକେଟ୍ ରହିଥିବା ଜଣାପଡ଼ିଥିଲା। ୩ଟି ରାଜ୍ୟ ଅତିକ୍ରମ କରିବା ପାଇଁ ସେମାନେ ଭିନ୍ନ ଭିନ୍ନ ପ୍ରାଇଭେଟ ନମ୍ବର ପ୍ଲେଟ ବ୍ୟବହାର କରିଥିଲେ। ସେହିପରି ଗଞ୍ଜେଇ ଭର୍ତ୍ତି ଗାଡ଼ିକୁ ଏସ୍କର୍ଟ ଦେବା ପାଇଁ ଆଗରେ ଆଉ ଏକ କାର୍ ଯାଉଥିଲା।
