କୋରାପୁଟ/ ନାରାୟଣପାଟଣା, ୨୬।୩(ସ୍ବ.ପ୍ର./ ଡି.ଏନ.ଏ.)
ଛାତ୍ରୀଛାତ୍ରଙ୍କୁ ସରକାରୀ ସ୍କୁଲମୁହାଁ କରିବାକୁ ୫-ଟି ରୂପାନ୍ତରିତ କାର୍ଯ୍ୟକ୍ରମରେ ବିଦ୍ୟାଳୟଗୁଡିକୁ ବହୁ ଅର୍ଥ ଯୋଗାଇ ଦିଆଯାଉଛି। ଛାତ୍ରୀଛାତ୍ରଙ୍କୁ ମାଗଣା ପୋଷାକ, ଖାଇବା ଏବଂ ବହିପତ୍ର ସରକାର ଯୋଗାଇ ଦେଉଛନ୍ତି। ବିଶେଷକରି ଆଦିବାସୀ ବହୁଳ ଅଞ୍ଚଳରେ ଡ୍ରପଆଉଟ୍ ରୋକିବା ପାଇଁ ସରକାର ପଦକ୍ଷେପ ନେଉଛନ୍ତି। ଏହା ସତ୍ତ୍ୱେ ଆଦିବାସୀ ଅଧ୍ୟୁଷିତ ଅଞ୍ଚଳରେ ଶିକ୍ଷା ବ୍ୟବସ୍ଥାରେ ଉନ୍ନତି ଆସୁନାହିଁ। ବିଦ୍ୟାଳୟକୁ କେବେ ପିଲା ଆସିଲେ ଶିକ୍ଷକଙ୍କ ଦେଖାମିଳୁନି ତ କେବେ ଶିକ୍ଷକ ଆସିଲେ ପିଲା ଆସୁନାହାନ୍ତି। ସ୍କୁଲକୁ ଶିକ୍ଷକ ନ ଆସିବା ଯୋଗୁ ଛାତ୍ରୀଛାତ୍ର ଶୁକ୍ରବାର ପରୀକ୍ଷା ଦେବାରୁ ବଞ୍ଚତ୍ତ ହୋଇଛନ୍ତି। ଏପରି ଘଟଣା କୋରାପୁଟ ଜିଲା ନାରାୟଣପାଟଣା ବ୍ଲକ ବିଜାଘାଟି ପଞ୍ଚାୟତର ତୁର୍ଲି ପ୍ରାଥମିକ ବିଦ୍ୟାଳୟରେ ଦେଖିବାକୁ ମିଳିଛି।
ଏବେ ରାଜ୍ୟର ପ୍ରାଥମିକ ବିଦ୍ୟାଳୟଗୁଡିକରେ ବାର୍ଷିକ ପରୀକ୍ଷା ଚାଲିଛି। ତେବେ ତୁର୍ଲି ଗ୍ରାମରେ ଥିବା ପ୍ରାଥମିକ ବିଦ୍ୟାଳୟରେ ପରୀକ୍ଷା ବନ୍ଦ ରହିଛି। ବିଦ୍ୟାଳୟରେ ପ୍ରଥମରୁ ୫ମ ଶ୍ରେଣୀ ଯାଏ ୩୦ ଜଣ ଛାତ୍ରୀଛାତ୍ର ପାଠ ପଢୁଛନ୍ତି। ଏମାନଙ୍କ ପାଇଁ ୨ ଜଣ ଶିକ୍ଷକ ନିଯୁକ୍ତ ହୋଇଛନ୍ତି। ଏହି ଦୁଇ ଜଣଙ୍କ ମଧ୍ୟରୁ ଜଣେ ପ୍ରଧାନ ଶିକ୍ଷକ, ଅନ୍ୟଜଣେ ସହକାରୀ ଶିକ୍ଷକ। ପ୍ରଧାନଶିକ୍ଷକ ଦିଲିପ ଖଟାଇ ଏଠାରେ ଚାକିରି କରିବା ଦିନଠୁ ସ୍କୁଲ ହତା ମାଡିନାହାନ୍ତି। ସେ ଅଧିକାଂଶ ସମୟ ଭୁବନେଶ୍ୱରରେ ରହୁଛନ୍ତି। ତେବେ ସ୍କୁଲ କାଗଜପତ୍ରରେ ସବୁ ଠିକ୍ଠାକ୍ ଚାଲିଥିବା ଦର୍ଶାଯାଉଛି। ଛାତ୍ରୀଛାତ୍ରଙ୍କୁ ମଧ୍ୟାହ୍ନ ଭୋଜନ ପ୍ରତିଦିନ ମିଳୁଛି, ଛାତ୍ରୀଛାତ୍ର ନିୟମିତ ବିଦ୍ୟାଳୟ ଆସୁଥିବା ଉପସ୍ଥାନ ଖାତାରେ ଦର୍ଶାଯାଉଛି। ସ୍କୁଲରେ ଥିବା ଅନ୍ୟ ଜଣେ ସହକାରୀ ଶିକ୍ଷକ କାଁଭାଁ ଆସି ବିଦ୍ୟାଳୟ ବୁଲି ଯାଉଛନ୍ତି। ଶିକ୍ଷକଙ୍କ ଅନୁପସ୍ଥିତି ଯୋଗୁ ବିଦ୍ୟାଳୟରେ ପଢୁଥିବା ୩୦ ଛାତ୍ରୀଛାତ୍ର ବାର୍ଷିକ ପରୀକ୍ଷା ଦେବାରୁ ବଞ୍ଚତ୍ତ ହୋଇଛନ୍ତି। ବର୍ଷ ତମାମ ସ୍କୁଲରେ ତାଲା ଝୁଲୁଥିବାରୁ ପାଠପଢା ହେଉନି। ଏପରି ସ୍ଥଳେ ପିଲାମାନେ କ’ଣ ପରୀକ୍ଷା ଦେବେ ବୋଲି ତୁର୍ଲି ଗ୍ରାମବାସୀ ପ୍ରଶ୍ନ ଉଠାଇଛନ୍ତି। ତୁର୍ଲି ଗ୍ରାମର ଓ୍ବାର୍ଡସଭ୍ୟ ସୁରେ ଶିରିକା, ରାହୁଲ ଶିରିକା, ଗାହିଁ ଶିରିକା, ମାସୁରୁ ଶିରିକା, ଧରା ଶିରିକା, ପୂର୍ଣ୍ଣ ଶିରିକା, ଜତ ଶିରିକା ପ୍ରମୁଖ ଅଭିଭାବକ ବିଗତ ଦିନରେ ଉଭୟ ଶିକ୍ଷକଙ୍କୁ ଡାକି ତାଗିଦ୍ କରିଥିଲେ। ଏନେଇ ବିଇଓ ଅଫିସରେ ଅଭିଯୋଗ କରିଥିଲେ। କିଛି ମାସ ଧରି ସେମାନଙ୍କ ଦରମା ମଧ୍ୟ ବନ୍ଦ ହୋଇଥିଲା। ଏହା ସତ୍ତ୍ୱେ ସେମାନେ ସୁଧୁରିନାହାନ୍ତି ବୋଲି ଅଭିଭାବକମାନେ କହିଛନ୍ତି। ଏ ନେଇ ଜିଲା ଶିକ୍ଷା ଅଧିକାରୀ (ଡିଇଓ) ରାମଚନ୍ଦ୍ର ନାହାକଙ୍କୁ ପଚାରିବାରୁ ସେ କହିଲେ, ଘଟଣା ସମ୍ପର୍କରେ ବିଇଓଙ୍କୁ ରିପୋର୍ଟ ମାଗିବେ। ରିପୋର୍ଟ ଆସିବା ପରେ ଉଭୟ ଶିକ୍ଷକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି କହିଛନ୍ତି।