ନବରଙ୍ଗପୁର,୫।୬(ବି.ପ୍ର.): ନବରଙ୍ଗପୁର ଜିଲା ପ୍ରଶାସନ ସିଙ୍ଗାପୁରର କୋଡ୍ଭର୍ସିଟି.କ୍ଲବର ମିଳିତ ପ୍ରୟାସରେ ବିନା ମୂଲ୍ୟରେ ୩୦ ହଜାର ଛାତ୍ରୀଛାତ୍ରଙ୍କୁ ମିଳିବ ଗୁଣାତ୍ମକ କୋଡିଂ ଶିକ୍ଷା। ଜିଲାପାଳ କମଳ ଲୋଚନ ମିଶ୍ରଙ୍କ ତତ୍ତ୍ୱାବଧାନ ଓ ଉପଜିଲାପାଳ ଅକ୍ଷୟ ସୁନୀଲ ଅଗ୍ରୱାଲଙ୍କ ଉଦ୍ୟମରେ ‘ମିଶନ ନବରଙ୍ଗପୁର କୋଡ’ ଆରମ୍ଭ ହୋଇଛି। ଅନୁସୂଚିତ ଜାତି ଓ ଜନଜାତି ସ୍କୁଲ, ଓ ଶିକ୍ଷା ବିଭାଗର ୧୮୩ ସ୍କୁଲର ନବମ ଓ ଦଶମ ଶ୍ରେଣୀ ଛାତ୍ରୀଛାତ୍ର କୋଡିଂ ଶିକ୍ଷିପାରିବେ। କମ୍ପ୍ୟୁଟର, ଲାପଟପ ଓ ମୋବାଇଲରେ କିଭଳି କୋଡିଂ ଶିଖିପାରିବେ ସେ ନେଇ ଶନିବାର ସ୍ଥାନୀୟ ନୋଡାଲ ଆରସିଡି ହାଇସ୍କୁଲରେ ଅନୁଷ୍ଠାନ ପକ୍ଷରୁ ଭର୍ଚୁଆଲ ବୈଠକ କରାଯାଇଛି। ଅନୁଷ୍ଠାନର ସିଇଓ ବିଶାଳ ନୋଢା ଶିକ୍ଷକମାନଙ୍କୁ କୋଡିଂ ପରିଚାଳନା ତାଲିମ ପ୍ରଦାନ କରିଛନ୍ତି। ଏବେ ସ୍କୁଲ ଛୁଟି ଅଛି। ଛୁଟି ପରେ ପିଲାମାନଙ୍କୁ ୧ ସପ୍ତାହ କୋଡିଂ ଶିକ୍ଷା ଦିଆଯିବ। ଏକକାଳୀନ ଏତେ ମାତ୍ରାରେ ପିଲାଙ୍କୁ କୋଡିଂ ଶିକ୍ଷା ଦେଇ ଗ୍ରୀନୀଜ୍ ବୁକ୍ ଅପ୍ ଓ୍ବାଲ୍ଡ ରେକର୍ଡରେ ସ୍ଥାନ ପାଇବାକୁ ଲକ୍ଷ୍ୟ ରଖାଯାଇଥିବା ସୂଚନା ମିଳିଛି।
ଶିଳ୍ପ ବିପ୍ଳବ ଯୁଗରେ କମ୍ପ୍ୟୁଟର ଜ୍ଞାନ ଏବଂ କୋଡିଂ ଶିକ୍ଷା ଆବଶ୍ୟକତା ବଢ଼ିଯାଇଛି। କୋଡିଂ ଶିକ୍ଷାବେଳେ ଭାଷା, ଉପକରଣ ଓ ଅର୍ଥ ପ୍ରତିବନ୍ଧକ ହୁଏ। ଉପଜିଲାପାଳ ଏହି ପ୍ରତିବନ୍ଧକ ଦୂର କରି ଆଦିବାସୀ ପିଲାଙ୍କ ଭବିଷ୍ୟତ ପାଇଁ କୋଡିଂ ଶିକ୍ଷାକୁ ଗୁରୁତ୍ୱ ଦେଇଛନ୍ତି। ଏହି ତିନୋଟି ପ୍ରତିବନ୍ଧକକୁ ସମାଧାନ କରିବା ପାଇଁ ଉପଜିଲାପାଳ ଜିଲାର ଛାତ୍ରଙ୍କୁ ବିନା ମୂଲ୍ୟରେ ସ୍ମାର୍ଟଫୋନଅନୁକୂଳ କୋଡିଂ ପାଠ୍ୟକ୍ରମ ଆଣିବା ପାଇଁ କୋଡ୍ଭର୍ସିଟି.କ୍ଲବ ସହ ଯୋଗା ଯୋଗ କରିଥିଲେ। ଜିଲା ପ୍ରଶାସନ ଉକ୍ତ ସଂସ୍ଥା ସହ ଏବେ ଏମ୍ଓୟୁ ସ୍ବାକ୍ଷର କରିଛନ୍ତି। ପାଠ୍ୟକ୍ରମ ସମାପ୍ତ କରୁଥିବା ଛାତ୍ରମାନେ ଏକ ଡିଜିଟାଲ ସାର୍ଟିଫିକେଟ ପାଇବେ। ବେସରକାରୀ କମ୍ପାନୀ ଅଧିକ ପରିମାଣର ଫିରେ ଅନଲାଇନ ପାଠ୍ୟକ୍ରମ ପ୍ରଦାନ କରନ୍ତି। ତାହାକୁ ଗ୍ରହଣ କରିବା ଧନୀକଙ୍କ ପାଇଁ ସକ୍ଷମ। ଯେଉଁମାନେ ଘରୋଇ ବିଦ୍ୟାଳୟରେ ନାହାଁନ୍ତି ଏବଂ ଏହି ମହଙ୍ଗା ଅନ୍ଲାଇନ ସ୍ବତନ୍ତ୍ର ପାଠ୍ୟକ୍ରମ ନେଇପାରିବେ ନାହିଁ ସେମାନଙ୍କ ପାଇଁ ଏହି ସୁବିଧା ରହିଛି ବୋଲି ଉପଜିଲାପାଳ କହିଛନ୍ତି। ଆମେ ଏକାଧିକ ସରକାରୀ ସଂସ୍ଥା ସହ କାର୍ଯ୍ୟ କରିଛୁ ଏବଂ ସ୍କୋ ଅବ୍ରାନ୍ସ ଏ ପର୍ଯ୍ୟନ୍ତ ଆମର ଯାତ୍ରାର ସବୁଠାରୁ ବଡ ମାଇଲଖୁଣ୍ଟ ଅଟେ ବୋଲି କୋଡ୍ଭରସିଟି ପ୍ରତିଷ୍ଠାତା ତଥା ସିଇଓ ବିଶାଲ ଲଢ଼ା କହିଛନ୍ତି। ଏହି କାର୍ଯ୍ୟକ୍ରମରେ ଡିଇଓ ପ୍ରଦୀପ କୁମାର ନାଗ, ସମଗ୍ର ଶିକ୍ଷା ଅଭିଯାନର ଯୋଜନା ସଂଯୋଜକ ପ୍ରଦୀପ୍ତ କୁମାର ଷଡଙ୍ଗୀ ଓ ଶିକ୍ଷୟିତ୍ରୀ ଶିକ୍ଷକ, ଛାତ୍ରୀଛାତ୍ର ଉପସ୍ଥିତ ଥିଲେ।