ବାରଙ୍ଗ,୧୮।୧୨(ଡି.ଏନ୍.ଏ.)- ବର୍ତ୍ତମାନ ପର୍ଯ୍ୟଟନ ଋତୁ ଆରମ୍ଭ ହୋଇଥିବାରୁ ନନ୍ଦନକାନନ ଓ ବଟାନିକାଲ ଗାର୍ଡେନରେ ପର୍ଯ୍ୟଟକଙ୍କ ସଂଖ୍ୟା ଦିନକୁଦିନ ବୃଦ୍ଧି ପାଇବାରେ ଲାଗିଛି। ରବିବାର ଛୁଟିଦିନ ଥିବାବେଳେ ନନ୍ଦନକାନନକୁ ସର୍ବାଧିକ ୩୦ହଜାର ୮୮୨ ପର୍ଯ୍ୟଟକ ବୁଲିବାକୁ ଆସିଥିବା ଜଣାପଡ଼ିଛି। ସେମାନଙ୍କ ମଧ୍ୟରୁ ଅଫଲାଇନ୍ରେ ୨୯ହଜାର ୨୯୧ଜଣ ଓ ଅନ୍ଲାଇନରେ ୧ହଜାର ୫୯୧ଜଣ ପର୍ଯ୍ୟଟକ ଟିକଟ କରିଥିଲେ। ସେହିପରି ବଟାନିକାଲ ଗାର୍ଡେନକୁ ସର୍ବାଧିକ ୫ ହଜାର ୫୮୮ ଜଣ ପର୍ଯ୍ୟଟକ ବଣଭୋଜି କରିବାକୁ ଆସିଥିଲେ ବୋଲି ନନ୍ଦନକାନନ ଉପନିର୍ଦ୍ଦେଶକ ଡ. ସଞ୍ଜିତ୍ କୁମାର କହିଛନ୍ତି। ନନ୍ଦନକାନନରେ ବିଭିନ୍ନ ଏନ୍କ୍ଲୋଜରରେ ଥିବା ପ୍ରାଣୀଙ୍କୁ ଦେଖିବା ସହ ସଫାରି ସାଙ୍ଗକୁ ଶିଶୁ ରେଳଗାଡି, ବ୍ୟାଟେରି ଅଟୋରେ ବୁଲିବାର ମଜା ଉଠାଇଥିଲେ। ଅନ୍ୟତମ ଆକର୍ଷଣ ବୋଟିଂ ଓ ଶିଶୁଉଦ୍ୟାନ ବନ୍ଦ ଥିବାରୁ ପର୍ଯ୍ୟଟକ କିଛିଟା ନିରାଶ ହୋଇଥିଲେ। ବଟାନିକାଲ୍ ଗାର୍ଡେନରେ ବଣଭୋଜି ସାଙ୍ଗକୁ ବିଭିନ୍ନ ଉଦ୍ୟାନ ଓ ପାର୍କ ଆଦି ବୁଲି ପର୍ଯ୍ୟଟକ ମଜା ନେଇଥିଲେ।