ମୁମ୍ବାଇ, ୩।୧୦: ଚଳିତ ବର୍ଷ ମହାରାଷ୍ଟ୍ରରେ ବାଘ ୩୧ ଜଣ ଲୋକଙ୍କ ଜୀବନ ନେଇସାରିଛି। ଯାହା ଗତ ଦଶନ୍ଧି ମଧ୍ୟରେ ଗୋଟିଏ ବର୍ଷରେ ସର୍ବାଧିକ। ୨୦୧୦ ପରଠାରୁ ମହାରାଷ୍ଟ୍ରରେ ୧୫୩ ଜଣ ଲୋକ ବାଘ ଆକ୍ରମଣରେ ପ୍ରାଣ ହରାଇଛନ୍ତି। ସେହିଭଳି ୨୦୨୦ର ପ୍ରଥମ ୯ ମାସ ମଧ୍ୟରେ ରାଜ୍ୟରେ ସର୍ବାଧିକ ୫୭ ଜଣ ଲୋକ ବନ୍ୟଜନ୍ତୁଙ୍କ ଆକ୍ରମଣରେ ମୃତ୍ୟୁବରଣ କରିଛନ୍ତି। ସେହିଭଳି ୨୦୧୦ରୁ ୨୦୨୦ ମଧ୍ୟରେ ମହାରାଷ୍ଟ୍ରରେ ୪୬୭ ଜଣ ଲୋକ ବନ୍ୟଜନ୍ତୁଙ୍କ ଆକ୍ରମଣରେ ପ୍ରାଣ ହରାଇଥିବା ରାଜ୍ୟ ଜଙ୍ଗଲ ବିଭାଗ ପକ୍ଷରୁ ପ୍ରକାଶିତ ତଥ୍ୟରୁ ଜଣାପଡ଼ିଛି।
ଦଶନ୍ଧି ମଧ୍ୟରେ ମହାରାଷ୍ଟ୍ରରେ ବାଘ ଆକ୍ରମଣରେ ପ୍ରାଣ ହରାଉଥିବା ଲୋକଙ୍କ ଅନୁପାତ ୫ ଗୁଣା ବୃଦ୍ଧି ପାଇଛି। ୨୦୧୦ରେ ବାଘ ଆକ୍ରମଣରେ ଏଠାରେ ୫ ଜଣଙ୍କ ମୃତ୍ୟୁ ହୋଇଥିଲା। ଯାହା ବୃଦ୍ଧି ପାଇଁ ୨୦୧୭ ଓ ୨୦୧୯ରେ ୨୪ ଏବଂ ୨୦୨୦ ସେପ୍ଟେମ୍ବର ସୁଦ୍ଧା ୩୧ରେ ପହଞ୍ଚିଛି। କେନ୍ଦ୍ର ପରିବେଶ ମନ୍ତ୍ରଣାଳୟ ପକ୍ଷରୁ ଲୋକସଭାରେ ପ୍ରକାଶିତ ତଥ୍ୟରୁ ଜଣାପଡ଼ିଛି ଯେ, ୨୦୧୪ରୁ ଭାରତରେ ବାଘ ଓ ମଣିଷ ମଧ୍ୟରେ ଲଢ଼େଇ ଘଟି ମହାରାଷ୍ଟ୍ରରେ ସର୍ବାଧିକ ଲୋକଙ୍କ ଜୀବନ ଯାଇଛି।