ନୂଆଦିଲ୍ଲୀ,୭।୧୨: ଭାରତରେ ୩୧% ମହିଳାଙ୍କ ନିକଟରେ ନିଜସ୍ବ ଫୋନ୍ ରହିଛି। ପୁରୁଷଙ୍କ ତୁଳନାରେ ମହିଳାମାନେ କମ୍ ସଂଖ୍ୟାରେ ଫୋନ୍ ବ୍ୟବହାର କରୁଥିବା ଅକ୍ସଫାମ୍ ପକ୍ଷରୁ ପ୍ରକାଶିତ ରିପୋର୍ଟରେ ଉଲ୍ଲେଖ କରାଯାଇଛି। ସେହିପରି ଦେଶରେ ମୋଟ ୬୦% ପୁରୁଷଙ୍କ ପାଖରେ ଆଣ୍ଡ୍ରଏଡ୍ ଫୋନ୍ ରହିଛି। ଅକ୍ସଫାମ୍ର ‘ଇଣ୍ଡିଆ ଇନ୍ଇକ୍ୱାଲିଟି ରିପୋର୍ଟ ୨୦୨୨: ଡିଜିଟାଲ ଡିଭାଇସ୍’ ରିପୋର୍ଟରେ ୨୦୨୧ ଶେଷ ପର୍ଯ୍ୟନ୍ତ ହସ୍ତଗତ ତଥ୍ୟକୁ ନେଇ ଏହା ପ୍ରସ୍ତୁତ ହୋଇଛି। ଡିଜିଟାଲ ଇନ୍ଇକ୍ୱାଲିଟିଭିତ୍ତିରେ କରାଯାଇଥିବା ଅଧ୍ୟୟନ ଅନୁସାରେ ମହିଳାମାନେ ବ୍ୟବହାର କରୁଥିବା ଫୋନ୍ ସାଧାରଣ ଭାବେ କମ୍ ମୂଲ୍ୟର ହୋଇଥିବାବେଳେ ପୁରୁଷ ଦାମୀ ଓ ଅଧିକ ଫିଚରଯୁକ୍ତ ଫୋନ୍ ବ୍ୟବହାର କରୁଛନ୍ତି। ଫୋନ୍ ବ୍ୟବହାର କ୍ଷେତ୍ରରେ ମହିଳାଙ୍କଠୁ ପୁରୁଷମାନେ ଆଗୁଆ। ମୋବାଇଲ୍ରେ ଉପଲବ୍ଧ ଡିଜିଟାଲ ସର୍ଭିସ୍ ସହିତ ଇଣ୍ଟରନେଟ୍ର କମ୍ ବ୍ୟବହାର ମହିଳାମାନେ କରୁଛନ୍ତି। ଷ୍ଟଡି ରିପୋର୍ଟ ମୁତାବକ ଭାରତରେ ମାତ୍ର ଏକ ତୃତୀୟାଂଶ ମହିଳା ଇଣ୍ଟରନେଟ୍ ବ୍ୟବହାର କରୁଛନ୍ତି। ଆୟ, ଜାତି, ଶିକ୍ଷା ଓ ଅଞ୍ଚଳକୁ ନେଇ ସେଣ୍ଟ୍ରାଲ୍ ଅଫ୍ ମୋନିଟରିଂ ଇଣ୍ଡିଆ ଇକୋନୋମି (ସିଏମ୍ଆଇଇ) ଏବଂ ନ୍ୟାଶନାଲ ସାମ୍ପୁଲ୍ ସର୍ଭେ (ଏନ୍ଏସ୍ଏସ୍)ର ତଥ୍ୟ ଅନୁସାରେ ଅକ୍ପଫାମ୍ ଉକ୍ତ ରିପୋର୍ଟ ତିଆରି କରିଛି। ୧୦୦ ଜଣଙ୍କ ଭିତରୁ ମାତ୍ର ୫୭.୨୯% ଲୋକ ଇଣ୍ଟରନେଟ୍ ସବ୍ସକ୍ରାଇବର ହୋଇଥିବାବେଳେ ଗ୍ରାମାଞ୍ଚଳରେ ଏହା ୩୪% ରହିଛି। ଦେଶରେ ଶିକ୍ଷା, ସ୍ବାସ୍ଥ୍ୟ ଏବଂ ଆର୍ଥିକ ଉନ୍ନତି ହେଲେ ଯାଇ ଡିଜିଟାଲ ଟ୍ରାନ୍ସଫରମେଶନ୍ ଘଟିବ ବୋଲି ଅକ୍ସଫାମ ଇଣ୍ଡିଆ ସିଇଓ ଅମିତାଭ ବେହର ମତ ପ୍ରକାଶ କରିଛନ୍ତି।
