ଓସମାନାବାଦ,୧୬।୧୦ : ଆଜିର ଯୁଗରେ, ଯେତେବେଳେ ଜମି ବିବାଦ ସାଧାରଣ ହୋଇଗଲାଣି, ମହାରାଷ୍ଟ୍ରର ଓସମାନାବାଦ ଜିଲାର ଏକ ଗାଁ ଏକ ନିଆରା ଉଦାହରଣ ସୃଷ୍ଟି କରିଛି। ଏଠାରେ ୩୨ ଏକର ଜମି ମାଙ୍କଡ଼ଙ୍କ ନାମରେ ନାମିତ ହୋଇଛି। ଏହି ଗାଁରେ ମାଙ୍କଡ଼ମାନଙ୍କ ପ୍ରତି ଏତେ ସମ୍ମାନ ଅଛି ଯେ, ବେଳେବେଳେ ବିବାହ ସମୟରେ ଲୋକଙ୍କ ଭୋଜି ପୂର୍ବରୁ ମାଙ୍କଡମାନଙ୍କୁ ଖାଦ୍ୟ ଦିଆଯାଏ ।
ମହାରାଷ୍ଟ୍ରର ଓସମାନାବାଦ ଜିଲାର ଉପଲା ଗ୍ରାମରେ ମାଙ୍କଡ଼ଙ୍କ ପ୍ରତି ଥିବା ସମ୍ମାନକୁ ନେଇ ସୋସିଆଲ ମିଡ଼ିଆରେ ବହୁ ଚର୍ଚ୍ଚା ହୋଇଥାଏ। ମାଙ୍କଡ଼ମାନେ ଗାଁ ଭିତରକୁ ଆସିଲେ ଲୋକେ ଖୁସିରେ ସେମାନଙ୍କୁ ଖାଦ୍ୟ ଦିଅନ୍ତି। ମାଙ୍କଡ଼ମାନେ କାହାର କ୍ଷତି ମଧ୍ୟ କରନ୍ତି ନାହିଁ।
ଉପଲା ଗ୍ରାମ ପଞ୍ଚାୟତର ଜମି ରେକର୍ଡ ଅନୁଯାୟୀ, ୩୨ ଏକର ଜମି ଗାଁରେ ରହୁଥିବା ସମସ୍ତ ମାଙ୍କଡ଼ଙ୍କ ନାମରେ ଅଛି। ସରପଞ୍ଚ ବାପ୍ପା ପଡୱାଲ କହିଛନ୍ତି ଯେ ଏହି ଡକ୍ୟୁମେଣ୍ଟରେ ସ୍ପଷ୍ଟ ଭାବରେ ଉଲ୍ଲେଖ କରାଯାଇଛି ଯେ ଜମି ମାଙ୍କଡ଼ମାନଙ୍କର ଅଟେ। ଯଦିଓ ପଶୁମାନଙ୍କ ପାଇଁ କିଏ ଏହି ବ୍ୟବସ୍ଥା କରିଛି ଏବଂ କେବେ କରିଛି ତାହା ଜଣା ପଡିନାହିଁ।
ପୂର୍ବରୁ ମାଙ୍କଡମାନେ ଗାଁରେ କରାଯାଇଥିବା ସମସ୍ତ ରୀତିନୀତିର ଏକ ଅଂଶ ଥିଲେ। ବର୍ତ୍ତମାନ ଗାଁରେ ପ୍ରାୟ ୧୦୦ଟି ମାଙ୍କଡ ଅଛନ୍ତି। ସେମାନେ ଗୋଟିଏ ସ୍ଥାନରେ ସବୁବେଳେ ସ୍ଥାୟୀ ଭାବେ ରହୁ ନ ଥିବାରୁ ଗତ କିଛି ବର୍ଷ ମଧ୍ୟରେୁ ସେମାନଙ୍କ ସଂଖ୍ୟା ହ୍ରାସ ପାଉଛି। ସେ କହିଛନ୍ତି ଯେ ଜଙ୍ଗଲ ବିଭାଗ ଜମିରେ ବୃକ୍ଷରୋପଣ କରିଛି ଏବଂ ଏହି ପ୍ଲଟରେ ପୂର୍ବରୁ ଏକ ଘର ଥିଲା, ଯାହା ବର୍ତ୍ତମାନ ଭୁଶୁଡି ପଡିଛି।
ସରପଞ୍ଚ କହିଛନ୍ତି, ପୂର୍ବରୁ ଯେତେବେଳେ ବି ଗାଁ କାହାର ବିବାହ ଅନୁଷ୍ଠିତ ହେଉଥିଲା ସେତେବେଳେ ମାଙ୍କଡମାନଙ୍କୁ ପ୍ରଥମେ ଖାଇବାକୁ ଦିଆଯାଉଥିଲା ଏବଂ ପରେ ସମାରୋହ ଆରମ୍ଭ କରାଯାଇଥିଲା। ତେବେ ବର୍ତ୍ତମାନ ସମସ୍ତେ ଏହି ପରମ୍ପରାକୁ ଆଉ ପାଳନ କରୁନାହାଁନ୍ତି। ତେବେ କୌଣସି ଲୋକ ମାଙ୍କଡ଼ଙ୍କୁ ଖାଦ୍ୟ ଦେବାକୁ ମନା କରି ନଥାନ୍ତି।