ଭବାନୀପାଟଣା,୧୦।୧୦(ସ୍ବ.ପ୍ର.): କଳାହାଣ୍ଡି ଜିଲା ଲାଞ୍ଜିଗଡ଼ ଥାନା ଅଞ୍ଚଳରେ କୁମାରପୂର୍ଣ୍ଣିମା ରାତିରେ ବିଭିନ୍ନ ସ୍ଥାନରେ ଜୁଆ ଖେଳ ହେଉଥିବା ଅଭିଯୋଗ ପାଇ ପୋଲିସ ଚଢ଼ାଉ କରିଥିଲା। ଚଢାଉ ବେଳେ ପୋଲିସ ଜୁଆଖେଳରେ ସମ୍ପୃକ୍ତ ଥିବା ୩୨ଜଣଙ୍କୁ ଗିରଫ କରିଛି। ଏପରି କି ପୋଲିସ ତାଙ୍କଠାରୁ ୮ଟିି ବାଇକ୍, ୩୦ଟି ମୋବାଇଲ ଫୋନ, ନଗଦ ୭୧ ହଜାର ଟଙ୍କା ଓ ଜୁଆଖେଳରେ ବ୍ୟବହୃତ ତାସ୍ ଜବତ କରିଛି।
କଳାହାଣ୍ଡି ଏସ୍ପି ଅଭିଳାସ ଜୀଙ୍କ ନିର୍ଦ୍ଦେଶକ୍ରମେ ଲାଞ୍ଜିଗଡ଼ ଥାନା ଅଧିକାରୀ ସତ୍ୟାନନ୍ଦ ପାତ୍ରଙ୍କ ନେତୃତ୍ୱରେ ୩ଟି ଟିମ୍ ଗଠନ କରାଯାଇ ବସନ୍ତପଡ଼ା, ଚମ୍ପାଦେଇପୁର, ହରେକୃଷ୍ଣପୁର, ଲଙ୍ଗଲବେଡ଼ା, ଜଗନ୍ନାଥପୁର, ମୋହନଗୁଡ଼ା ଓ ଲାଞ୍ଜିଗଡ଼ର ବିଭିନ୍ନ ସ୍ଥାନରେ ଚଢ଼ାଉ କରିଥିଲା। ଚଢାଉ ବେଳେ ପୋଲିସକୁ ଦେଖି ଲାଞ୍ଜିଗଡ଼ ଭୈରବ ମନ୍ଦିର ନିକଟରେ ଚାଲିଥିବା ଜୁଆଆଡ୍ଡାରୁ ସମସ୍ତେ ଫେରାର ହୋଇଯାଇଥିଲେ। ଅନ୍ୟସ୍ଥାନଗୁଡିକରୁ ପୋଲିସ ୩୨ଜଣ ଜୁଆଡିଙ୍କୁ ଧରି ଥାନାକୁ ଆଣିଥିଲା। ଏ ନେଇ ଲାଞ୍ଜିଗଡ଼ ଥାନାରେ ୬ଟି ପୃଥକ ମାମଲା ରୁଜୁ କରାଯିବା ସହିତ ସେମାନଙ୍କୁ ଅଟକ ରଖାଯାଇଥିଲା । ପରେ ଅଭିଯୁମାନଙ୍କୁ ଜାମିନଦାରଙ୍କ ଉପସ୍ଥିତିରେ ବେଲବଣ୍ଡରେ ଜାମିନ ପ୍ରଦାନ କରାଯାଇଛି।