ବଡ଼ମ୍ବା,୧।୬(ଡି.ଏନ.ଏ.): ଦୀର୍ଘଦିନ ଧରି ସରକାରୀ ଜାଗାକୁ ଜବରଦଖଲ କରି ଆସୁଥିବା ୩୨ ବ୍ୟକ୍ତିଙ୍କୁ ବଡମ୍ବା ବ୍ଲକ ପ୍ରଶାସନ ପକ୍ଷରୁ ବୁଧବାର ଉଚ୍ଛେଦ କରାଯାଇଛି। ଜବରଦଖଲ ଉଚ୍ଛେଦ ପାଇଁ ବହୁଦିନ ଧରି ଗମେଇ ଗ୍ରାମବାସୀଙ୍କ ପକ୍ଷରୁ ଦାବି ହୋଇଆସୁଥିଲା। ହେଲେ କୌଣସି ସୁଫଳ ମିଳି ନ ଥିଲା। ଏହାକୁ ନେଇ ପ୍ରବଳ ଜନଅସନ୍ତୋଷ ଲାଗି ରହିଥିଲା। ପ୍ରଶାସନ ପକ୍ଷରୁ ବଡମ୍ବା ତହସିଲଦାର ନୀଳକଣ୍ଠ ବେହେରା ଓ ବଡମ୍ବା ଥାନା ଆଇଆଇସି ସ୍ନିଗ୍ଧାମୟୀ ବରାଳଙ୍କ ଉପସ୍ଥିତିରେ ୩୨ ଜବରଦଖଲକରୀଙ୍କୁ ଉଚ୍ଛେଦ କରିଛନ୍ତି। ନିର୍ମାଣ କରାଯାଇଥିବା ଘରଗୁଡିକୁ ଜେସିବି ଦ୍ୱାରା ଭାଙ୍ଗି ଦିଆଯାଇଛି। ଉଚ୍ଛେଦ ସମୟରେ ଜଳସେଚନ ବିଭାଗ କନିଷ୍ଠ ଯନ୍ତ୍ରୀ ପଞ୍ଚାନନ ସାହୁ, ବଡମ୍ବା ଥାନା ଏସ୍ଆଇ ସତ୍ୟ ନାରାୟଣ ପାଢୀ, ରାଜସ୍ବ ପରିଦର୍ଶକ ରମେଶ ଦେହୁରୀ, ବରିଷ୍ଠ ରାଜସ୍ବ ସହାୟକ ଶୈଳେନ୍ଦୁ ଶେଖର ନାୟକ, ରାଜସ୍ବ ନିରୀକ୍ଷକ ମନୋଜ କୁମାର ସାହୁ, ଅମିନ ଚକ୍ରଧର ଦାସ, ଦେବେନ୍ଦ୍ର ନାଥ ବାରିକ ପ୍ରମୁଖ ଉପସ୍ଥିତ ରହି ସହଯୋଗ କରିଥିଲେ। ବଡମ୍ବା ତହସିଲ ଅନ୍ତର୍ଗତ ଗମେଇ ଗ୍ରାମର ପ୍ରାୟ ୩୨ ଜଣ ବ୍ୟକ୍ତି ସ୍ଥାନୀୟ ଜଳସେଚନ ବିଭାଗର ନଦୀବନ୍ଧ ପାର୍ଶ୍ୱରେ ଥିବା ସରକାରୀ ଜାଗାକୁ ଜବରଦଖଲ କରି ରହି ଆସୁଥିଲେ। ଗ୍ରାମବାସୀଙ୍କ ଅଭିଯୋଗକ୍ରମେ କୌଣସି ସୁଫଳ ମିଳି ନ ଥିଲା।
