ଝାରସୁଗୁଡ଼ା ଅଫିସ,୧୫ା୨: ଝାରସୁଗୁଡ଼ା ଜିଲାରେ ୯ ଜିଲା ପରିଷଦ ଆସନ ରହିଥିବା ବେଳେ ବିଭିନ୍ନ ରାଜନୈତିକ ଦଳରୁ ସମୁଦାୟ ୩୩ଜଣ ପ୍ରାର୍ଥୀ ନିର୍ବାଚନ ଲଢୁଛନ୍ତି। ଜିଲାରେ ୧୬ ଓ ୧୮ ତାରିଖ ୨ଟି ପର୍ଯ୍ୟାୟରେ ମତଦାନ ହେବ। ପ୍ରଥମ ପର୍ଯ୍ୟୟ ମତଦାନ ପାଇଁ ସୋମବାର ନିର୍ବାଚନ ପ୍ରଚାର ଶେଷ ହୋଇଛି। ଦ୍ୱିତୀୟ ପର୍ଯ୍ୟାୟ ମତଦାନ ଆଉ ୩ ଦିନ ବାକି ରହିଥିବାବେଳେ ପ୍ରାର୍ଥୀମାନେ ପ୍ରଚାରକୁ ଜୋରଦାର କରିଛନ୍ତି।
କେନ୍ଦ୍ର ଓ ରାଜ୍ୟ ସରକାରଙ୍କ ବହୁମୁଖୀ ଯୋଜନାକୁ ନେଇ ଦଳୀୟ ନେତାମାନେ ଭୋଟରଙ୍କୁ ପ୍ରଭାବିତ କରୁଥିବା ବେଳେ କେତେକ ଆସନରେ ଦଳୀୟ ପ୍ରାର୍ଥୀଙ୍କ ଭାବମୂର୍ତ୍ତିକୁ ନେଇ ଭୋଟର ପ୍ରଶ୍ନ କରୁଛନ୍ତି, ଯାହା ଦଳ ପାଇଁ କ୍ଷତି ପହଞ୍ଚାଇବା ସମ୍ଭାବନା ରହିଛି। ଏହାଛଡା ଦଳୀୟ ଟିକେଟ ବଣ୍ଟାକୁ ନେଇ କର୍ମୀଙ୍କ ମଧ୍ୟରେ ଅସନ୍ତୋଷ ରହିଛି। ଏହାର ସମାଧାନ ପାଇଁ ଦଳୀୟ ନେତାମାନେ ଲାଗିପଡିଛନ୍ତି। ଭୋଟରଙ୍କୁ ପ୍ରଭାବିତ କରିବା ପାଇଁ ଦଳୀୟ ପ୍ରାର୍ଥୀମାନେ ବିଭିନ୍ନ ପ୍ରକାର ପ୍ରଲୋଭନ ଦେଖାଉଛନ୍ତି। ହେଲେ ଏଥିରେ ଭୋଟର ଭାସି ନ ଯାଇ ନିଜର ବୁଦ୍ଧିବିଚାର ଖଟାଇ ଉଚିତ ପ୍ରାର୍ଥୀଙ୍କୁ ଭୋଟ୍ ଦେବେ ବୋଲି ନିଷ୍ପତ୍ତି ନେଇଛନ୍ତି। ଜିଲା ପରିଷଦ ଆସନ ୯ ସଂଖ୍ୟାକୁ ହାସଲ କରିବା ପାଇଁ ରାଜନୈତିକ ଦଳ ଲାଗିପଡିଛନ୍ତି। ବିଜେଡି ୯କୁ ୯ ଜିତିବ ବୋଲି ଦୃଢୋକ୍ତି ପ୍ରକାଶ କରିଥିବାବେଳେ ଭାଜପା ଏହାକୁ ଭୁଲ ପ୍ରମାଣିତ କରିବା ପାଇଁ ପ୍ରୟାସ ଚଳାଇଛି। ଅନ୍ୟପକ୍ଷେ ଭାଜପା ୩ ଆସନ ହାତେଇବ ବୋଲି ସବୁଠି ଚର୍ଚ୍ଚା ଚାଲିଛି । ଭୋଟରଙ୍କ ଏହି ଅଙ୍କ ଦଳର ହୋସ୍ ଉଡାଇ ଦେଉଛି। ବିଗତ ୨୦୧୭ ନିର୍ବାଚନ ଫଳାଫଳକୁ ଦେଖିଲେ କଂଗ୍ରେସ ୮ ଓ ଭାଜପା ୧ ଆସନରେ ବିଜୟୀ ହୋଇଥିଲା। ଏଥର ବିଜେଡି ଜିଲା ପରିଷଦ ଅଧ୍ୟକ୍ଷ ପଦ ଦଖଲ ପାଇଁ ଆଶା ବାନ୍ଧିଥିବାବେଳେ ଭାଜପା ଅଧିକ ଆସନ ହାତେଇବାକୁ ଲକ୍ଷ୍ୟ ରଖିଛି। କଂଗ୍ରେସ ସମ୍ମାନ ରକ୍ଷା କରିପାରିବ କି ନାହିଁ ତାହା ଚର୍ଚ୍ଚାର ବିଷୟ ହୋଇଛି ।