ଅନୁଗୋଳ ଅଫିସ,୨୫ା୧୧: ଅନୁଗୋଳ ବ୍ଲକ ବସଲା ପଞ୍ଚାୟତ ଭେରୁବଣିଆ ଗ୍ରାମରେ ହାତୀପଲ ଆତଙ୍କ ଖେଳାଇ ଦେଇଛନ୍ତି। ବ୍ୟାପକ ଫସଲ ନଷ୍ଟ କରିବା ସହ ଆକ୍ରମଣ କରିବାକୁ ଗୋଡ଼ାଉଥିବାରୁ ଲୋକେ ଭୟଭୀତ ହୋଇପଡ଼ିଛନ୍ତି। ଏପରି କି ଗ୍ରାମର ସରୋଜ ଜେନାଙ୍କୁ ଦଳିଦେବାକୁ ଗୋଟିଏ ହାତୀ ଉଦ୍ୟମ କରିଥିଲେ ହେଁ ସରୋଜ ଅଳ୍ପକେ ବର୍ତ୍ତି ଯାଇଛନ୍ତି। ତେବେ ହାତରେ ଆଘାତ ଲାଗିଥିବାରୁ ଅଞ୍ଚଳବାସୀ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟ ଆଣି ଚିକିତ୍ସା କରାଇଛନ୍ତି।
ପ୍ରକାଶ ଯେ, ଗୋଟିଏ ପଲରେ ଥିବା ୩୩ଟି ହାତୀ ବନ୍ତଳା ରେଞ୍ଜ ବସଲା ପଞ୍ଚାୟତ ଭେରୁବଣିଆରେ ପଶିଛନ୍ତି। ୫ ଦନ୍ତା ସହ ୨୩ ମାଈ ଓ ୫ଟି ଛୁଆ ହାତୀ ଭେରୁ ବଣିଆରେ ଥିବା ନଟିରେ ରହିଛନ୍ତି। ଏହି ହାତୀ ପଲ ସ୍ଥାନୀୟ ଅଞ୍ଚଳରେ ବ୍ୟାପକ ଫସଲ ନଷ୍ଟ କରିଥିବା ଲୋକମାନେ ଅଭିଯୋଗ କରିଛନ୍ତି। ହାତୀ ଘୋଡ଼ାଇବାକୁ ସକାଳୁ ବହୁ ଲୋକ ନଟିକୁ ଯାଇଥିଲେ। ବନ ବିଭାଗ କର୍ମଚାରୀ ସେମାନଙ୍କୁ ବାରଣ କରିବା ସତ୍ତ୍ୱେ କେତେଜଣ ଯୁବକ ହାତୀପଲଙ୍କ ଅତି ନିକଟକୁ ଚାଲିଯାଇଥିଲେ। ଫଳରେ ହାତୀପଲ ସେମାନଙ୍କୁ ଗୋଡ଼ାଇଥିବା କୁହାଯାଇଛି। ଘଟଣା ସମ୍ପର୍କରେ ବନ୍ତଳା ରେଞ୍ଜର ମାଧବ ନାୟକ କହିଛନ୍ତି, ହାତୀପଲ ଭେରୁବଣିଆରେ ରହିଛନ୍ତି। ସେମାନଙ୍କୁ ଘଉଡ଼ାଇବା ପାଇଁ ଉଦ୍ୟମ ଜାରି ରହିଛି। ଫସଲ ନଷ୍ଟ ସମ୍ପର୍କରେ କୌଣସି ଅଭିଯୋଗ ଆସିନାହିଁ। ତେବେ ହାତୀ ଦେଖିବାକୁ ଲୋକମାନେ ସକାଳୁ ରୁଣ୍ଡ ହୋଇଥିଲେ। ଦୁଇ ଜଣ ଯୁବକ ଅତି ନିକଟକୁ ଯାଇଥିଲେ। ଫଳରେ ହାତୀ ସେମାନଙ୍କୁ ଆକ୍ରମଣ କରିବାକୁ ଉଦ୍ୟମ କରିଥିଲା। ଜଣେ ଯୁବକ ପଡ଼ିଯାଇଥିଲେ ବି ହାତୀ ପାଦରେ ଆଡ଼େଇ ଦେଇ ଚାଲିଯାଇଥିବା ରେଞ୍ଜର ପ୍ରକାଶ କରିଛନ୍ତି।