ନୂଆପଡ଼ା ଅଫିସ,୧୧।୨: ନୂଆପଡ଼ା ଜିଲାର ଦାଦନ ଶ୍ରମିକମାନେ ବାହାର ରାଜ୍ୟକୁ କାମ କରିବାକୁ ଯାଇ ସେଠାରେ ମାଲିକମାନଙ୍କ ଦ୍ୱାରା ନିର୍ଯାତିତ ହେଉଥିବା ଘଟଣା ବାରମ୍ବାର ସାମ୍ନାକୁ ଆସୁଛି। ଗତ ମାସ ୨୫ ତାରିଖରେ କୋମନା ବ୍ଲକର ବିଭିନ୍ନ ଗାଁର ୬୫ଜଣ ଦାଦନ ଶ୍ରମିକ ହାଇଦ୍ରାବାଦ ନିକଟ ସିସିଲା ଚନ୍ଦ୍ରମପେଟ ଇଟାଭାଟିରେ ନିର୍ଯାତିତ ହେଉଥିବା ଅଭିଯୋଗ କରି ଭିଡିଓ ମାଧ୍ୟମରେ ଉଦ୍ଧାର କରିବା ପାଇଁ ଅନୁରୋଧ କରିଥିଲେ। ଏବେ ପୁଣି କୋମନା ବ୍ଲକ ଅଧୀନ ବିଭିନ୍ନ ଗାଁର ୩୪ଜଣ ଦାଦନ ଶ୍ରମିକ ତେଲଙ୍ଗାନାର ବନଗିରି ଥାନା ଚିକଡମାମଲିର ଏକ ଇଟାଭାଟିରେ ନିର୍ଯାତିତ ହେଉଛନ୍ତି। ସେଠାରେ ମାଲିକ ଦ୍ୱାରା ନିର୍ଯାତନାର ଶିକାର ହେଉଥିବା ବେଳେ ଉଦ୍ଧାର କରିବା ଲାଗି ଏକ ଭିଡିଓ ମାଧ୍ୟମରେ ସେମାନେ ଜିଲା ପ୍ରଶାସନକୁ ଅନୁରୋଧ କରିଛନ୍ତି।
ନୂଆପଡ଼ା ଜିଲା କୋମନା ବ୍ଲକରେ ଚଳିତବର୍ଷ ସ୍ବାଭାବିକଠାରୁ କମ ବର୍ଷା ହେବାରୁ ଚାଷ କାର୍ଯ୍ୟ ହୋଇପାରି ନାହିଁ। ଫଳରେ ଲୋକେ କାମଧନ୍ଦା ଅଭାବରୁ ବାହାର ରାଜ୍ୟକୁ ଦାଦନ ଖଟିବାକୁ ଯାଇ ସେଠାରେ ନିର୍ଯାତନାର ଶିକାର ହୋଇଥିବା ଘଟଣା ଏବେ ଜଣାପଡ଼ିଛି। ଗତ ଡିସେମ୍ବରରେ ଜଣେ ଦାଦନ ସର୍ଦ୍ଦାରଙ୍କ ସହାୟତାରେ କୋମନା ବ୍ଲକ ବେଲଗାଁରୁ ୯ଜଣ, କୋଟିରିବାହାଲିରୁ ୬ଜଣ, ଠାକୁରପାଲିରୁ ଜଣେ, ଲୋହୋଣ୍ଡୋପାଲିରୁ ୮, ମାଲପଡାରୁ ୧୦ ଏପରି ମୋଟ ୩୪ଜଣ ଦାଦନ ଶ୍ରମିକ ତେଲଙ୍ଗାନାର ବନଗିରି ଥାନା ଚିକଡମାମଲିର ଏକ ଇଟାଭାଟିକୁ କାମ କରିବା ପାଇଁ ଯାଇଥିଲେ।