କଟକ,୧୦ା୧୨(ସୁପ୍ରିୟା ପ୍ରିୟଦର୍ଶିନୀ)୯ ଦିନ ଧରି ଚାଲିଥିବା କଟକ ବାଲିଯାତ୍ରା ମଙ୍ଗଳବାର ଶେଷ ହୋଇଛି। ଇତିମଧ୍ୟରେ ୩ ଦିନ ବିତିଯାଇଥିଲେ ମଧ୍ୟ ବାଲିଯାତ୍ରା ପଡିଆରେ କୁଢ କୁଢ ଆବର୍ଜନା ଜମି ରହିଥିଲା। ଏହାକୁ ସଫା କରିବା ପାଇଁ ଉଚ୍ଚଶିକ୍ଷା ବିଭାଗ ପକ୍ଷରୁ ଅଭିଯାନ ଆରମ୍ଭ କରାଯାଇ ବିଭିନ୍ନ କଲେଜ ଛାତ୍ରୀଛାତ୍ରଙ୍କୁ ଶନିବାର ନିୟୋଜିତ କରାଯାଇଥିଲା। ପଡିଆ ସଫେଇ ପାଇଁ କଟକ ମହାନଗର ନିଗମ(ସିଏମ୍ସି) ପକ୍ଷରୁ ଜାଗୃତୀ ନାମକ ଏକ ସଂସ୍ଥାକୁ ୩୪ ଲକ୍ଷ ଟଙ୍କାର କାର୍ଯ୍ୟାଦେଶ ଦିଆଯାଇଛି। ଏହାସତ୍ତ୍ୱେ ନେତା, ବିଧାୟକ, ପୂର୍ବତନ ଜିଲାପାଳ, ସିଏମ୍ସି ଅଧିକାରୀଙ୍କ ଉପସ୍ଥିତିରେ କଲେଜ ଛାତ୍ରୀଛାତ୍ରଙ୍କୁ ପଡିଆ ସଫେଇରେ ନିୟୋଜିତ କରାଯାଇଛି। ଏହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ଶନିବାର ପୂର୍ବାହ୍ନରେ ବାଲିଯାତ୍ରା ପଡ଼ିଆରେ ସ୍ବଚ୍ଛତା ଅଭିଯାନ ଅନୁଷ୍ଠିତ ହୋଇଥିଲା। ଏଥିରେ କଟକର ୧୩ରୁ ଊର୍ଦ୍ଧ୍ୱ ମହାବିଦ୍ୟାଳୟର ଛାତ୍ରୀଛାତ୍ର ଯୋଗଦେଇ ପଡିଆ ସଫା କରିଥିଲେ। ପଡିଆ ସଫେଇ ପାଇଁ ବିନା ଟେଣ୍ଡରେ ଉକ୍ତ ସଂସ୍ଥାକୁ କାର୍ଯ୍ୟାଦେଶ ଦିଆଯାଇଥିବାରୁ କର୍ପୋରେଟରମାନେ ପ୍ରଶ୍ନ କରିଥିଲେ। ଉକ୍ତ ସଂସ୍ଥା ଗତବର୍ଷ ବାଲିଯାତ୍ରାରେ ଭଲ କାର୍ଯ୍ୟ କରିଥିବାରୁ ଚଳିତବର୍ଷ କାର୍ଯ୍ୟାଦେଶ ଦିଆଯାଇଛି ବୋଲି ସିଏମ୍ସି ସ୍ବାସ୍ଥ୍ୟ ଅଧିକାରୀ ସତ୍ୟବ୍ରତ ମହାପାତ୍ର ଗତ କାଉନସିଲ୍ ବୈଠକରେ କହିଥିଲେ। ଗତବର୍ଷ ବାଲିଯାତ୍ରା ସରିବା ପରେ ସିଏମ୍ସି ନିଜସ୍ବ ଖର୍ଚ୍ଚରେ ପଡିଆ ସଫା କରିଥିଲା। ହେଲେ ଚଳିତବର୍ଷ ଏଥିପାଇଁ ଏକ ଅଭିଯାନ କରାଯାଇ ଛାତ୍ରୀଛାତ୍ରଙ୍କ ଦ୍ୱାରା ପଡିଆ ସଫା କରାଯାଇଛି। ଏନେଇ ସ୍ବାସ୍ଥ୍ୟ ଅଧିକାରୀ ମହାପାତ୍ରଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ପ୍ରତିକ୍ରିୟା ମିଳିପାରିନାହିଁ। ଅପରପକ୍ଷରେ ବିଜେଡି କଟକ ଜିଲା ସଭାପତି ଦେବାଶିଷ ସାମନ୍ତରାୟ କହିଛନ୍ତି, ସାଧାରଣ ଲୋକ ହିସାବରେ ମୁଁ ଅନୁଭବ କରୁଛି କିଛି କାର୍ଯ୍ୟ ଠିକ୍ଠାକ୍ ହୋଇନାହିଁ। କିନ୍ତୁ ଶାସକ ଦଳ ନେତା ଭାବେ ମୁଁ ଭାବୁଛି, ମେୟର ସିଏମ୍ସି ଭିତରେ ଗଠନ କରିଥିବା କମିଟିର ତଦନ୍ତରୁ ସତ ସାମ୍ନାକୁ ଆସିବ। ଏନେଇ ମେୟର ସୁବାସ ସିଂଙ୍କ ପ୍ରତିକ୍ରିୟା ମିଳିପାରିନାହିଁ।